മകളുടെ പൊലീസ് യൂണിഫോമിലെ നക്ഷത്രമെണ്ണുന്ന അച്ഛന്‍; അഭിമാന നിമിഷം ഏറ്റെടുത്ത് ട്വിറ്റര്‍

മകളുടെ യൂണിഫോമിലെ നക്ഷത്രമെണ്ണുന്ന അച്ഛന്‍, അച്ഛന്‍റെ കണ്ണിലെ അഭിമാനത്തിന്‍റെ നക്ഷത്രത്തിളക്കം കണ്ടുനില്‍ക്കുന്ന മകള്‍...

ഇംഫാല്‍: പൊലീസുകാരിയായ മകളുടെ യൂണിഫോമിലെ നക്ഷത്രമെണ്ണുന്ന, കണ്ണില്‍ അഭിമാനം തുളുമ്പുന്ന അച്ഛന്‍റെ ചിത്രമാണ് ഇന്ന് ട്വിറ്ററില്‍ വൈറലാകുന്നത്. മണിപ്പൂരെ പൊലീസ് ഓഫീസറായ രത്തന ങാസെപ്പവും അച്ഛനുമാണ് ചിത്രത്തിലുള്ളത്. സ്ത്രീ ശാക്തീകരണത്തിന്‍റെ ഉദാഹരണമെന്നും രക്ഷിതാക്കളുടെ അഭിമാനത്തിന്‍റെ നിമിഷമെന്നുമെല്ലാം ട്വിറ്റര്‍ ഈ ചിത്രത്തെ വിശേഷിപ്പിക്കുന്നുണ്ട്. 

ഇംഫാലിലെ ഡെപ്യൂട്ടി സൂപ്രണ്ട് ഓഫ് പൊലീസ് ആണ് രത്തന. തന്‍റെ യൂണിഫോമിലെ നക്ഷത്രങ്ങള്‍ എണ്ണുന്ന അച്ഛനെ കണ്ട് അവള്‍ സന്തോഷത്തോടെ ചിരിക്കുന്നുമുണ്ട്. ഒരു വലിയ അധ്വാനത്തിന്‍റെ കഥ തന്നെ പറയുന്നുണ്ട് ഈ ചിത്രത്തിലൂടെ ഈ രണ്ട് മനുഷ്യരും. 

ഈ ചിത്രം കുറച്ച് മാസങ്ങള്‍ മുമ്പത്തേതാണെന്നും രത്തന ഇപ്പോള്‍ അഡീഷണല്‍ എസ് പി ആണെന്നും ഇന്ത്യന്‍ എക്സ്പ്രസ് റിപ്പോര്‍ട്ട് ചെയ്യുന്നു. അമിത് പഞ്ചല്‍ എന്ന ട്വിറ്റര്‍ ഉപയോക്താവ് പങ്കുവച്ച ചിത്രം രവീണ ടാണ്ടന്‍ അടക്കമുള്ള ബോളിവുഡ് താരങ്ങളും റീട്വീറ്റ് ചെയ്തിട്ടുണ്ട്.