രണ്ടുവയസുകാരിയെ പീഡിപ്പിച്ച്​ കൊലപ്പെടുത്തി; രണ്ടാനച്​ഛനെ പൊലീസ്​ തിരയുന്നു

ഫരീദാബാദ്: രണ്ട്​ വയസുകാരിയെ ബലാത്സംഗം ചെയ്​ത്​ കൊലപ്പെടുത്തിയ കേസിൽ  രണ്ടാനച്​ഛ​നെ  പൊലീസ്​ തിരയുന്നു. ഫരീദാബാദിലെ സരൈ ഖാജ മേഖലയിലാണ്​ സംഭവം. ഇയാൾക്കെതിരെ പൊലീസ്​ കേസെടുത്തിട്ടുണ്ട്​. കഴിഞ്ഞ 22നാണ്​ സംഭവം. മൂന്ന്​ കുട്ടികളുടെ അമ്മയായ സ്​ത്രീയെ ആണ്​ രവിഗുപ്​ത എന്നയാൾ വിവാഹം ചെയ്​തിരുന്നത്​. മറ്റ്​ വീടുകളിൽ ജോലിക്ക്​ പോയാണ്​ സ്​ത്രീ ജീവിക്കുന്നത്​. രണ്ട്​, നാല്​ വയസുള്ള പെൺകുട്ടികളും എട്ട്​ വയസുള്ള ആൺകുട്ടിയുമാണ്​ ഇവർക്കുള്ളത്​. 

ഇവരുടെ ആദ്യഭർത്താവ്​ മരിച്ചതിനെ തുടർന്നാണ്​ ഒന്നരവർഷം മുമ്പ്​ രവി ഗുപ്​തയെ വിവാഹം ചെയ്​തത്​.  രണ്ട്​ പെൺകുട്ടികളെയും അവരുടെ വാടകവീട്ടിൽ രണ്ടാനച്​ഛനെ  ഏൽപ്പിച്ചാണ്​ സ്​ത്രീ വീട്ടുജോലിക്ക്​ പോയിരുന്നത്​. മകൻ ഇൗ സമയം വീട്ടിൽ ഇല്ലായിരുന്നു.  സ്​ത്രീ ജോലിയിലായിരിക്കെ രവിഗുപ്​ത പലതവണ ഫോണിൽ വിളിച്ച്​ രണ്ട്​ വയസുകാരി പെൺകുട്ടിക്ക്​ സുഖമില്ലെന്ന്​ അറിയിച്ചു. സ്​ത്രീ വീട്ടിലെത്തിയപ്പോൾ പെൺകുട്ടി അബോധാവസ്​ഥയിൽ ആയിരുന്നു. ഉടൻ തന്നെ ദില്ലിയിലെ ആശുപത്രിയിൽ എത്തിക്കുകയും മരിച്ചതായി ഡോക്​ടർമാർ സ്​ഥിരീകരിക്കുകയും ചെയ്​തു. 

കുട്ടി ലൈംഗിക പീഡനത്തിന്​ ഇരയായതായും ഡോക്​ടർമാർ അമ്മയെ അറിയിച്ചു.  അമ്മയുടെ പരാതിയിലാണ്​ പൊലീസ്​ കേസെടുത്തത്​. അസ്വാഭാവിക മരണം റിപ്പോർട്ട്​ ചെയ്യപ്പെട്ടതിനെ തുടർന്ന്​ ദില്ലി പൊലീസ്​ കലാവതി ആശുപത്രിയിൽ എത്തുകയും പോസ്​റ്റ്​മോർട്ടം, ഫോറൻസിക്​ പരിശോധനകൾ നടത്തുകയും ചെയ്​തു.  കുട്ടിയുടെ മരണം പൊലീസിൽ അറിയിച്ചതോടെ ആദ്യഘട്ടത്തിൽ ആശുപത്രിയിൽ ഉണ്ടായിരുന്ന രണ്ടാനച്​ഛൻ പിന്നീട്​ അവിടെ നിന്ന്​ രക്ഷപ്പെട്ടതായി പൊലീസ്​ പറഞ്ഞു. 

രണ്ടാനച്​ഛനെ കേന്ദ്രീകരിച്ചാണ്​ അന്വേഷണം നടക്കുന്നതെന്നും അയാളെ പിടികൂടി ചോദ്യം ചെയ്​താൽ മാത്രമേ കേസിൽ കൂടുതൽ വ്യക്​തത ലഭിക്കൂ എന്നും പൊലീസ്​ പറഞ്ഞു. കുട്ടിയുടെ മൃതദേഹം പോസ്​റ്റ്​മോർട്ടത്തിന്​ ശേഷം ബന്ധുക്കൾക്ക്​ വിട്ടുനൽകി. ​ഐ.പി.സി, പോക്​സോ വകുപ്പുകൾ പ്രകാരമാണ്​ കേസെടുത്തത്​.