ശബരിമലയില്‍ പ്രത്യക്ഷ സമരത്തിനൊരുങ്ങി യുഡിഎഫ്

ശബരിമലയില്‍ പ്രത്യക്ഷ സമരത്തിനൊരുങ്ങി യുഡിഎഫ്. ശബരിമലയിലെ നിരോധനാജ്ഞ പിന്‍വലിക്കണമെന്ന് പ്രതിപക്ഷ നേതാവ് രമേശ് ചെന്നിത്തല . 

കൊച്ചി: ശബരിമലയില്‍ പ്രത്യക്ഷ സമരത്തിനിറങ്ങാന്‍ യുഡിഎഫ്. ഉമ്മന്‍ ചാണ്ടിയുടെയും രമേശ് ചെന്നിത്തലയുടെയും നേതൃത്വത്തില്‍ യുഡിഎഫ് പ്രവര്‍ത്തകര്‍ നാളെ നിരോധനാജ്ഞ ലംഘിച്ച് മല കയറും. ശബരിമലയിലെ നിരോധനാജ്ഞ പിന്‍വലിക്കണമെന്ന് പ്രതിപക്ഷ നേതാവ് രമേശ് ചെന്നിത്തല. യുഡിഎഫ് സംഘം നാളെ ശബരിമലയിലേക്ക് പോകും.  മുഖ്യമന്ത്രി ആഭ്യന്തര വകുപ്പ് ഒഴിയണമെന്നും ചെന്നിത്തല പറഞ്ഞു.

പൊലീസിന്‍റെ അതിക്രമങ്ങളെ യുഡിഎഫ് ശക്തമായി അപലപിക്കുന്നു. ആവശ്യമില്ലാത്ത നിയന്ത്രണങ്ങളാണ് ശബരിമലയില്‍ ഏര്‍പ്പെടുത്തിയിരിക്കുന്നത്. ശബരിമലയിലെ 144 പിൻവലിക്കണം. പൊലീസ് ഭക്തന്മാരോട് കുതിര കയറുകയാണ്. തീര്‍ത്ഥാടകര്‍ പോലും ഇപ്പോള്‍ വരാത്ത അവസ്ഥയാണ് ശബരിമലയില്‍.

ഭക്തര്‍ക്ക് ശബരിമലയില്‍ വരാന്‍ ഇപ്പോള്‍ പേടിയാണ്. പൊലീസിന്‍റെ ഈ തേർവാഴ്ച്ച മുഖ്യമന്ത്രിയുടെ നിര്‍ദ്ദേശ പ്രകാരമാണ്. പോലീസിനെ കയറൂരി വിട്ടിരിക്കുകയാണ്. മുഖ്യമന്ത്രി ആഭ്യന്തര വകുപ്പ് ഒഴിയണം. കേരളത്തിലെ മുഖ്യമന്ത്രി ഭക്ത ജനങ്ങളോട് യുദ്ധം പ്രക്യാപിക്കുകയാണ്. ഹൈക്കോടതി പരാമർശം സർക്കാരിന്‍റെ കണ്ണ് തുറപ്പിക്കണം എന്നും ചെന്നിത്തല കൂട്ടിച്ചേര്‍ത്തു.