പഞ്ചാബ് നാഷണല്‍ ബാങ്കിന്‍റെ സീല്‍ ചെയ്ത ശാഖ തുറന്നു

മുംബൈ: കോടികള്‍ വായ്പയെടുത്ത് പറ്റിച്ച് രത്ന വ്യാപാരി നീരവ് മോദി വിദേശത്തേക്ക് കടന്നുകളഞ്ഞ സംഭവത്തില്‍ സീല്‍ ചെയ്ത പിഎന്‍ബി ശാഖ വീണ്ടും തുറന്നു. ആരോപണവിധേയമായ മുംബൈ പിഎൻബി ബ്രാഡി ഹൗസ് ശാഖയാണ് തുറന്നത്. നേരത്തേ  സിബിഐ ബാങ്ക് ശാഖ സീൽ ചെയ്തിരുന്നു. അന്വേഷണവുമായി ബന്ധപ്പെട്ട റെയ്ഡിനു ശേഷമാണ് ശാഖ സീൽ ചെയ്തിരുന്നത്. 

അതേസമയം ബാങ്കിങ് തട്ടിപ്പുകള്‍ വര്‍ധിച്ചു വരുന്ന സാഹചര്യത്തില്‍ പൊതുമേഖലാ ബാങ്കുകളില്‍ ഒരിടത്ത് മൂന്ന് വർഷം പൂർത്തിയാക്കിയ എല്ലാ ഉദ്യാഗസ്ഥരെയും സ്ഥലംമാറ്റാൻ കേന്ദ്ര വിജിലന്‍സ് കമ്മീഷന്‍ ഉത്തരവിട്ടു. അഞ്ച് വർഷം പൂർത്തിയാക്കിയ ക്ലറിക്കൽ ജീവനക്കാരെ സ്ഥലം മാറ്റാനും നിർദ്ദേശമുണ്ട്. തുടര്‍ച്ചയായി ബാങ്ക് വായ്പാ തട്ടിപ്പുകള്‍ നടക്കുന്നത് ഉദ്യോഗസ്ഥരുടെ സഹായത്തോടെയാണ് എന്ന കണ്ടെത്തലാണ് കമ്മീഷന്‍ ഉത്തരവിന് കാരണം..