ഖത്തർ എക്കണോമിക് ഫോറം നാളെ മുതൽ, വിവിധ രാജ്യങ്ങളിൽ നിന്നായി 2500 പ്രതിനിധികൾ പങ്കെടുക്കും

മേയ് 22 വ​രെ മൂ​ന്നു ദി​വ​സ​ങ്ങ​ളി​ലാ​യാണ് പരിപാടി നടക്കുന്നത്

ദോഹ: അ​ഞ്ചാ​മ​ത് ​ഖ​ത്ത​ർ സാ​മ്പ​ത്തി​ക ഫോ​റ​ത്തി​ന് മേ​യ് 20ന് ​ദോ​ഹ​യി​ൽ തു​ട​ക്കമാകും. മേയ് 22 വ​രെ മൂ​ന്നു ദി​വ​സ​ങ്ങ​ളി​ലാ​യി ന​ട​ക്കു​ന്ന പരിപാടിയിൽ ലോകത്തിന്റെ വിവിധ ഭാഗങ്ങളില്‍ നിന്നുള്ള സാമ്പത്തിക വിദഗ്ധരും ഭരണകര്‍ത്താക്കളും അടക്കം 2500ഓ​ളം പ്ര​തി​നി​ധി​ക​ൾ പ​​ങ്കെ​ടു​ക്കു​മെ​ന്ന് സം​ഘാ​ട​ക​ർ വാ​ർ​ത്ത​സ​മ്മേ​ള​ന​ത്തി​ൽ അറിയിച്ചു. ഖത്തർ അ​മീ​ർ ശൈ​ഖ് ത​മീം ബി​ൻ ഹ​മ​ദ് ആ​ൽ​ഥാ​നി​യു​ടെ നേ​തൃ​ത്വ​ത്തി​ൽ ന​ട​ക്കു​ന്ന ഫോ​റ​ത്തി​ന് ദോ​ഹ ഫെ​യ​ർ​മോ​ണ്ട് ഹോ​ട്ട​ലാണ് വേ​ദി​. ‘റോ​ഡ് ടു 2030; ​ആ​ഗോ​ള സാ​മ്പ​ത്തി​ക വ്യ​വ​സ്ഥ​യു​ടെ മാ​റ്റം’ എ​ന്ന പ്ര​മേ​യ​ത്തി​ലാ​ണ് അ​ഞ്ചാ​മ​ത് എക്കണോമിക് ​ഫോറം സം​ഘ​ടി​പ്പി​ക്കു​ന്ന​ത്.

രാഷ്ട്രീയം മുതല്‍ നിര്‍മിതബുദ്ധി വരെ വൈവിധ്യമാര്‍ന്ന വിഷയങ്ങളിലൂന്നിയാണ് വിവിധ സെഷനുകള്‍ ക്രമീകരിച്ചിരിക്കുന്നത്. ഖത്തർ ഊർജ സഹമന്ത്രിയും ഖത്തർ എനർജി സി.ഇ.ഒയുമായ സഅദ് ഷെരിദ അൽ കഅബി, ധനകാര്യമന്ത്രി അലി ബിൻ അഹമ്മദ് അൽ കുവാരി, സുപ്രീം കമ്മിറ്റി ഫോർ ഡെലിവറി ആന്റ് ലെഗസി മാനേജിങ് ഡയറക്ടർ ഹസൻ അൽ തവാദി തുടങ്ങിയവർ പ്രഭാഷകരായെത്തും. കോൺകോ ഫിലിപ്സ് ചെയർമാൻ റ്യാൻ എം ലാൻസ്, ട്രംപ് ഓർഗനൈസേഷൻ എക്സിക്യൂട്ടീവ് വൈസ് പ്രസിഡന്റ് ഡോണൾഡ് ട്രംപ് ജൂനിയർ എന്നിവരും പങ്കെടുക്കും. സംവാദങ്ങളോടൊപ്പം 20 ഓളം ധാരണാപത്രങ്ങളിലും ഒപ്പുവെക്കും.

ക​ഴി​ഞ്ഞ നാ​ലു പ​തി​പ്പു​ക​ളി​ലാ​യി ആ​ഗോ​ള സാ​മ്പ​ത്തി​ക, സു​ര​ക്ഷാ വി​ഷ​യ​ങ്ങ​ളി​ലെ ച​ർ​ച്ച​ക​ൾ​കൊ​ണ്ട് ശ്ര​ദ്ധേ​യ​മാ​യ എ​ക്ക​ണോ​മി​ക് ഫോ​റം വി​വി​ധ വി​ഷ​യ​ങ്ങ​ളി​ൽ ഉ​ത്ത​രം ന​ൽ​കി​യാ​ണ് അ​ഞ്ചാം പ​തി​പ്പി​ലേ​ക്ക് പ്ര​വേ​ശി​ക്കു​ന്ന​തെ​ന്ന് ഖ​ത്ത​ർ മീ​ഡി​യ സി​റ്റി സി.​ഇ.​ഒ ജാ​സിം മു​ഹ​മ്മ​ദ് അ​ൽ ഖോ​റി പ​റ​ഞ്ഞു. ലോകത്തിന്റെ വിവിധ ഭാഗങ്ങളിൽ നിന്നുള്ള രാ​ഷ്ട്ര​ത്ത​ല​വ​ന്മാ​ർ, ന​യ​രൂ​പ​ക​ർ​ത്താ​ക്ക​ൾ, കോ​ർ​പ​റേ​റ്റ് മേ​ധാ​വി​ക​ൾ, വ്യ​വ​സാ​യ പ്ര​തി​നി​ധി​ക​ൾ തു​ട​ങ്ങി​യ​വ​ർ പരിപാടിയുടെ ഭാഗമാകും.

ഏഷ്യാനെറ്റ് ന്യൂസ് ലൈവ് യൂട്യൂബിൽ കാണാം