കോഴിക്കോട്ടെ സ്കൂളുകൾ ചൊവ്വാഴ്ച തുറക്കും; ജൂലൈ പകുതി വരെ ജാ​ഗ്രത തുടരും

നിപ ഭീതിയെ തുടർന്ന് നിശ്ചലമായിരുന്ന കോഴിക്കോട് ന​ഗരവും പതുക്കെ സാധാരണനിലയിലേക്ക്

കോഴിക്കോട്: പരിശോധനാഫലങ്ങൾ തുടർച്ചയായി നെ​ഗറ്റീവാക്കുകയും നിപ ലക്ഷണങ്ങളോടെ ചികിത്സയിൽ കഴിഞ്ഞിരുന്ന ആർക്കും രോ​ഗമില്ലെന്ന് വ്യക്തമാക്കുകയും ചെയ്ത സാഹചര്യത്തിൽ കോഴിക്കോട് ജില്ലയിൽ ഏർപ്പെടുത്തിയിരുന്ന കർശന നിയന്ത്രങ്ങൾ ജില്ലാ ഭരണകൂടം പിൻവലിക്കുന്നു. 

നിപ അവസാനം റിപ്പോര്‍ട്ട് ചെയ്തതിനു ശേഷം തുടര്‍ച്ചയായി 42 ദിവസം പരിസരപ്രദേശങ്ങളിലൊന്നും രോഗം ഉണ്ടായിട്ടില്ലെങ്കില്‍ നിപ ഭീഷണി ഒഴിഞ്ഞതായി പ്രഖ്യാപിക്കാം. കോഴിക്കോട്ട് മെയ് 30-നായിരുന്നു നിപ ബാധിച്ച് ഒടുവില്‍ മരണമുണ്ടായത്. ഈ കണക്കനുസരിച്ചാണ് ജൂലൈ രണ്ടാം വാരം വരെ ജാഗ്രത തുടരാൻ ആരോ​ഗ്യവകുപ്പ് തീരുമാനിച്ചത്. 

വെളളിയാഴ്ച നിപ ലക്ഷണങ്ങളുമായി ആരും ആശുപത്രികളിലെത്താതിരുന്ന സാഹചര്യത്തിൽ ഇനി കടുത്ത നിയന്ത്രണങ്ങളൊന്നും വേണ്ടതില്ലെന്നാണ് ആരോ​ഗ്യവകുപ്പിന്റെ വിലയിരുത്തൽ. നിപ ഭീതിയെ തുടർന്ന് നിശ്ചലമായിരുന്ന കോഴിക്കോട് ന​ഗരവും പതുക്കെ സാധാരണനിലയിലേക്ക് വന്നു കൊണ്ടിരിക്കുകയാണ്. 

നിപ ബാധിച്ച് ചികിത്സയിലായിരുന്ന രണ്ടു പേരെ എന്ന് ഡിസ്ചാര്‍ജ്ജ് ചെയ്യുമെന്ന കാര്യത്തില്‍ ആരോഗ്യവകുപ്പ് തീരുമാനമെടുത്തിട്ടില്ല. ഇവരുടെ രോ​ഗം പൂർണമായും ഭേദമായെന്ന് പരിശോധനകളിൽ തെളിഞ്ഞിരുന്നു. നിലവിൽ ഇരുവർക്കും  ആരോ​ഗ്യപ്രശ്നങ്ങൾ ഒന്നുമില്ല. അതിനിടെ നിപ സംബന്ധിച്ച് വ്യാജ സന്ദേശം പ്രചരിപ്പിച്ച ഒരാളെക്കൂടി പൊലീസ് അറസ്റ്റ് ചെയ്തു. ഇതോടെ അറസ്റ്റിലായവരുടെ എണ്ണം 23ആയി.