മയക്കുമരുന്നിന് അടിമ, സമ്പാദ്യം മുഴുവൻ നഷ്ടമായതോടെ മോഷണം, ഡെലിവറി വാഹനം മോഷ്ടിച്ചയാൾ കുവൈത്തിൽ പിടിയിൽ

ഡെലിവറി വാഹനം മോഷ്ടിച്ചയാൾ കുവൈത്തിൽ പിടിയിൽ. മയക്കുമരുന്ന് ആസക്തി കാരണമാണ് തനിക്ക് ജോലി നഷ്ടപ്പെട്ടതെന്നും താൻ തൊഴിലില്ലാത്ത അവസ്ഥയിലായെന്നും പ്രതി വെളിപ്പെടുത്തി.

കുവൈത്ത് സിറ്റി: കുവൈത്തില്‍ ഡെലിവറി വാഹനം മോഷ്ടിച്ച കേസിലെ പ്രതിയെ അഹമ്മദി പൊലീസ് അറസ്റ്റ് ചെയ്തു. ഇയാൾ കുറ്റം സമ്മതിച്ചു. സ്വന്തമായി യാത്ര ചെയ്യാൻ വാഹനം ഇല്ലാത്തതിനാലാണ് പ്രതി ഈ അവസരം മുതലെടുത്ത് വാഹനം മോഷ്ടിച്ചത്. പ്രതിയെ അറസ്റ്റ് ചെയ്ത സമയത്ത്, ഉപയോഗിക്കാൻ തയ്യാറാക്കി വെച്ച ഒരെണ്ണം ഉൾപ്പെടെ അഞ്ച് സൂചികളും ഒരു റോൾ ക്രിസ്റ്റൽ മെത്തും ഇയാളിൽ നിന്ന് അധികൃതർ കണ്ടെടുത്തു.

മയക്കുമരുന്ന് ആസക്തി കാരണമാണ് തനിക്ക് ജോലി നഷ്ടപ്പെട്ടതെന്നും താൻ തൊഴിലില്ലാത്ത അവസ്ഥയിലായെന്നും പ്രതി വെളിപ്പെടുത്തി. ലഹരി വസ്തുക്കൾ ഉപയോഗിച്ചതിലൂടെ സമ്പാദ്യം മുഴുവൻ നഷ്ടമായതാണ് ഒടുവിൽ വാഹനം മോഷ്ടിക്കാൻ തന്നെ പ്രേരിപ്പിച്ചതെന്നും ഇയാൾ പറഞ്ഞു. ഒരു ഏഷ്യൻ പ്രവാസി ഡെലിവറി ഡ്രൈവറാണ് ആഭ്യന്തര മന്ത്രാലയത്തിന്‍റെ ഓപ്പറേഷൻസ് റൂമിൽ മോഷണ വിവരം അറിയിച്ചത്. മുത്‌ല ഏരിയയിലെ ഒരു വീട്ടിൽ സാധനം ഡെലിവറി ചെയ്യുന്നതിനിടെ വിലാസം ഉറപ്പാക്കാൻ ഇയാൾ ഓടിക്കൊണ്ടിരുന്ന വാഹനം നിർത്തി പുറത്തിറങ്ങി. ഈ സമയത്ത്, അജ്ഞാതനായ ഒരാൾ വാഹനം ഓടിച്ചു പോയെന്നാണ് അറിയിച്ചത്.