'ഈ രാത്രി പോലെ ഇരുണ്ടതാണല്ലോ കത്തിന്റെ പകര്പ്പ്'; അര്ദ്ധരാത്രിയിലെ സുപ്രീംകോടതി വാദത്തില് നിന്ന്
Synopsis
ഇന്നലെ സുപ്രീംകോടതിയില് നടന്നത് അസാധാരണ നടപടികള് യെദ്യൂരിയപ്പയ്ക്കും ബിജെപിയ്ക്കും ആശങ്കകളുടെ മണിക്കൂറുകള് മാരത്തണ് വാദത്തിനൊടുവിലാണ് കോണ്ഗ്രസിന്റെ ആവശ്യം തള്ളി
ദില്ലി: കര്ണാടകം ഇനി ആര് ഭരിക്കും എന്ന കാര്യം സംബന്ധിച്ച് അസാധാരണ നടപടികളാണ് ഇന്നലെ രാത്രി സുപ്രീംകോടതിയില് നടന്നത്. ഗവര്ണറുടെ തീരുമാനം ചോദ്യം ചെയ്ത് കോണ്ഗ്രസ് സുപ്രീംകോടതിയിലെത്തിയതോടെ യെദ്യൂരിയപ്പയ്ക്കും ബിജെപിയ്ക്കും ആശങ്കകളുടെ മണിക്കൂറുകള്. ഇന്ത്യന് രാഷ്ട്രീയ ചരിത്രത്തില് ഇതാദ്യമായാണ് ഇത്രയും അനിശ്ചിത്വത്തിനൊടുവില് ഒരു സര്ക്കാര് അധികാരമേല്ക്കുന്നത്. അര്ധരാത്രിയില് സുപ്രീംകോടതി തുറന്ന് നടത്തിയ മാരത്തണ് വാദത്തിനൊടുവിലാണ് കോണ്ഗ്രസിന്റെ ആവശ്യം തള്ളുകയായിരുന്നു.
രാത്രി പതിനൊന്ന് മണിയോടെ കോണ്ഗ്രസ് നേതാക്കള് സുപ്രീംകോടതി ചീഫ് ജസ്റ്റിസിനെ കണ്ടതിന് പിന്നാലെയാണ് ജസ്റ്റിസ് എകെ സിക്രി അധ്യക്ഷനായ മൂന്നംഗബെഞ്ചിനെ കോണ്ഗ്രസിന്റെ ഹര്ജി പരിഗണിക്കാന് ചീഫ് ജസ്റ്റിസ് ചുമതലപ്പെടുത്തിയത്. പുലര്ച്ചെ 1.45ന് ആറാം നമ്പര് കോടതിയിലാണ് വാദം തുടങ്ങിയത്. കോണ്ഗ്രസ് നേതാവ് കൂടിയായ മുതിര്ന്ന അഭിഭാഷകന് അഭിഷേക് സിംഗ്വി കോണ്ഗ്രസിന് വേണ്ടി വാദിച്ചപ്പോള് അറ്റോര്ണി ജനറല് കെ.കെ.വേണുഗോപാല് കേന്ദ്രസര്ക്കാരിന് വേണ്ടിയും മുതിര്ന്ന അഭിഭാഷകന് മുകുള് റോത്തഗി ബിജെപിയ്ക്ക് വേണ്ടിയും അര്ധരാത്രിയില് കോടതിയിലെത്തി. മൂന്ന് മണിക്കൂറിലധികം നീണ്ട വാദങ്ങള്ക്കൊടുവിലലായിരുന്നു ബിജെപിക്ക് അനുകൂലമായ ഈ ഉത്തരവ് വന്നത്.
