മേഴ്സികുട്ടന് സ്പോര്ട്സ് കൗൺസില് പ്രസിഡന്റാകും
Published : Mar 21, 2019, 11:32 AM IST
Synopsis
സിപിഎമ്മുമായി അടുപ്പം പുലര്ത്തുന്ന മേഴ്സി കുട്ടന്, വനിതാ മതിലില് പങ്കാളിയായിരുന്നു. കണ്ണൂരില് നിന്നുള്ള ഒ കെ ബിനീഷ് വൈസ് പ്രസിഡന്റാകുമെന്നാണ് സൂചന.
തിരുവനന്തപുരം: ഒളിമ്പ്യന് മേഴ്സികുട്ടന് സംസ്ഥാന സ്പോര്ട്സ് കൗൺസില് പ്രസിഡന്റാകും. കൗൺസില് തലപ്പത്ത് കായികതാരം വേണമെന്ന മന്ത്രി ഇ.പി.ജയരാജന്റെ നിലപാട്, സിപിഎം നേതൃത്വം അംഗീകരിച്ചു. അടുത്ത തിങ്കളാഴ്ചയാണ് തെരഞ്ഞെടുപ്പ്.
ടി പി ദാസന് പ്രസിഡന്റായ നിലവിലെ ഭരണസമിതിയിൽ മേഴ്സി കുട്ടന് വൈസ് പ്രസിഡന്റാണ്. സിപിഎമ്മുമായി അടുപ്പം പുലര്ത്തുന്ന മേഴ്സി കുട്ടന്, വനിതാ മതിലില് പങ്കാളിയായിരുന്നു. കണ്ണൂരില് നിന്നുള്ള ഒ കെ ബിനീഷ് വൈസ് പ്രസിഡന്റാകുമെന്നാണ് സൂചന.
മദ്യവ്യവസായിയും കേരള ഒളിംപിക് അസോസിയേഷന് പ്രസിഡന്റുമായ സുനില് കുമാര് , ഇന്ത്യന് ഫുട്ബോള് ടീം മുന് നായകന് ഐ എം വിജയന് എന്നിവരടക്കം ഒന്പതുപേര് പുതിയ ഭരണസമിതിയിലെത്തും. വൈസ് പ്രസിഡന്റ് തെരഞ്ഞെടുപ്പ് അടുത്ത മാസം ഒന്നിനും ഭരണസമിതി തെരഞ്ഞെടുപ്പ് എട്ടിനും നടക്കും.