'വൈദികര്‍ക്കെതിരായ പീഡനക്കേസുകള്‍ കേരളത്തില്‍ കൂടുന്നു; ദേശീയ ഏജന്‍സി അന്വേഷിക്കണം'

ആഭ്യന്തര മന്ത്രാലയത്തിന് റിപ്പോര്‍ട്ട് നല്‍കും

ദില്ലി:വൈദികര്‍ക്കെതിരായ പീഡനക്കേസുകള്‍ ദേശീയ എജന്‍സി അന്വേഷിക്കണമെന്ന് ദേശീയ വനിത കമ്മീഷന്‍. ഇക്കാര്യം ആവശ്യപ്പെട്ട് ആഭ്യന്തര മന്ത്രാലയത്തിന് വനിത കമ്മീഷന്‍ റിപ്പോര്‍ട്ട് നല്‍കും. വൈദികര്‍ക്കെതിരായ പരാതികള്‍ കേരളത്തില്‍ കൂടി വരുന്നുതായും പ്രതികൾക്ക് രാഷ്ട്രീയ സഹായം കിട്ടുന്നതായും വനിതാ കമ്മീഷന്‍ വ്യക്തമാക്കി.

സർക്കാർ പ്രശ്നത്തെ ഗൗരവമായി കാണുന്നില്ല. ജലന്ധർ ബിഷപ്പിനെതിരെ പഞ്ചാബ് പൊലീസും കേസെടുക്കണം. കുമ്പസാരം  നിർത്തലാക്കണം. കുമ്പസാരത്തിലൂടെ സ്ത്രീകൾ ബ്ലാക്ക്മെയിലിംഗിന് ഇരകളാകുന്നു. പൊലീസ് അന്വേഷണത്തിന്‍റെ വേഗത പോരെന്നും കമ്മീഷന്‍ അദ്ധ്യക്ഷ രേഖാ ശര്‍മ്മ വ്യക്തമാക്കി.

കുമ്പസാരരഹസ്യം പുറത്തുവിടുമെന്ന് ഭീഷണിപ്പെടുത്തി വീട്ടമ്മയെ അഞ്ച് ഓര്‍ത്തഡോക്സ് വൈദികര്‍ ബലാത്സംഗം ചെയ്തതിനെ തുടര്‍ന്നുള്ള കേസ് നടന്നുകൊണ്ടിരിക്കുകയാണ്. പ്രതികളിലൊരാളായ വൈദികൻ ജോബ് മാത്യുവിനു ഹൈക്കോടതി ഇന്നലെ ജാമ്യം അനുവദിച്ചിരുന്നു. ജലന്ധര്‍ ബിഷപ്പിനെതിരെ കന്യാസ്ത്രീ  ബലാത്സംഗ കേസ് നല്‍കിയതും ഈയടുത്താണ്.