പാലക്കാട്: അട്ടപ്പാടിയില് ആദിവാസി യുവാവിനെ മര്ദ്ദിച്ച് കൊലപ്പെടുത്തിയ സംഭവത്തില് രണ്ട് പേരെ അറസ്റ്റ് ചെയ്തു. അഞ്ച് പേര് ഇപ്പോഴും പൊലീസ്കസ്റ്റഡിയിലാണ്. രാവിലെ പിടികൂടിയ ഏഴ് പേരില് രണ്ട് പേരുടെ അറസ്റ്റ് ഉച്ചയോടെ രേഖപ്പെടുത്തുകയായിരുന്നു. പ്രതികള്ക്കെതിരെ കൊലക്കുറ്റത്തിന് കേസ് രജിസ്റ്റര് ചെയ്തിട്ടുണ്ട്. ഹുസൈൻ, അബ്ദുൾ കരീം, ഉബൈദ് എന്നിവരാണ് കസ്റ്റഡിയിലുള്ള മൂന്ന് പേർ. എൻ.ഷംസുദ്ദീൻ എംഎൽഎയുടെ സഹായിയാണ് ഉബൈദ്. മധുവിനെ കാട്ടില് കയറി പിടിച്ചുകൊണ്ടുവന്നവരില് ഇയാളും ഉള്പ്പെട്ടിട്ടുണ്ടെന്ന് പൊലീസ് പറഞ്ഞു. സംഭവത്തില് മനുഷ്യാവകാശ കമ്മീഷനും എസ്സി-എസ്ടി കമ്മീഷനും കേസെടുത്തു.
അഗളിയിലെ പ്രാഥമികാരോഗ്യ കേന്ദ്രത്തില് സൂക്ഷിച്ചിരുന്ന മധുവിന്റെ മൃതദേഹം ഇന്ക്വസ്റ്റ് നടപടികള് പൂര്ത്തിയാക്കി പോസ്റ്റ്മോര്ട്ടം ചെയ്യാനായി തൃശ്ശൂര് മെഡിക്കല് കോളേജ് ആശുപത്രിയിലേക്ക് കൊണ്ടുപോയി. പ്രതികളെ പിടികൂടാതെ മൃതദേഹം കൊണ്ടുപോകാന് അനുവദിക്കില്ലെന്ന് നാട്ടുകാര് നിലപാടെടുത്തെങ്കിലും പൊലീസ് ഇടപെട്ട് ഇവരെ അനുനയിപ്പിക്കുകയായിരുന്നു. അതേസമയം നാട്ടുകാരാണ് മധുവിനെ മര്ദ്ദിച്ച് കൊന്നതെന്ന് രാവിലെ മധുവിന്റെ അമ്മ പറഞ്ഞു. സ്ഥലത്തെ ഡ്രൈവര്മാര് ഉള്പ്പെടെയുള്ളവരാണ് ഇത് ചെയ്തതെന്നും അമ്മ മല്ലി ഏഷ്യാനെറ്റ് ന്യൂസിനോട് പറഞ്ഞു. സംഭവത്തില് അതിശക്തമായ നടപടിയെടുക്കുമെന്ന് മന്ത്രി എ.കെ ബാലന് തിരുവനന്തപുരത്ത് അറിയിച്ചു. ഇത്തരം സംഭവങ്ങള് ഇനി ആവര്ത്തിക്കാത്ത തരത്തിലുള്ള നടപടികള് ഉണ്ടാകുമെന്നും മന്ത്രി പറഞ്ഞു.
ആദിവാസി യുവാവ് മരിച്ച സംഭവം അത്യന്തം അപലപനീയമാണെന്ന് മുഖ്യമന്ത്രി പിണറായി വിജയന് ഫേസ്ബുക്ക് പോസ്റ്റില് പറഞ്ഞു. കര്ശന നടപടിയെടുക്കണമെന്ന് ഡി.ജി.പിക്ക് നിര്ദ്ദേശം നല്കിയിട്ടുണ്ടെന്നും ഇത്തരം സംഭവങ്ങള് പരിഷ്കൃത സമൂഹത്തിന് യോജിച്ചതല്ലെന്നും അദ്ദേഹം പറഞ്ഞു. തൃശ്ശൂര് റേഞ്ച് ഐ.ജിക്ക് അന്വേഷണ ചുമതല നല്കിയിട്ടുണ്ടെന്ന് ഡി.ജി.പി ലോക്നാഥ് ബെഹ്റ അറിയിച്ചു. തൃശ്ശൂര് റേഞ്ച് ഐ.ജി എം.ആര് അജിത് കുമാര് അട്ടപ്പാടിയിലേക്ക് തിരിച്ചിട്ടുണ്ട്.
ഇന്നലെ വൈകുന്നേരമാണ് കടുകുമണ്ണ ആദിവാസി ഊരിലെ മധുവിനെ നാട്ടുകാര് കടകളില് നിന്ന് സാധനങ്ങള് മോഷ്ടിക്കുന്നുവെന്ന് ആരോപിച്ച് മര്ദ്ദിച്ചത്. മാനസികസ്വാസ്ഥ്യമുള്ള മധു ഏറെക്കാലമായി ഊരിന് പുറത്താണ് താമസിച്ചിരുന്നത്. കാട്ടിനുള്ളില് നിന്ന് പിടികൂടിയ മധുവിനെ അവിടെ വെച്ചു തന്നെ മര്ദ്ദിച്ചു. ഉടുത്തിരുന്ന കൈലി മുണ്ട് അഴിച്ച് കൈയ്യില് കെട്ടിയ ശേഷമായിരുന്നു നാട്ടുകാരുടെ ക്രൂരത. പിന്നീട് മുക്കാലിയില് കൊണ്ടുവരികയും ഇയാള് മോഷ്ടിച്ചതെന്ന് പറയുന്ന അരിയും മഞ്ഞള് പൊടിയും പോലുള്ള സാധനങ്ങള് എടുത്തുകൊണ്ടുവരികയും ചെയ്തു. നാട്ടുകാര് ഏറെ നേരം മര്ദ്ദിച്ച ശേഷമാണ് ഇയാളെ പൊലീസിന് കൈമാറിയത്. പൊലീസ് എത്തി വാഹനത്തില് കയറ്റിയപ്പോഴേക്കും മധു ഛര്ദ്ദിച്ചു. പിന്നീട് ആശുപത്രിയില് എത്തിച്ചെങ്കിലും ജീവന് രക്ഷിക്കാനായില്ല.