ഗവര്ണറുടെ തീരുമാനത്തെ ചോദ്യം ചെയ്തുള്ള കോണ്ഗ്രസിന്റെ ഹര്ജിയില് സുപ്രീംകോടതിയില് ശക്തമായ വാദമാണ് നടന്നത്. കോണ്ഗ്രസിനായി ഹാജരായ മനു അഭിഷേക് സിംഗ്വിയും ബിജെപി അഭിഭാഷകന് മുകുള് റോത്തകിയും കേന്ദ്ര സര്ക്കാരിനായി അറ്റോര്ണി ജനറല് കെ.കെ വേണുഗോപാലും ശക്തമായ വാദങ്ങള് നിരത്തി. കോണ്ഗ്രസിന് വേണ്ടി ഹാജരായ അഭിഷേക് സിംഗ്വിയാണ് കൂടുതല് സമയം വാദിച്ചത്. സിംഗ്വിയുടെ വാദം ഒന്നര മണിക്കുറോളം നീണ്ടുനിന്നു. ഗവര്ണറുടെ നടപടി ഭരണഘടനാവിരുദ്ധമാണെന്നായിരുന്നു സിംഗ്വിയുടെ പ്രധാന വാദം. മണിക്കൂറുകള് നീണ്ട വാദത്തിനൊടുവില് പുലര്ച്ചെ അഞ്ചരയോടെയാണ് സത്യപ്രതിജ്ഞ ചടങ്ങ് സ്റ്റേ ചെയ്യാനോ ഗവര്ണറുടെ നടപടി റദ്ദാക്കാനോ തയ്യാറാവില്ലെന്ന് വ്യക്തമാക്കി സുപ്രീംകോടതി നടപടികള് അടുത്ത ദിവസത്തേയ്ക്ക് മാറ്റിവച്ചത്.
ഗവര്ണറുടെ നടപടി ഭരണഘടനാവിരുദ്ധമാണെന്നും സര്ക്കാര് രൂപീകരിക്കാന് കോണ്ഗ്രസിനെയും ജെഡിഎസിനെയും ക്ഷണിക്കണമെന്നായിരുന്നു മനു അഭിഷേക് സിംഗ്വിയുടെ ആദ്യ വാദം. സുപ്രീംകോടതി ഗവര്ണറുടെ തീരുമാനം തിരുത്തണം. ഗവര്ണറുടെ നടപടി സംശയകരമാണ്. അതിനാല് യെദ്യൂരപ്പയുടെ സത്യപ്രതിജ്ഞ മരവിപ്പിക്കണമെന്നും മനു അഭിഷേക് സിംഗ്വി സുപ്രീംകോടതിയില് തുടക്കത്തില് വാദിച്ചു.
പിന്നാലെ സര്ക്കാരിയ കമ്മീഷന് റിപ്പോര്ട്ട് സിംഗ്വി കോടതിയില് ഉദ്ധരിച്ചു. സര്ക്കാര് രൂപീകരിക്കാന് ക്ഷണിക്കേണ്ടത് കേവലഭൂരിപക്ഷമുള്ള പാര്ട്ടിയേയോ സഖ്യത്തേയോ. അവസാനമേ ഏറ്റവും വലിയ പാര്ട്ടിക്ക് അവസരം നല്കാവൂ. ഏഴ് ദിവസം ചോദിച്ച യദ്യൂരപ്പയ്ക്ക് ഭൂരിപക്ഷം തെളിയിക്കാന് എന്തിന് 15 ദിവസം നല്കി. 48 മണിക്കൂറാണ് മറ്റ് പല സംസ്ഥാനങ്ങള്ക്കും നല്കിയത്. ഗവര്ണര്ക്ക് തോന്നിയവരെയല്ല സര്ക്കാര് ഉണ്ടാക്കാന് ക്ഷണിക്കേണ്ടതെന്നും മനു അഭിഷേക് സിംഗ്വി കോടതിയില് വാദിച്ചു.
