സൈന്യത്തിന് അഭിനന്ദനപ്രവാഹം; വൈറലായി ആ ചിത്രം

ശ്രീനഗര്‍: ശ്രീനഗറില്‍ നിന്നും സിആര്‍പിഎഫ് സേന ട്വിറ്റര്‍വഴി പങ്കുവച്ച ചിത്രം സോഷ്യല്‍മീഡിയയില്‍ വൈറലാകുന്നു. മുസ്ലിം സൈനികന്‍ പ്രാര്‍ത്ഥന നിര്‍വഹിക്കുമ്പോള്‍ തോക്കുമേന്തി കാവല്‍ നില്‍ക്കുന്ന മറ്റൊരു സൈനികന്റെ ചിത്രങ്ങളാണ് സേന പുറത്തുവിട്ടത്.  ചിത്രം പുറത്തുവിട്ടതോടെ നിരവധി പേരാണ് സേനയെ അഭിനന്ദിച്ച് രംഗത്തെത്തിയത്. 

ഇതാണ് യഥാര്‍ത്ഥ ഇന്ത്യയെന്ന് മിക്കവരും അഭിപ്രായപ്പെട്ടു. ഇന്ത്യയുടെ ഒത്തൊരുമ വിളിച്ചോതുന്നതാണ് ചിത്രമെന്നും കമന്റുകള്‍ നിറഞ്ഞു. അമേരിക്കന്‍ സ്റ്റേറ്റ് ഡിപ്പാര്‍ട്ട്മെന്റിന്റെ ഭീകരവാദവിരുദ്ധ റിപ്പോര്‍ട്ട് പ്രകാരം ഇന്ത്യയില്‍ ഏറ്റവും കൂടുതല്‍ കലുഷിതമായ പ്രദേശം  കശ്മീരാണ്. 2016ല്‍ 93 ശതമാനം ആക്രമണമാണ് കശ്മീരില്‍ വര്‍ദ്ധിച്ചത്. 

ഇന്ത്യയില്‍ 2016ല്‍ നടന്ന ഭീകരാക്രമണങ്ങളില്‍ 19 ശതമാനവും നടന്നത് കശ്മീരിലാണ്.  സിആര്‍പിഎഫ് ജവാന്മാര്‍ക്ക് നേരെ നിരന്തരം ഭീകരാക്രമണങ്ങള്‍ ഉണ്ടാവുന്നുണ്ട്. മിക്കപ്പോഴും സൈന്യത്തിന്റെ വാഹനവ്യൂഹത്തിന് നേരെയാണ് ആക്രമണങ്ങള്‍ ഉണ്ടാവുന്നത്.