ഹജ്ജിനെത്തുന്ന ഇന്ത്യൻ തീർത്ഥാടകരുടെ സൗകര്യങ്ങൾ വിലയിരുത്തി കോൺസൽ ജനറൽ; മക്കയിൽ വിപുലമായ ഒരുക്കങ്ങൾ

ഈ വർഷത്തെ ഹജ്ജ് തീർത്ഥാടനത്തിനായി മക്കയിലെത്തുന്ന ഇന്ത്യൻ സംഘത്തിന് വിപുലമായ സൗകര്യങ്ങൾ ഒരുക്കി ഇന്ത്യൻ ഹജ്ജ് മിഷൻ. ഇന്ത്യൻ കോൺസൽ ജനറലിന്റെ നേതൃത്വത്തിൽ ഹറമൈൻ റെയിൽവേ സ്റ്റേഷനിലും താമസ കെട്ടിടങ്ങളിലും പരിശോധന നടത്തി, തീർത്ഥാടകർക്ക് സുഗമമായ അനുഭവം ഉറപ്പാക്കി. ജിദ്ദയിലെത്തിയ ആദ്യ സംഘത്തിന് ഊഷ്മള സ്വീകരണം നൽകി.

റിയാദ്: ഈ വർഷത്തെ ഹജ്ജ് തീർത്ഥാടനത്തിനായി മക്കയിലെത്തുന്ന ഇന്ത്യൻ സംഘത്തിന് വിപുലമായ സൗകര്യങ്ങൾ ഒരുക്കി ഇന്ത്യൻ ഹജ്ജ് മിഷൻ. ഒരുക്കങ്ങൾ നേരിട്ട് വിലയിരുത്തുന്നതിനായി ഇന്ത്യൻ കോൺസൽ ജനറൽ ഫഹദ് അഹമ്മദ് ഖാൻ സൂരി, കോൺസൽ (ഹജ്ജ്) സദഫ് ചൗധരി എന്നിവർ മക്കയിലെ ഹറമൈൻ ഹൈ സ്പീഡ് റെയിൽവേ സ്റ്റേഷൻ സന്ദർശിച്ചു.

തീർത്ഥാടകരുടെ വരവും തുടർയാത്രകളും സുഗമമായി നടക്കുന്നുണ്ടെന്ന് ഉറപ്പാക്കാൻ സ്റ്റേഷൻ അധികൃതരുമായി ഇവർ ചർച്ച നടത്തി. യാത്രയുടെ ഓരോ ഘട്ടത്തിലും തീർത്ഥാടകർക്ക് മികച്ച പിന്തുണ നൽകാനും പ്രയാസങ്ങളില്ലാത്ത ഹജ്ജ് അനുഭവം ഉറപ്പാക്കാനും ഇന്ത്യൻ ഹജ്ജ് മിഷൻ സജ്ജമാണെന്ന് അധികൃതർ അറിയിച്ചു.

മക്കയിലെ ബിൽഡിങ് നമ്പർ 112-ൽ തീർത്ഥാടകർക്കായി ഒരുക്കിയ താമസ സൗകര്യങ്ങളും കോൺസൽ ജനറലിന്റെ നേതൃത്വത്തിൽ പരിശോധിച്ചു. കെട്ടിടത്തിലെ അടിസ്ഥാന സൗകര്യങ്ങളും താമസക്കാർക്കായി സജ്ജീകരിച്ച സേവനങ്ങളും സംഘം സൂക്ഷ്മമായി വിലയിരുത്തി. പുണ്യനഗരത്തിലെത്തുന്ന ഓരോ തീർത്ഥാടകനും സുരക്ഷിതവും സുഖകരവുമായ താമസം ഉറപ്പാക്കാൻ മിഷന്‍റെ കീഴിലുള്ള എല്ലാ വിഭവങ്ങളും പ്രയോജനപ്പെടുത്തുന്നുണ്ട്.

നേരത്തെ, സൗദി എയർലൈൻസ് വിമാനത്തിൽ ജിദ്ദ കിങ് അബ്ദുൽ അസീസ് അന്താരാഷ്ട്ര വിമാനത്താവളത്തിലെ ഒന്നാം ടെർമിനലിൽ എത്തിയ ആദ്യ ഇന്ത്യൻ തീർത്ഥാടക സംഘത്തിന് ഊഷ്മളമായ സ്വീകരണമാണ് നൽകിയത്. കോൺസൽ ജനറൽ, കോൺസൽ (ഹജ്ജ്) എന്നിവർക്കൊപ്പം സൗദി അറേബ്യ റെയിൽവേ സി.ഇ.ഒ ഡോ. ബഷാർ ബിൻ ഖാലിദ് അൽ മാലിക്കും സ്വീകരണത്തിന് നേതൃത്വം നൽകി. വിമാനത്താവളത്തിൽ നിന്ന് ഹറമൈൻ ഹൈ സ്പീഡ് റെയിൽവേ വഴി മക്കയിലേക്ക് തിരിച്ച തീർത്ഥാടകർ തങ്ങളുടെ പുണ്യകർമങ്ങൾക്ക് തുടക്കം കുറിച്ചു.