ഗോവ കേസിലെ വിധി സിംഗ്വി കോടതിയില് പരാമര്ശിക്കുകയും ചെയ്തു. ഗോവയിലെ വലിയ കക്ഷിയായിട്ടും ഗവര്ണര് കോണ്ഗ്രസിനെ സര്ക്കാരുണ്ടാക്കാന് ക്ഷണിച്ചില്ല. എന്നാല് വാദത്തില് കോടതി കൂടുതല് ചോദ്യങ്ങള് ഉന്നയിച്ചതോടെ മനു അഭിഷേക് സിംഗ്വി മറ്റൊരു വാദം ഉന്നയിച്ചു. ഗവര്ണറുടെ തീരുമാനത്തില് ഇടപെടാന് കോടതിക്ക് സാധിക്കും. എന്നാല് അങ്ങനെ ഇടപെടാനുള്ള തെളിവുകളെവിടെ എന്നായിരുന്നു കോടതിക്ക് അറിയേണ്ടിയിരുന്നത്. യെദ്യൂരപ്പയുടെ കത്ത് കാണാതെ ഭൂരിപക്ഷത്തിനുള്ള പിന്തുണയില്ലെന്ന് എങ്ങനെ പറയും. അതിനാല് ഗവര്ണറെ തടയാന് എങ്ങനെ കഴിയുമെന്നും കോടതി ചോദിച്ചു. എന്നാല് രാഷ്ട്രപതിയുടെ ഉത്തരവ് പോലും സ്റ്റേ ചെയ്യാന് കഴിയുന്ന കോടതിക്ക് ഗവര്ണറുടെ ഉത്തരവ് എന്തുകൊണ്ട് വിലക്കിക്കൂടെയെന്ന് സിംഗ്വി വാദിച്ചു. ഗവര്ണറുടെ തീരുമാനത്തില് ഇടപെടാന് കോടതിക്ക് കഴിയുമെന്ന് ഉറച്ചുപറയുകയായിരുന്നു സിംഗ്വി.
പിന്നാലെ യെദ്യൂരപ്പയുടെ കത്തിന്റെ കോപ്പി കോടതിയില് സിംഗ്വി ഹാജരാക്കി. എന്നാല് ഈ രാത്രി പോലെ ഇരുണ്ടതാണല്ലോ കത്തിന്റെ പകര്പ്പ് എന്നായിരുന്നു കത്തില് കോടതിയുടെ പരാമര്ശം. കത്ത് ഹാജരാക്കിയെങ്കിലും കോടതിയെ വിശ്വാസത്തിലേടുക്കാന് സിംഗ്വിക്കായില്ല. ഇതോടെ ഗവര്ണറുടെ തീരുമാനം റദ്ദ് ചെയ്യണ്ട, രണ്ട് ദിവസത്തെ സാവധാനം നല്കാന് ആവശ്യപ്പെട്ടാണ് സിംഗ്വി വാദം അവസാനിപ്പിക്കുകയായിരുന്നു.
അതേസമയം ഗവര്ണറുടെ തീരുമാനം വിവേചനപരമല്ല, റദ്ദ് ചെയ്യാനുള്ള അധികാരം കോടതിക്കില്ലെന്നായിരുന്നു മുകുള് റോത്തകിന്റെ വാദം. ഗവര്ണറുടെ തീരുമാനത്തില് കോടതി ഇടപെടരുതെന്നാണ് കേന്ദ്ര സര്ക്കാര് സുപ്രീംകോടതിയില് വാദിക്കുന്നത്. ഒടുവില്, ബിജെപിക്ക് അനുകൂലമായ വിധി. നാളെ രാവിലെ 10.30ന് കോടതി ഹര്ജി പരിഗണിക്കുമ്പോള് ജസ്റ്റിസ് എ.കെ.സിക്രി അധ്യക്ഷനായ ബെഞ്ച് നടത്തുന്ന നിരീക്ഷണങ്ങളും പുറപ്പെടുവിക്കുന്ന ഉത്തരവുകളിലുമാണ് യെദ്യൂരിയപ്പയുടെ ഭാവി.
ഇന്ത്യയിലെയും ലോകമെമ്പാടുമുള്ള എല്ലാ Malayalam News അറിയാൻ എപ്പോഴും ഏഷ്യാനെറ്റ് ന്യൂസ് മലയാളം വാർത്തകൾ. Malayalam News Live എന്നിവയുടെ തത്സമയ അപ്ഡേറ്റുകളും ആഴത്തിലുള്ള വിശകലനവും സമഗ്രമായ റിപ്പോർട്ടിംഗും — എല്ലാം ഒരൊറ്റ സ്ഥലത്ത്. ഏത് സമയത്തും, എവിടെയും വിശ്വസനീയമായ വാർത്തകൾ ലഭിക്കാൻ Asianet News Malayalam