കുവൈത്തിൽ വീണ്ടും ഡീസൽ കള്ളക്കടത്ത്, 10 ടാങ്കറുകൾ കൂടി പിടിച്ചെടുത്തു

കുവൈത്തിൽ വീണ്ടും ഡീസൽ കള്ളക്കടത്ത്. ഡീസൽ കള്ളക്കടത്ത് ശൃംഖലയ്‌ക്കെതിരായ തുടർച്ചയായ നടപടികളുടെ ഭാഗമായി സുരക്ഷാ സേന 10 ടാങ്കർ ട്രക്കുകൾ പിടിച്ചെടുത്തതായി കുവൈത്ത് ആഭ്യന്തര മന്ത്രാലയം അറിയിച്ചു. 

കുവൈത്ത് സിറ്റി: കുവൈത്തിൽ വീണ്ടും ഡീസൽ കള്ളക്കടത്ത്. അടുത്തിടെ രാജ്യത്ത് സമാനമായ സംഭവം ഉണ്ടായിരുന്നു. ഡീസൽ കള്ളക്കടത്ത് ശൃംഖലയ്‌ക്കെതിരായ തുടർച്ചയായ നടപടികളുടെ ഭാഗമായി സുരക്ഷാ സേന 10 ടാങ്കർ ട്രക്കുകൾ പിടിച്ചെടുത്തതായി കുവൈത്ത് ആഭ്യന്തര മന്ത്രാലയം ബുധനാഴ്ച അറിയിച്ചു. ജഹ്‌റ ഗവർണറേറ്റിലെ ഖുവൈസത്ത് പ്രദേശത്ത് രാജ്യത്തിന് പുറത്തേക്ക് ഡീസൽ ഇന്ധനം കടത്തുന്നതിന് മുമ്പ് ടാങ്കറുകൾ തടഞ്ഞതായി മന്ത്രാലയം ഒരു പത്രക്കുറിപ്പിൽ പറഞ്ഞു.

ടാങ്കറുകളുടെ കസ്റ്റംസ് ഡാറ്റയിൽ കൃത്രിമം കാണിച്ചതായി അന്വേഷണത്തിൽ കണ്ടെത്തി. സംഭവത്തിൽ ഉൾപ്പെട്ടവർക്കെതിരെ നിയമനടപടി സ്വീകരിക്കുന്നതിനുള്ള തയ്യാറെടുപ്പിനായി ജഹ്‌റ ഗവർണറേറ്റിലെ ക്രിമിനൽ അന്വേഷകർ കേസ് അന്വേഷിക്കുന്നത് തുടരുകയാണെന്ന് ആഭ്യന്തര മന്ത്രാലയം കൂട്ടിച്ചേർത്തു. ഇന്ധന കള്ളക്കടത്ത് ചെറുക്കുന്നതിനും രാജ്യത്തിന്‍റെ വിഭവങ്ങൾ സംരക്ഷിക്കുന്നതിനുമുള്ള പ്രതിബദ്ധത മന്ത്രാലയം വീണ്ടും ആവർത്തിച്ചു.