കുവൈറ്റ് വിമാനത്താവളത്തിൽ 20 ഡിഫിബ്രിലേറ്ററുകൾ സ്ഥാപിച്ചു; ആരോഗ്യ സുരക്ഷ ഉറപ്പാക്കാൻ പദ്ധതി

വിമാനത്താവളത്തിലെ1, 4, 5 ടെർമിനലുകളിലും  ആരോഗ്യ കേന്ദ്രത്തിലും 20 എ.ഇ.ഡി. ഉപകരണങ്ങൾ സ്ഥാപിച്ചുകഴിഞ്ഞു.

കുവൈത്ത് സിറ്റി: കുവൈത്ത് അന്താരാഷ്ട്ര വിമാനത്താവളത്തിലെ ആരോഗ്യ സുരക്ഷാ സംവിധാനങ്ങൾ ശക്തിപ്പെടുത്തിക്കൊണ്ട് 20 അത്യാധുനിക ഡിഫിബ്രിലേറ്ററുകൾ (Automated External Defibrillators - AED) സ്ഥാപിച്ചതായി ആരോഗ്യ മന്ത്രാലയം അറിയിച്ചു. ജീവൻ രക്ഷിക്കുന്നതിനും വേഗത്തിലുള്ള പ്രതികരണം ഉറപ്പാക്കുന്നതും ലക്ഷ്യമിട്ടാണ് ഈ നടപടി.

പബ്ലിക് ഹെൽത്ത് സെക്ടറിന്റെ മേൽനോട്ടത്തിൽ, വിമാനത്താവളത്തിലെ1, 4, 5 ടെർമിനലുകളിലും വിമാനത്താവളത്തിലെ ആരോഗ്യ കേന്ദ്രത്തിലും 20 എ.ഇ.ഡി. ഉപകരണങ്ങൾ സ്ഥാപിച്ചതായി ആരോഗ്യ മന്ത്രാലയ വക്താവ് ഡോ. അബ്ദുല്ല അൽ-സനദ് എക്സ് പ്ലാറ്റ്‌ഫോമിൽ മന്ത്രാലയത്തിന്റെ അക്കൗണ്ടിൽ പങ്കുവെച്ച കുറിപ്പിൽ അറിയിച്ചു. അടിയന്തര സാഹചര്യങ്ങളിൽ ഉടനടിയുള്ള പ്രതികരണം ജീവൻ രക്ഷിക്കുന്നതിനും അതിജീവന സാധ്യത 70 ശതമാനം വരെ വർദ്ധിപ്പിക്കുന്നതിനും സഹായിക്കുമെന്ന് അൽ-സനദ് വിശദീകരിച്ചു.