മലയാളികൾക്കടക്കം സന്തോഷ വാർത്ത, കേരളത്തിലേക്ക് ഉൾപ്പെടെ കുറഞ്ഞ നിരക്കിൽ പറക്കാം, വമ്പൻ ഓഫർ പ്രഖ്യാപിച്ച് എയർ അറേബ്യ

കേരളത്തിലേക്ക് ഉൾപ്പെടെ കുറഞ്ഞ നിരക്കിൽ പറക്കാം. വമ്പൻ ഓഫറുമായി എയര്‍ അറേബ്യ. ഏകദേശം 139 ദിർഹം (ഏകദേശം 3,358 രൂപ) മുതലാണ് ഒരുവശത്തേക്കുള്ള ടിക്കറ്റ് നിരക്കുകൾ ആരംഭിക്കുന്നത്.

ദുബൈ: 'സൂപ്പർ സീറ്റ് സെയിൽ' ഓഫര്‍ പ്രഖ്യാപിച്ച് ബജറ്റ് വിമാന കമ്പനിയായ എയര്‍ അറേബ്യ. മലയാളികളടക്കമുള്ള ഇന്ത്യന്‍ യാത്രക്കാര്‍ക്ക് ഗുണകരമാകുന്ന ഓഫറാണ് എയര്‍ലൈന്‍ പ്രഖ്യാപിച്ചത്. ആഗോള ശൃംഖലയിലെ 10 ലക്ഷം സീറ്റുകളിൽ വമ്പൻ നിരക്ക് ഇളവുകളാണ് എയര്‍ അറേബ്യ വാഗ്ദാനം ചെയ്യുന്നത്.

ഏകദേശം 139 ദിർഹം (ഏകദേശം 3,358 രൂപ) മുതലാണ് ഒരുവശത്തേക്കുള്ള ടിക്കറ്റ് നിരക്കുകൾ ആരംഭിക്കുന്നത്. അബുദാബിയിൽ നിന്ന് കേരളത്തിലെ പ്രധാന നഗരങ്ങളായ തിരുവനന്തപുരം, കൊച്ചി, കോഴിക്കോട് എന്നിവിടങ്ങളിലേക്ക് ആകർഷകമായ ടിക്കറ്റ് നിരക്കുകൾ ലഭ്യമാണ്.

ബംഗ്ലാദേശിൽ നിന്ന് ഷാർജയിലേക്കും അബുദാബിയിലേക്കുമുള്ള നോൺ-സ്റ്റോപ്പ് വിമാനങ്ങളിലും, തുടർന്ന് ജർമ്മനി, ചെക്ക് റിപ്പബ്ലിക്, തുർക്കി, ഈജിപ്ത്, ഇറ്റലി, പോളണ്ട്, ഗ്രീസ്, റഷ്യ, ഓസ്ട്രിയ, അസർബൈജാൻ തുടങ്ങിയ സ്ഥലങ്ങളിലേക്കുള്ള കണക്ഷൻ വിമാനങ്ങളിലും ഈ ഓഫർ ലഭ്യമാണ്. ടിക്കറ്റ് നിരക്ക് ഒറ്റ യാത്രയ്ക്ക് 139 ദിർഹം മുതലാണ് ആരംഭിക്കുന്നത്. അബുദാബിയിൽ നിന്ന് തിരുവനന്തപുരം / കൊച്ചി / കോഴിക്കോട് എന്നിവിടങ്ങളിലേക്ക് ഏകദേശം 299 ദിർഹം (ഏകദേശം 7,224 രൂപ) മുതലാണ് നിരക്കുകൾ തുടങ്ങുന്നത്.

ഷാർജ, അബുദാബി എന്നിവിടങ്ങളിൽ നിന്നുള്ള വിമാനങ്ങൾക്ക് ജിസിസി, സൗത്ത് ഏഷ്യ, യൂറോപ്പ് എന്നിവിടങ്ങളിലെ ലക്ഷ്യസ്ഥാനങ്ങളിലേക്ക് കണക്ഷനുകളുണ്ട്. ഇതിൽ ഇന്ത്യ, പാകിസ്ഥാൻ, ബംഗ്ലാദേശ്, ശ്രീലങ്ക എന്നിവിടങ്ങളിലേക്കുള്ള പ്രത്യേക നിരക്കുകളും ഉൾപ്പെടുന്നു. സീറ്റുകൾ പരിമിതമാണെന്നും ലഭ്യത അനുസരിച്ചായിരിക്കുമെന്നും എയർ അറേബ്യ അറിയിച്ചു, അതിനാൽ യാത്രക്കാർ നേരത്തെ ടിക്കറ്റ് ബുക്ക് ചെയ്യണമെന്നാണ് നിര്‍ദ്ദേശം. ഈ ഓഫർ പ്രകാരം ഇന്ന് (29) മുതൽ ഒക്ടോബർ 12 വരെ ടിക്കറ്റുകൾ ബുക്ക് ചെയ്യാനാകും. എന്നാൽ, യാത്ര ചെയ്യേണ്ടത് 2026 ഫെബ്രുവരി 17 മുതൽ ഒക്ടോബർ 24 വരെയുള്ള തീയതികളിലാണ്.

പ്രധാന റൂട്ടുകളിലെ ചില ഓഫർ നിരക്കുകൾ:

റൂട്ട്, നിരക്ക് (ദിർഹം)

ഷാർജ → ദോഹ 149

ഷാർജ → കറാച്ചി 149

ഷാർജ → അലക്സാണ്ട്രിയ 248

അബുദാബി → അലക്സാണ്ട്രിയ 248

ഷാർജ → അമ്മാൻ / ജിദ്ദ 249

ഷാർജ → മുംബൈ / ബെയ്റൂട്ട് / ബാക്കു / കെയ്‌റോ 249–298

അബുദാബി → തിരുവനന്തപുരം / കൊച്ചി / ചെന്നൈ / കോഴിക്കോട് 299

ഷാർജ → കൊളംബോ / കാഠ്മണ്ഡു / ധാക്ക 349

ഷാർജ → ചിറ്റഗോങ് / ബാങ്കോക്ക് / ഫൂക്കറ്റ് 399

സീറ്റുകൾ തീരുന്നത് വരെ ഓഫർ സാധുതയുള്ളതാണ്. അഞ്ച് ഹബുകളിലായി (യുഎഇ, മൊറോക്കോ, ഈജിപ്ത്) 200-ൽ അധികം റൂട്ടുകളിൽ സർവീസ് നടത്തുന്ന എയർ അറേബ്യ, യാത്രക്കാർക്ക് മികച്ച യാത്രാനുഭവം, വിശ്വാസ്യത, മികച്ച മൂല്യം എന്നിവ ഉറപ്പാക്കുന്നതിൽ ശ്രദ്ധേയരാണ്. നിരവധി അവാർഡുകൾ നേടിയ എയർലൈൻ കൂടിയാണ് എയർ അറേബ്യ.