സാദ് അൽ-അബ്ദുള്ളയിൽ മണ്ണ് ഇടിഞ്ഞുവീണ് അപകടം; പ്രവാസിക്ക് ദാരുണാന്ത്യം

കുവൈറ്റിലെ സൗത്ത് സാദ് അൽ-അബ്ദുള്ളയിലെ നിർമ്മാണ സ്ഥലത്തുണ്ടായ അപകടത്തിൽ ഒരാൾ മരിച്ചു. മണ്ണ് നീക്കം ചെയ്യുന്നതിനിടെ മണ്ണ് മാന്തി യന്ത്രം മറിഞ്ഞാണ് അപകടമുണ്ടായത്. 

കുവൈറ്റ് സിറ്റി: സൗത്ത് സാദ് അൽ-അബ്ദുള്ള മേഖലയിലെ ഒരു നിർമ്മാണ സ്ഥലത്തുണ്ടായ മണ്ണ് ഇടിച്ചിലിലും മണ്ണ് മാന്തി യന്ത്രം മറിഞ്ഞും ഒരാൾ കൊല്ലപ്പെട്ടു. വ്യാഴാഴ്ച വൈകുന്നേരമാണ് നാടിനെ നടുക്കിയ ഈ അപകടം നടന്നത്. അൽ-തഹ്‌റീർ ഫയർ സ്റ്റേഷനിലെ രക്ഷാപ്രവർത്തകർ ഉടനടി സ്ഥലത്തെത്തി രക്ഷാപ്രവർത്തനം നടത്തിയെങ്കിലും ഒരാളുടെ ജീവൻ രക്ഷിക്കാനായില്ല.

നിർമ്മാണ പ്രവർത്തനങ്ങൾക്കായി മണ്ണ് നീക്കം ചെയ്യുന്നതിനിടെ അപ്രതീക്ഷിതമായി മണ്ണ് ഇടിഞ്ഞുവീഴുകയും യന്ത്രം നിയന്ത്രണം വിട്ട് മറിയുകയുമായിരുന്നു എന്നാണ് പ്രാഥമിക വിവരം. ഫയർഫോഴ്സ് ഉദ്യോഗസ്ഥർ അപകടസ്ഥലം സുരക്ഷിതമാക്കുകയും തുടർ നടപടികൾക്കായി കേസ് ബന്ധപ്പെട്ട അധികാരികൾക്ക് കൈമാറുകയും ചെയ്തു. മരിച്ച വ്യക്തിയുടെ വിവരങ്ങൾ പുറത്തുവിട്ടിട്ടില്ല. നിർമ്മാണ സ്ഥലങ്ങളിൽ സുരക്ഷാ മാനദണ്ഡങ്ങൾ പാലിക്കുന്നുണ്ടെന്ന് ഉറപ്പുവരുത്തണമെന്ന് അധികൃതർ കർശന നിർദ്ദേശം നൽകി.