തിരുവോണം ബമ്പറിൽ അവകാശവാദവുമായി തമിഴ്നാട് സ്വദേശി, ടിക്കറ്റിന്റെ ഫോട്ടോയുണ്ടെന്ന് വാദം, എത്തിയത് പാലക്കാട് എസ്പി ഓഫീസിൽ

യഥാർത്ഥ ടിക്കറ്റ് നഷ്ടപ്പെട്ടുപോയെന്നും മൊബൈൽ ഫോണിൽ ഫോട്ടോ ഉണ്ടെന്നുമാണ് ഇയാൾ അവകാശപ്പെടുന്നത്.

പാലക്കാട്: തിരുവോണം ബമ്പറിന്റെ യഥാർത്ഥ ഭാ​ഗ്യശാലി താനാണെന്ന് അവകാശപ്പെട്ട് തമിഴ്നാട് സ്വദേശി. പാലക്കാട് എസ്പി ഓഫീസിലാണ് സാദിഖ് എന്നയാൾ എത്തിയത്. യഥാർത്ഥ ടിക്കറ്റ് നഷ്ടപ്പെട്ടുപോയെന്നും മൊബൈൽ ഫോണിൽ ഫോട്ടോ ഉണ്ടെന്നുമാണ് ഇയാൾ അവകാശപ്പെടുന്നത്. റ്റിഎൽ 360615 എന്ന ടിക്കറ്റിനാണ് ഇത്തവണത്തെ തിരുവോണം ബമ്പര്‍ ലഭിച്ചത്. കണ്ണൂര്‍ ജില്ലയിലെ തളിപ്പറമ്പ് വിറ്റ ടിക്കറ്റിനാണ് സമ്മാനമെന്നാണ് ലഭിച്ച വിവരം. ഭാഗ്യശാലി ലോട്ടറി വകുപ്പിനെ സമീപിച്ച് പണം കൈപ്പറ്റുകയും ചെയ്തതായി സ്ഥിരീകരണമുണ്ട്. അതിനിടിയിലാണ് ട്വിസ്റ്റ് സംഭവിച്ചിരിക്കുന്നത്. തമിഴ്നാട് സ്വദേശിയായ സാദിഖ് എന്നയാളാണ് പാലക്കാട് എസ് പി ഓഫീസിനെ സമീപിച്ചിരിക്കുന്നത്. പാലക്കാട് റെയിൽവേ സ്റ്റേഷനിൽ നിന്ന് എടുത്തെന്നും താനാണ് ശരിക്കുള്ള ഭാഗ്യശാലി എന്നുമാണ് ഇയാളുടെ അവകാശവാദം.