സീറ്റ് ബെല്‍റ്റ് ധരിക്കാത്തതിന് ജാതിപ്പേര് വിളിച്ചു; യുവാവ് സ്വയം തീ കൊളുത്തി

ചെന്നൈ: സീറ്റ് ബെല്‍റ്റ് ധരിക്കാത്തതിന് പൊലീസ് ജാതിപ്പേര് വിളിച്ചതില്‍ പ്രതിഷേധിച്ച് യുവാവ് തീ കൊളുത്തി ആത്മഹത്യക്ക് ശ്രമിച്ചു. ഇരുപത്തൊന്ന് വയസുകാരനായ ടാക്സി ഡ്രൈവറായ മണികണ്ഠനാണ് ആത്മഹത്യയ്ക്ക് ശ്രമിച്ചത്. 

സീറ്റ് ബെല്‍റ്റ് ഉപയോഗിക്കാത്തതിന് ഫൈന്‍ അടച്ച ശേഷവും പൊലീസുകാര്‍ ചീത്ത വിളിച്ചുവെന്നും ജാതിപ്പേര് വിളിച്ച് ആക്ഷേപിച്ചെന്നും മണികണ്ഠന്‍ ആരോപിക്കുന്ന വീഡിയോ പുറത്ത് വന്നിരുന്നു. ഇരുമ്പ് ദണ്ഡ് ഉപയോഗിച്ച് പൊലീസുകാര്‍ മര്‍ദ്ദിച്ചെന്നു വീഡിയോയില്‍ ആരോപിക്കുന്നുണ്ട്. പൊലീസുകാരുടെ ആക്ഷേപം റെക്കോര്‍ഡ് ചെയ്യാന്‍ ശ്രമിച്ചതോടെ മണികണ്ഠന്റെ ലൈസന്‍സ് പൊലീസുകാര്‍ വാങ്ങിവച്ചെന്നും ആരോപണം ഉണ്ട്. 

പൊലീസുകാരുടെ അധിഷേപത്തെക്കുറിച്ച് പരാതിപ്പെടുന്ന വീഡിയോ മെസേജ് ചെയ്തതിന് പിന്നാലെയാണ് യുവാവ് തീ കൊളുത്തി ആത്മഹത്യയ്ക്ക് ശ്രമിച്ചത്. അറുപത് ശതമാനത്തിലേറെ പൊള്ളലേറ്റ യുവാവ് ചികിത്സയിലാണ്. ആരോപണ വിധേയരായ പൊലീസുരോട് ഡ്യൂട്ടിയില്‍ നിന്ന് മാറി നില്‍ക്കണമെന്ന് ആവശ്യപ്പെട്ടിട്ടുണ്ട്.