ഒമാനിലെ ഫ്രീ സോണുകളിലെ നിക്ഷേപം 21 ബില്യൺ ഒമാനി റിയാലിലെത്തിയെന്ന് പബ്ലിക് അതോറിറ്റി

യു.എസ് കസ്റ്റംസ് തീരുവ  മറ്റ് രാജ്യങ്ങളെപ്പോലെ തന്നെ കൈകാര്യം ചെയ്യുമെന്നും ഫ്രീ സോണുകളിൽ സ്വദേശിവത്കരണ നിരക്ക് 37 ശതമാനമായി ഉയർന്നുവെന്നും ചെയർമാൻ സുനൈദി

മസ്കറ്റ് : 2024 അവസാനത്തോടെ ഒമാനിലെ സാമ്പത്തിക, സ്വതന്ത്ര, വ്യാവസായിക മേഖലകളിലെ സഞ്ചിത നിക്ഷേപം ഏകദേശം 21 ബില്യൺ ഒമാൻ റിയാലായി ഉയർന്നതായി രാജ്യത്തെ പ്രത്യേക സാമ്പത്തിക സ്വതന്ത്ര മേഖലകളുടെ പബ്ലിക് അതോറിറ്റിയുടെ ചെയർമാൻ ഷെയ്ഖ് ഡോ:  ഡോ. അലി ബിൻ മസൂദ് അൽ സുനൈദി പറഞ്ഞു. 2023 അവസാനത്തെ നിലവാരത്തേക്കാൾ 10 ശതമാനമാണ് വർധനവ്. പബ്ലിക് അതോറിറ്റി ഫോർ സ്പെഷ്യൽ ഇക്കണോമിക് സോണുകളുടെയും ഫ്രീ സോണുകളുടെയും വാർഷിക മാധ്യമ സമ്മേളനത്തിൽ സംസാരിക്കുകയായിരുന്നു അൽ സുനൈദി.

2024 അവസാനത്തോടെ ദുഖമിലെ പ്രത്യേക സാമ്പത്തിക മേഖലയിൽ പ്രതിജ്ഞാബദ്ധമായ നിക്ഷേപങ്ങളുടെ അളവ് 6.3 ബില്യൺ ഒമാൻ റിയാലായി ഉയരുകയുണ്ടായി. ഇത് 5 ശതമാനം വളർച്ചയാണ്  രേഖപ്പെടുത്തിയത്. സ്വതന്ത്ര മേഖലകളിൽ ഇത് 6.6 ബില്യൺ ഒമാനി റിയാലായും ഉയരുകയുണ്ടായി. വ്യാവസായിക നഗരങ്ങളിൽ ഏകദേശം 7.6 ബില്യൺ ഒമാൻ റിയാലിന്റെ പ്രതിജ്ഞാബദ്ധമായ നിക്ഷേപ അളവ് രേഖപ്പെടുത്തി, അതേസമയം "ഖസെയ്ൻ ഇക്കണോമിക് സിറ്റിയിലെ നിക്ഷേപങ്ങൾ 18.8 ശതമാനം വർധിച്ച് അര ബില്യൺ ഒമാൻ റിയാലിലധികം കവിയുകയും ചെയ്തു.

2022ൽ ജിഡിപിയിൽ സാമ്പത്തിക, സ്വതന്ത്ര, വ്യാവസായിക മേഖലകളുടെ സംഭാവന 7.5 ശതമാനമായിരുന്നു, ഈ മേഖലകളിൽ നിന്നുള്ള കയറ്റുമതിയുടെ മൂല്യം 4.5 ബില്യൺ ഒമാൻ റിയാലിലധികം കവിഞ്ഞു. ഇത് ഒമാനിലെ  മൊത്തം കയറ്റുമതി മൂല്യത്തിന്റെ 17.9 ശതമാനത്തെയാണ് കാണിക്കുന്നത്. മെഡിക്കൽ, ഫാർമസ്യൂട്ടിക്കൽ വ്യവസായങ്ങൾ, ഭക്ഷ്യ, മത്സ്യബന്ധന വ്യവസായങ്ങൾ, പുനരുപയോഗ ഊർജ്ജവുമായി ബന്ധപ്പെട്ട വ്യവസായങ്ങൾ, പെട്രോകെമിക്കൽ വ്യവസായങ്ങൾ തുടങ്ങി വിവിധ സാമ്പത്തിക മേഖലകളിലായി കഴിഞ്ഞ വർഷം ചർച്ചയിലിരിക്കുന്ന പദ്ധതികളുടെ എണ്ണം 180 ആയി വർധിച്ചുവെന്നും അദ്ദേഹം ചൂണ്ടിക്കാട്ടി. മസ്‌കറ്റ് ഇന്റർനാഷണൽ എയർപോർട്ട് ഫ്രീ സോൺ, അൽ ദാഹിറ ഗവർണറേറ്റിലെ ഇന്റഗ്രേറ്റഡ് ഇക്കണോമിക് സോൺ, റായ്‌സൂട്ട് ഇൻഡസ്ട്രിയൽ സിറ്റി എന്നിവയുൾപ്പെടെ പുതിയ സാമ്പത്തിക, സ്വതന്ത്ര മേഖലകളും വ്യാവസായിക നഗരങ്ങളും അതോറിറ്റി വികസിപ്പിക്കുന്നത് തുടർന്ന് വരികയാണ്.

കഴിഞ്ഞ വർഷം ഈ പ്രദേശങ്ങളിൽ പ്രവർത്തിക്കുന്ന പ്രോജക്ടുകളിലേക്ക് 3,597 ഒമാനി പൗരന്മാരെ നിയമിച്ചു, ഇതോടെ ഈ പ്രദേശങ്ങളിലെ ആകെ ദേശീയ തൊഴിലാളികളുടെ എണ്ണം 29,000 ൽ അധികമായി. സ്വദേശിവത്കരണ നിരക്ക് 37 ശതമാനമാണ്. യു.എസ് കസ്റ്റംസ് തീരുവയുടെ പ്രശ്‌നം ഒമാൻ സുൽത്താനേറ്റ് നിരീക്ഷിച്ചുകൊണ്ടിരിക്കുകയാണെന്നും മറ്റ് രാജ്യങ്ങളെപ്പോലെ തന്നെ അവയും കൈകാര്യം ചെയ്യുമെന്നും അൽ സുനൈദി വ്യക്തമാക്കി.

ഏഷ്യാനെറ്റ് ന്യൂസ് ലൈവ് യൂട്യൂബിൽ കാണാം