പശുക്കളെ കൊണ്ട് പൊറുതിമുട്ടി, കര്‍ഷകര്‍ ഇടഞ്ഞു; 'യുപിയിലെ സ്കൂളില്‍ കുട്ടികള്‍ പുറത്തും പശുക്കള്‍ അകത്തുമായി'

തെരുവിൽ അലഞ്ഞു നടന്ന നൂറിലധികം കന്നുകാലികളെയാണ് ഈ സ്കൂളിനുള്ളിൽ കർഷകർ കൊണ്ടുവന്ന് കെട്ടിയിരിക്കുന്നത്. താൻ സ്കൂളിലെത്തിയപ്പോൾ ക്ലാസ്മുറിക്കുള്ളിൽ കന്നുകാലികളും കുട്ടികളെല്ലാം ​ഗേറ്റിന് പുറത്തും ഇരിക്കുന്ന കാഴ്ചയാണ് കണ്ടെതെന്ന് സ്കൂൾ പ്രിൻസിപ്പൽ കമലേഷ് സിം​ഗ് പറയുന്നു.

ഉത്തർപ്രദേശ്: പ്രയാ​​ഗ് രാജ് ജില്ലയിലെ ഭഡിവാർ ​ഗ്രാമത്തിലെ പ്രൈമറി സ്കൂളില്‍ കന്നുകാലികളെ കെട്ടിയിട്ട് കര്‍ഷകര്‍. തെരുവില്‍ അലയുന്ന കന്നുകാലികളെക്കൊണ്ട് പൊറുതിമുട്ടിയാണ് ഇങ്ങനെ ചെയ്യേണ്ടി വന്നതെന്ന് ഇവര്‍ പറയുന്നു. അകത്തിരുന്ന് പഠിക്കേണ്ട കുട്ടികള്‍ ഗേറ്റിന് പുറത്തിരുന്നാണ് പഠിക്കുന്നത്. തെരുവിൽ അലഞ്ഞു നടന്ന നൂറിലധികം കന്നുകാലികളെയാണ് ഈ സ്കൂളിനുള്ളിൽ കർഷകർ കൊണ്ടുവന്ന് കെട്ടിയിരിക്കുന്നത്. താൻ സ്കൂളിലെത്തിയപ്പോൾ ക്ലാസ്മുറിക്കുള്ളിൽ കന്നുകാലികളും കുട്ടികളെല്ലാം ​ഗേറ്റിന് പുറത്തും ഇരിക്കുന്ന കാഴ്ചയാണ് കണ്ടെതെന്ന് സ്കൂൾ പ്രിൻസിപ്പൽ കമലേഷ് സിം​ഗ് പറയുന്നു.

സ്കൂൾ ​ഗേറ്റ് പൂട്ടി അതിന് പുറത്ത് വടികളുമായി ക്ഷുഭിതരായ ​ഗ്രാമീണ കർഷകർ കാവലിരിക്കുകയാണെന്നും കമലേഷ് കൂട്ടിച്ചേർക്കുന്നു. നാൽപതിലധികം കുട്ടികളാണ് പുറത്തുള്ളത്. ​ഗേറ്റ് തുറന്ന് അകത്ത് കടക്കാൻ ആരെയും അനുവദിക്കാതെയാണ് ​​ഗ്രാമീണർ പുറത്ത് കാവലിരിക്കുന്നത്. കഴിഞ്ഞ കുറച്ച് മാസങ്ങളായി ​ഗ്രാമീണരുടെ ഏക്കർ കണക്കിന് കാർഷിക വിളകളാണ് ഇവ തിന്നു നശിപ്പിച്ചത്. 

കന്നുകാലികളെക്കൊണ്ടുള്ള ശല്യം സഹിക്കാൻ കഴിയാത്ത അവസ്ഥയിലാണ് ഇവിടത്തെ പ്രദേശവാസികൾ. ഇവയ്ക്കെതിരെ പരാതി നൽകാനും കഴിയുന്നില്ല. കർഷകരാണ് ഇവയെക്കൊണ്ട് പൊറുതി മുട്ടിയിരിക്കുന്നത്. അതിനാൽ കന്നുകാലികളെ സ്കൂളിൽ കെട്ടിയിടാൻ തങ്ങൾ നിർബന്ധിതരാകുകയായിരുന്നു എന്നാണ് ​​ഗ്രാമീണരുടെ വാദം. 

സ്കൂളിന്റെ പ്രവർത്തനം തടസ്സപ്പെടുത്തിയതിന്റെ പേരിൽ ​​ഗ്രാമീണർക്കെതിരെ കേസെടുത്തതായി ജില്ലാ മജിസ്ട്രേറ്റ് വെളിപ്പെടുത്തി. ‌ജനുവരി 10 മുതൽ തെരുവിൽ അലഞ്ഞുനടക്കുന്ന കന്നുകാലികളെ ​ഗോ സംരക്ഷണ കേന്ദ്രങ്ങളിൽ എത്തിക്കാൻ മുഖ്യമന്ത്രി യോ​ഗി ആദിത്യനാഥ് പറഞ്ഞിട്ടുണ്ട്. ഇവ മൂലം കർഷകർക്ക് ബുദ്ധിമുട്ടുണ്ടാകുന്നില്ല എന്നുറപ്പ് വരുത്താൻ ജില്ലാ മജിസ്ട്രേറ്റുമാരെ ചുമതലപ്പെടുത്തുകയും ചെയ്തു.