കട്ടിപ്പാറ ഉരുള്‍പൊട്ടലിന് കാരണം നിര്‍മ്മാണപ്രവര്‍ത്തനം തന്നെയെന്ന് വിദഗ്ധ സമിതി

റിപ്പോര്‍ട്ട് സബ്കളക്ടര്‍ക്ക് കൈമാറി

കോഴിക്കോട്: കട്ടിപ്പാറ കരിഞ്ചോലമലയിൽ ഉണ്ടായ ഉരുൾപൊട്ടൽ സംബന്ധിച്ച് വിദഗ്ദ സമിതി റിപ്പോർട്ട് സമർപ്പിച്ചു. കരിഞ്ചോലമലയിലെ നിർമാണ പ്രവൃത്തികൾ ഉരുൾപൊട്ടലിന്‍റെ ആക്കം കൂട്ടി എന്ന് സ്ഥിരീകരിക്കുന്നതാണ് റിപ്പോർട്ട്. സിഡബ്ല്യുആർഡിഎം, ഭൂഗർഭ ജല വകുപ്പ്, മണ്ണ് സംരക്ഷണ വിഭാഗം എന്നിവരടങ്ങിയ വിദഗ്ദ സമിതിയാണ് സബ്കളക്ടർ വി.വിഘ്നേശ്വരിക്ക് റിപ്പോർട്ട് സമർപ്പിച്ചത്. 

ഉരുൾപൊട്ടലിന്‍റെ ഉദ്ഭവ സ്ഥാനത്തുണ്ടായിരുന്ന കൂറ്റൻ പാറക്ക് നിർമാണ പ്രവർത്തനങ്ങൾ നടന്നപ്പോൾ ഇളക്കം തട്ടി. മലവെള്ളപ്പാച്ചിലിൽ ഈ പാറ താഴേക്ക് പതിച്ചത് ദുരന്തത്തിന്‍റെ ആക്കം കൂട്ടിയെന്ന് റിപ്പോർട്ടിൽ പറയുന്നു. ഈ പ്രദേശത്തെ പാറകൾ അടരുകൾ ആയാണ് കാണപ്പെടുന്നത്. മണ്ണുമാന്തി യന്ത്രം ഉപയോഗിച്ച് മേൽമണ്ണ് നീക്കം ചെയ്തതോടെ ഈ അടരുകൾക്കും ഇളകി. 

ജലസംഭരണിക്കായി കുന്നിടിച്ച് നിരത്തിയിട്ടുണ്ടെങ്കിലും ഇവിടെ ജലസംഭരണി ഉണ്ടായിരുന്നു എന്ന കാര്യം ഉറപ്പായിട്ടില്ല. സാറ്റലൈറ്റ് ചിത്രങ്ങൾ കിട്ടിയാൽ മാത്രമേ ഇക്കാര്യം സ്ഥിരീകരിക്കാനാകു എന്നാണ് റിപ്പോർട്ടിൽ പറയുന്നത്. എണ്‍പത് ഡിഗ്രിയോളം ചരിവുള്ള പ്രദേശത്ത് നടത്തിയ അശാസ്ത്രീയ റോഡ് നിർമാണം വെള്ളത്തിന്‍റെ സ്വാഭാവിക ഒഴുക്ക് തടസ്സപ്പെടുത്തി. പതിനാല് പേർ മരിച്ച സ്ഥലമുൾപ്പെടെ എട്ട് സ്ഥലത്താണ് ഉരുൾപൊട്ടലുണ്ടായത്. ഈ പ്രദേശത്ത് വീണ്ടും ഉരുൾപൊട്ടലിന് സാധ്യതയുണ്ടെന്നും അതീവ ജാഗ്രത പുലർത്തണമെന്നും റിപ്പോർട്ടിൽ മുന്നറിയിപ്പുണ്ട്. തിങ്കളാഴ്ച വിദഗ്ദ സമിതി കളക്ടറുടെ നേതൃത്വത്തിൽ യോഗം ചേർന്നതിന് ശേഷം റിപ്പോർട്ട് സർക്കാരിന് സമർപ്പിക്കും.