പ്രവാസ ലോകത്ത് നിന്നും സന്തോഷ വാർത്ത; സന്ദർശകരായെത്തുന്ന കുട്ടികൾക്ക് വിസാ ഫീസിൽ ഇളവ്

18 വയസിൽ താഴെയുള്ളവർക്കാകും ഇളവ് ലഭിക്കുക

ദുബൈ: യു എ ഇ യിൽ നിന്നാണ് പ്രവാസികൾക്ക് സന്തോഷ വാർത്ത. രാജ്യം സന്ദർശിക്കാനെത്തുന്ന വിദേശികളുടെ കുട്ടികളുടെ വിസ ഫീസിനത്തിൽ ഇളവ് വരുത്താൻ തീരുമാനിച്ചു. യുഎഇ മന്ത്രിസഭയുടെതാണ് തീരുമാനം.

വർഷത്തിൽ ജൂലൈ 15 മുതൽ സെപ്തംബർ 15 വരെയുള്ള കാലയളവിലായിരിക്കും ഇളവ് ലഭിക്കുകയെന്ന് യു എ ഇ ഭരണകൂടം അറിയിച്ചിട്ടുണ്ട്. 18 വയസിൽ താഴെയുള്ളവർക്കാകും ഇളവ് ലഭിക്കുക. സന്ദർശക വിസയിൽ മാതാപിതാക്കൾക്കൊപ്പം കുട്ടികൾക്കും ഗൾഫിലെത്താനുള്ള അവസരം വർധിക്കുമെന്നാണ് പ്രതീക്ഷിക്കുന്നത്.

വിനോദ സഞ്ചാരം പരിപോഷിപ്പിക്കുന്നതിന്റെ ഭാഗമായാണ് ഇത്തരമൊരു നടപടി. ജൂലൈ മുതൽ സെപ്തംബർ വരെ വിനോദ സഞ്ചാര സീസണായാണ് അറിയപ്പെടുന്നത്.

ട്രാൻസിറ്റ് വിസയിൽ യുഎഇയിൽ എത്തുന്നവർക്ക് രണ്ട് ദിവസം വരെ ഫീസില്ലാതെ രാജ്യത്ത് തങ്ങാമെന്നും തീരുമാനിച്ചിട്ടുണ്ട്. 50 ദിർഹം അധികം നൽകിയാൽ രണ്ട് ദിവസം കൂടി യുഎഇ യിൽ തങ്ങാനും അവസരം ലഭിക്കും. ലോകത്തെ ഏറ്റവും വലിയ ടൂറിസ്റ്റ് കേന്ദ്രമാക്കി യു എ ഇയെ മാറ്റാൻ നടപടികൾ സഹായിക്കുമെന്നാണ് പ്രതീക്ഷിക്കപ്പെടുന്നത്.