ഹാഫിസ് സയീദിനെ അറസ്റ്റ് ചെയ്തില്ലെങ്കില്‍ പ്രത്യാഘാതം ഭീകരമായിരിക്കുമെന്ന് പാകിസ്​ഥാന്​ അമേരിക്കയുടെ മുന്നറിയിപ്പ്​

വാഷിംഗ്ടണ്‍: മുംബൈ ഭീകരാക്രമണത്തി​ന്‍റെ മുഖ്യസൂത്രധാരൻ ഹാഫിസ് സയീദിനെ അറസ്റ്റ്​  ചെയ്തില്ലെങ്കില്‍ കനത്ത പ്രത്യാഘാതമുണ്ടാക്കുമെന്ന്​ അമേരിക്കയുടെ മുന്നറിയിപ്പ്​. ഹാഫിസിനെതിരായ കുറ്റം നിലനിർത്തി നടപടി തുടർന്നില്ലെങ്കിൽ  ഇരുരാജ്യങ്ങളും തമ്മിലുള്ള ബന്ധത്തില്‍ ഉലച്ചിലുണ്ടായേക്കുമെന്നും വൈറ്റ്​ഹൗസ് മുന്നറിയിപ്പ് നല്‍കി​. 

 ഹാഫിസിനെ നിയമനടപടിക്ക്​ വിധേയമാക്കിയില്ലെങ്കിൽ അന്താരാഷ്​ട്ര ഭീകരവാദത്തെ ചെറുക്കുന്നതിൽ പാക്കിസ്​ഥാ​ന്‍റെ ആത്മാർഥതയെ ചോദ്യം ചെയ്യുന്നതായിരിക്കും. നടപടി ഭീകരവാദികൾക്ക്​ പാകിസ്​ഥാ​ൻ സ​ങ്കേതം ഒരുക്കുന്നില്ലെന്ന നിലപാടി വിരുദ്ധവുമാകുമെന്നും വൈറ്റ്​ ഹൗസ്​ പ്രസ്​താവനയിൽ വ്യക്​തമാക്കി. നിയമപ്രകാരം ഹാഫിസിനെതിരെ നടപടിയെടുത്തില്ലെങ്കിൽ ഉഭയകക്ഷി ബന്ധത്തിലും പാകിസ്​ഥാ​ന്‍റെ ആഗോള യശസിലും പ്രത്യാഘാതമുണ്ടാക്കും. 

മുംബൈ ഭീകരാക്രമണത്തി​ന്‍റെ ബുദ്ധി കേന്ദ്രമായ ഹാഫിസിനെ അറസ്​റ്റ്​ ചെയ്​ത്​ വീട്ടുതടങ്കിൽ ആക്കിയത്​ കഴിഞ്ഞ ജനുവവരിയിലാണ്​. കഴിഞ്ഞ ദിവസമാണ്​ പാക്​ കോടതി  ഇയാളെ മോചിപ്പിച്ചത്​. മോചനത്തിന്​ ശേഷം ഇന്ത്യക്കെതിരെ ഹാഫിസ്​ വിദ്വേഷ പ്രസംഗം നടത്തുകയുണ്ടായി. ഹാഫിസി​ന്‍റെ മോചനത്തിലൂടെ ഭീകരവാദികളെ കൈകാര്യം ചെയ്യുന്നത്​ ഗൗരവത്തോടെയല്ലെന്ന്​ പാകിസ്​ഥാൻ തെളിയിച്ചെന്ന്​ ഇന്ത്യ വ്യക്​തമാക്കിയിരുന്നു.