ട്രാൻസ്പരൻസി ഇന്റർനാഷണലിന്റെ 2025-ലെ അഴിമതി സൂചികയിൽ 182 രാജ്യങ്ങളിൽ ഇന്ത്യ 91-ാം സ്ഥാനത്തെത്തി. 100-ൽ 39 എന്ന സ്കോറോടെ, പൊതുമേഖലയിലെ അഴിമതി രാജ്യത്ത് ഇപ്പോഴും ഗുരുതരമായ വെല്ലുവിളിയായി തുടരുന്നുവെന്നും റിപ്പോർട്ട് വ്യക്തമാക്കുന്നു.
ന്യൂഡൽഹി: കഴിഞ്ഞ വർഷത്തെ അഴിമതി സൂചികയിൽ 182 രാജ്യങ്ങളുടെ പട്ടികയിൽ ഇന്ത്യ 91-ാം സ്ഥാനത്ത്. ട്രാൻസ്പരൻസി ഇന്റർനാഷണൽ ചൊവ്വാഴ്ച പുറത്തിറക്കിയ 2025-ലെ റിപ്പോര്ട്ടിലാണ് ഇന്ത്യ 91-ാം സ്ഥാനത്ത് എത്തിയത്. 100-ൽ 39 എന്ന സ്കോറാണ് ഇന്ത്യക്ക് ലഭിച്ചത്. കഴിഞ്ഞ ഏതാനും വർഷങ്ങളായി ചെറിയ പുരോഗതികൾ പ്രകടമാണെങ്കിലും, പൊതുമേഖലയിലെ അഴിമതി ഇന്ത്യയിൽ ഇപ്പോഴും ഗൗരവകരമായ പ്രശ്നമായി തുടരുന്നുവെന്നാണ് ഈ റാങ്ക് സൂചിപ്പിക്കുന്നത്. വിദഗ്ധരുടെയും ബിസിനസ് പ്രമുഖരുടെയും വിലയിരുത്തലുകൾ അടിസ്ഥാനമാക്കിയാണ് പൊതുമേഖലയിലെ അഴിമതിയുടെ അളവ് ഈ സൂചിക അളക്കുന്നത്.
പൂജ്യം മുതൽ 100 വരെയുള്ള സ്കോറുകളിൽ, പൂജ്യം അഴിമതിയുടെ ഉയർന്ന തോതിനെയും 100 അഴിമതി തീരെയില്ലാത്ത സുതാര്യമായ പൊതുമേഖലയെയും സൂചിപ്പിക്കുന്നു. ഇന്ത്യയുടെ 39 എന്ന സ്കോർ വ്യക്തമാക്കുന്നത്, അഴിമതി എന്നത് ഒരു ഒറ്റപ്പെട്ട പ്രശ്നമല്ലെന്നും മറിച്ച് ഭരണസംവിധാനങ്ങളുടെയും സുതാര്യതയുടെയും ഇടയിൽ ആഴത്തിൽ വേരൂന്നിയ ഒന്നാണെന്നുമാണ്. മുൻ വർഷങ്ങളുമായി താരതമ്യം ചെയ്യുമ്പോൾ ഇന്ത്യയുടെ സ്ഥാനത്തിൽ വലിയ മാറ്റങ്ങൾ കാണുന്നില്ല.
ഭരണപരിഷ്കാരങ്ങളും ഡിജിറ്റലൈസേഷനും അഴിമതി തടയാൻ ഒരു പരിധിവരെ സഹായിച്ചിട്ടുണ്ടെങ്കിലും, ആഗോളതലത്തിൽ ഇന്ത്യയെക്കുറിച്ചുള്ള പൊതുധാരണയിൽ നിർണ്ണായകമായ ഒരു മാറ്റം കൊണ്ടുവരാൻ അവയ്ക്ക് സാധിച്ചിട്ടില്ല. ഉദ്യോഗസ്ഥതലത്തിലെ സുതാര്യതക്കുറവ്, രാഷ്ട്രീയ സ്വാധീനം, ദുർബലമായ മേൽനോട്ട സംവിധാനങ്ങൾ എന്നിവ വലിയ വെല്ലുവിളികളായി തുടരുന്നു. ലോകവ്യാപകമായി നോക്കിയാൽ, പല രാജ്യങ്ങളും അഴിമതി തടയുന്നതിൽ പരാജയപ്പെടുകയോ അല്ലെങ്കിൽ പുറകോട്ട് പോകുകയോ ചെയ്യുന്നതായാണ് 2025-ലെ സൂചിക കാണിക്കുന്നത്.
Related Articles
ഇന്ത്യക്ക് വലിയ തിരിച്ചടി
സാമ്പത്തിക വളർച്ചയ്ക്കും ജനാധിപത്യപരമായ ഉത്തരവാദിത്തത്തിനും അഴിമതി ഒരു വലിയ തടസമാണെന്ന് ട്രാൻസ്പരൻസി ഇന്റർനാഷണൽ മുന്നറിയിപ്പ് നൽകുന്നു. ഏഷ്യ-പസഫിക് മേഖലയിൽ ചില രാജ്യങ്ങൾ നേട്ടമുണ്ടാക്കിയപ്പോൾ മറ്റുചിലയിടങ്ങളിൽ ഭരണപരാജയങ്ങളും ജനരോഷവും ശക്തമാണ്. ഇന്ത്യയെ സംബന്ധിച്ചിടത്തോളം ഈ റാങ്ക് സാമ്പത്തികവും രാഷ്ട്രീയവുമായ പ്രത്യാഘാതങ്ങൾ ഉണ്ടാക്കുന്നതാണ്. വിദേശ നിക്ഷേപകരുടെ വിശ്വാസത്തെയും രാജ്യത്ത് ബിസിനസ് ചെയ്യുന്നതിനുള്ള എളുപ്പത്തെയും അഴിമതിയെക്കുറിച്ചുള്ള ഇത്തരം റിപ്പോർട്ടുകൾ ബാധിക്കും.
ആഗോള ശരാശരിക്കും താഴെയുള്ള സ്കോർ അന്താരാഷ്ട്ര വിപണിയിൽ ഇന്ത്യയുടെ പ്രതിച്ഛായയെയും ബാധിച്ചേക്കാം. ലോകത്തെ 182 രാജ്യങ്ങളുടെ പട്ടികയിൽ പാകിസ്ഥാൻ 136-ാം സ്ഥാനത്താണ്. 2024-ൽ 180 രാജ്യങ്ങളുടെ പട്ടികയിൽ 135-ാം സ്ഥാനത്തായിരുന്നു പാകിസ്ഥാൻ. കഴിഞ്ഞ വർഷത്തെ അപേക്ഷിച്ച് റാങ്കിംഗിൽ നേരിയ വ്യത്യാസം വന്നിട്ടുണ്ടെങ്കിലും അഴിമതി നിയന്ത്രിക്കുന്നതിൽ രാജ്യം വലിയ വെല്ലുവിളികൾ നേരിടുന്നുണ്ടെന്നാണ് ഇത് സൂചിപ്പിക്കുന്നത്.
