കുവൈത്തിലെ കോൺസുലാർ സേവനങ്ങൾ ഇനി കൂടുതൽ വേഗത്തിൽ, പുതിയ നാല് കേന്ദ്രങ്ങൾ വരുന്നു

കുവൈത്തിൽ ഇന്ത്യൻ പ്രവാസികൾക്ക് പാസ്‌പോർട്ട്, വിസ, അറ്റസ്റ്റേഷൻ, ഒസിഐ തുടങ്ങിയ കോൺസുലാർ സേവനങ്ങൾ ഇനിമുതൽ കൂടുതൽ വേഗത്തിലും എളുപ്പത്തിലും ലഭ്യമാകും. ഇന്ത്യൻ കോൺസുലാർ സേവനങ്ങളുടെ നടത്തിപ്പ് ചുമതല ജൂലൈ ഒന്ന് മുതൽ ഡി യു ഡിജിറ്റൽ ഗ്ലോബൽ കമ്പനി ഏറ്റെടുക്കും.  

കുവൈത്ത് സിറ്റി: കുവൈത്തിലെ ലക്ഷക്കണക്കിന് വരുന്ന ഇന്ത്യൻ പ്രവാസികൾക്ക് പാസ്‌പോർട്ട്, വിസ, അറ്റസ്റ്റേഷൻ, ഒസിഐ തുടങ്ങിയ കോൺസുലാർ സേവനങ്ങൾ ഇനിമുതൽ കൂടുതൽ വേഗത്തിലും എളുപ്പത്തിലും ലഭ്യമാകും. ഇന്ത്യൻ എംബസിയുടെ പുതിയ നിർദ്ദേശപ്രകാരം കുവൈത്തിലെ ഇന്ത്യൻ കോൺസുലാർ ആപ്ലിക്കേഷൻ സെന്ററുകളുടെ ചുമതല ഡി യു ഡിജിറ്റൽ ഗ്ലോബൽ കമ്പനി ഏറ്റെടുക്കുന്നതോടെയാണിത്.  ജൂലൈ ഒന്ന് മുതൽ പുതിയ കേന്ദ്രങ്ങൾ ഔദ്യോഗികമായി പ്രവർത്തനം ആരംഭിക്കും. കുവൈത്തിലെ ഏറ്റവും വലിയ പ്രവാസി സമൂഹങ്ങളിലൊന്നായ ഇന്ത്യക്കാർക്ക് വലിയ രീതിയിൽ പ്രയോജനം ചെയ്യുന്നതാണ് ഈ പുതിയ നവീകരണം.

പ്രവാസികളുടെ യാത്രാക്ലേശം കുറയ്ക്കുന്നതിനും സേവനങ്ങൾ കൂടുതൽ ജനങ്ങളിലേക്ക് എത്തിക്കുന്നതിനുമായി കുവൈത്തിലെ പ്രധാനപ്പെട്ട നാല് കേന്ദ്രങ്ങളിലാണ് പുതിയ ഐസിഎസി ഓഫീസുകൾ തുറക്കുന്നത്. കുവൈത്ത് സിറ്റി, ഫഹാഹീൽ, ദജീജ്, ജഹ്‌റ എന്നീ പ്രദേശങ്ങളിലാണ് ഈ കേന്ദ്രങ്ങൾ തന്ത്രപരമായി ക്രമീകരിച്ചിരിക്കുന്നത്. ഡിജിറ്റൽ സാങ്കേതികവിദ്യകളുടെ സഹായത്തോടെ അപേക്ഷാ നടപടികൾ ലളിതമാക്കുമെന്നും കൃത്യമായ കസ്റ്റമർ സപ്പോർട്ട് ഉറപ്പാക്കുമെന്നും കമ്പനി വ്യക്തമാക്കിയിട്ടുണ്ട്. അപേക്ഷകർക്ക് കൂടുതൽ സുതാര്യവും വേഗതയേറിയതുമായ അനുഭവം സമ്മാനിക്കാൻ ഇതിലൂടെ സാധിക്കും.

ദക്ഷിണ കൊറിയ, തായ്‌ലൻഡ് തുടങ്ങിയ രാജ്യങ്ങളിൽ ഇന്ത്യൻ കോൺസുലാർ സേവന കേന്ദ്രങ്ങൾ വിജയകരമായി നടത്തി പരിചയമുള്ള കമ്പനിയാണ് ഡി യു ഡിജിറ്റൽ ഗ്ലോബൽ. നിലവിലെ സേവന ദാതാക്കൾ ജൂൺ മുപ്പത് വരെ മാത്രമേ അപേക്ഷകൾ സ്വീകരിക്കുകയുള്ളൂവെന്നും, ജൂലൈ ഒന്ന് മുതൽ പുതിയ അപേക്ഷകളെല്ലാം ഡി യു ഡിജിറ്റൽ ഗ്ലോബലിന്റെ കേന്ദ്രങ്ങൾ വഴി മാത്രമായിരിക്കും സ്വീകരിക്കുകയെന്നും അധികൃതർ അറിയിച്ചു. പ്രവാസി സമൂഹത്തിന് ആവശ്യമായ അവശ്യ കോൺസുലാർ സേവനങ്ങൾ കൂടുതൽ കാര്യക്ഷമമായി ലഭ്യമാക്കാൻ ഇന്ത്യൻ എംബസി നടത്തുന്ന നിരന്തര ശ്രമങ്ങളുടെ ഭാഗമായാണ് ഈ പുതിയ മാറ്റം.