കുവൈത്തിന്റെ മണ്ണിൽ പുതിയ 'നിധി'; അപൂർവ കണ്ടെത്തൽ, അസാധാരണമായ ഉത്പാദന നിരക്ക്, പുതിയ എണ്ണപ്പാടം കണ്ടെത്തി

അപൂർവ കണ്ടെത്തൽ. കുവൈത്ത് ഓയിൽ കമ്പനി രാജ്യത്ത് 'ജാസ' എന്ന് പേരിട്ടിരിക്കുന്ന പുതിയ പ്രകൃതിവാതകപ്പാടം കണ്ടെത്തി. പ്രതിദിനം 29 ദശലക്ഷം ഘനയടിയിലധികം ഉത്പാദന ശേഷി

കുവൈത്ത് സിറ്റി: കുവൈത്ത് പെട്രോളിയം കോർപ്പറേഷന്റെ ഉപസ്ഥാപനമായ കുവൈത്ത് ഓയിൽ കമ്പനി രാജ്യത്ത് പുതിയ പ്രകൃതിവാതകപ്പാടം കണ്ടെത്തി. 'ജാസ' എന്ന് പേരിട്ടിരിക്കുന്ന വാതകപ്പാടം, രാജ്യത്തിന്റെ ഹൈഡ്രോ കാർബൺ വിഭവങ്ങൾ വികസിപ്പിക്കാനുള്ള കമ്പനിയുടെ നിരന്തര പരിശ്രമങ്ങളുടെ നേട്ടമാണ്. കെ ഒ സിയുടെ കണക്കനുസരിച്ച്, ജാസ-1 കിണറ്റിൽ നടത്തിയ പ്രാഥമിക പരിശോധനകളിൽ അസാധാരണമായ ഉത്പാദന നിരക്കാണുള്ളതെന്നാണ് കണ്ടെത്തൽ. പ്രതിദിനം 29 ദശലക്ഷം ഘനയടിയിലധികം ഉൽപ്പാദന നിരക്കാണുള്ളതെന്നാണ് കണ്ടെത്തൽ. പാരിസ്ഥിതികമായും സാങ്കേതികമായും ഒരു അപൂർവ കണ്ടെത്തലാണ്. കാർബൺ ഡൈ ഓക്സൈഡ് കുറവാണെന്നതും, ഹൈഡ്രജൻ സൾഫൈഡിൻ്റെയോ ജലാംശത്തിൻ്റെയോ സാന്നിധ്യം ഇവിടെയില്ലെന്നതും എടുത്തുപറയേണ്ട സവിശേഷതയാണ്.