ഒമാനിൽ കനത്ത മഴക്ക് സാധ്യത, ജാഗ്രതാ നിർദ്ദേശവുമായി അധികൃതർ

ഒമാനിൽ ഇന്ന് ശക്തമായ കാലാവസ്ഥാ വ്യതിയാനത്തിന് സാധ്യതയുണ്ടെന്ന് ദേശീയ മൾട്ടി-ഹസാർഡ് എർലി വാർണിംഗ് സെന്‍റർ മുന്നറിയിപ്പ് നൽകി. മസ്കറ്റ് ഉൾപ്പെടെയുള്ള നിരവധി ഗവർണറേറ്റുകളിൽ ഇടിമിന്നലോടുകൂടിയ കനത്ത മഴയും വാദികളിൽ പ്രളയ സാധ്യതയുമുണ്ട്. പൊതുജനങ്ങൾ അതീവ ജാഗ്രത പാലിക്കണമെന്നും അധികൃതർ നിർദ്ദേശിച്ചു.

മസ്കറ്റ്: ഒമാനിൽ ഇന്ന് ശക്തമായ കാലാവസ്ഥാ വ്യതിയാനം ഉണ്ടാകുമെന്ന് ദേശീയ മൾട്ടി-ഹസാർഡ് എർലി വാർണിംഗ് സെന്‍റർ മുന്നറിയിപ്പ് നൽകി. ഇടിമിന്നലോടുകൂടിയ കനത്ത മഴ, മഞ്ഞുവീഴ്ച, ശക്തമായ കാറ്റ് എന്നിവയ്ക്കുള്ള സാധ്യതയുണ്ടെന്ന് അധികൃതർ അറിയിച്ചു. അൽ ബുറേമി A,വടക്കൻ അൽ ബാത്തിനാ, തെക്കൻ അൽ ബാത്തിന, അൽ ദാഹിറ, അൽ ദാഖിലിയ, മസ്കറ്റ് എന്നി ഗവർണറേറ്റുകളിൽ മഴ ലഭിക്കുമെന്നാണ് പ്രവചനം. കൂടാതെ വടക്കൻ അൽ ശ‌‍ർഖിയ, തെക്കൻ ശർഖിയ എന്നിവിടങ്ങളിലുമുള്ള ചില ഭാഗങ്ങളിലും ശക്തമായ മഴ അനുഭവപ്പെടും.

വിവിധ തീവ്രതകളിലുള്ള മഴയ്ക്കൊപ്പം മഞ്ഞുവീഴ്ചയ്ക്കും സാധ്യതയുള്ളതിനാൽ വാദികളിലും താഴ്ന്ന പ്രദേശങ്ങളിലും പെട്ടെന്നുള്ള പ്രളയ സാധ്യത നിലനിൽക്കുന്നു. മണിക്കൂറിൽ 28 മുതൽ 46 കിലോമീറ്റർ വരെ വേഗതയുള്ള ശക്തമായ കാറ്റ് വീശാനും മഴക്കാലത്ത് കാഴ്ചപരിധി കുറയാനും സാധ്യതയുണ്ടെന്ന് മുന്നറിയിപ്പിൽ പറയുന്നു. ഇതേസമയം മുസന്ദം, അൽ വുസ്ത, ദോഫാർ എന്നീ പ്രദേശങ്ങളിൽ ഇടവിട്ട് നേരിയതോ മിതമായതോ ആയ മഴ ലഭിക്കാനാണ് സാധ്യത. ഇവിടങ്ങളിലെ സ്വാധീനം പരിമിതമായിരിക്കുമെന്ന് വിലയിരുത്തുന്നു. ഇടിമിന്നൽ സമയങ്ങളിൽ കടലിൽ പോകുന്നത് ഒഴിവാക്കുകയും വാദികൾ കടക്കുന്നത് പൂർണമായും ഒഴിവാക്കുകയും ചെയ്യണമെന്ന് സിവിൽ ഏവിയേഷൻ അതോറിറ്റി മുന്നറിയിപ്പ് നൽകിയിട്ടുണ്ട്. പൊതുജനങ്ങൾ അതീവ ജാഗ്രത പാലിച്ച് ഔദ്യോഗിക കാലാവസ്ഥാ അറിയിപ്പുകൾ നിരന്തരം പിന്തുടരണമെന്നും അധികൃതർ പുറത്തിറക്കിയിട്ടുള്ള അറിയിപ്പിൽ പറയുന്നു.