തണുത്തുവിറച്ച് ഒമാൻ, രാജ്യത്ത് അതിശൈത്യം, താപനില പൂജ്യം ഡിഗ്രിക്കും താഴെയെത്തി

ഒമാനിലെ സൈഖിൽ താപനില പൂജ്യത്തിലും താഴെയെത്തി. രാജ്യത്ത് അതിശൈത്യം. ഡിസംബർ 21 ഞായറാഴ്ച അവസാനിച്ച 24 മണിക്കൂറിനിടെയാണ് സായ്ഖിൽ -0.1 ഡിഗ്രി സെൽഷ്യസ് രേഖപ്പെടുത്തിയത്.

മസ്‌കറ്റ്: ഒമാനിൽ ഈ ശൈത്യകാലത്തെ ഏറ്റവും കുറഞ്ഞ താപനില രേഖപ്പെടുത്തി. സിവിൽ ഏവിയേഷൻ അതോറിറ്റി പുറത്തുവിട്ട കണക്കുകൾ പ്രകാരം സൈഖിൽ താപനില -0.1 ഡിഗ്രി സെൽഷ്യസ് ആയി കുറഞ്ഞു. ഈ സീസണിൽ ആദ്യമായാണ് രാജ്യത്ത് താപനില പൂജ്യം ഡിഗ്രിക്ക് താഴെയെത്തുന്നത്.

ഡിസംബർ 21 ഞായറാഴ്ച അവസാനിച്ച 24 മണിക്കൂറിനിടെയാണ് സായ്ഖിൽ -0.1 ഡിഗ്രി സെൽഷ്യസ് രേഖപ്പെടുത്തിയത്. രാജ്യത്തിന്‍റെ വിവിധ ഭാഗങ്ങളിൽ പ്രത്യേകിച്ച് മലയോര മേഖലകളിൽ അനുഭവപ്പെടുന്ന ശീതതരംഗമാണ് താപനില ഇത്രയധികം കുറയാൻ കാരണം.

താപനില കുറഞ്ഞ സ്ഥലങ്ങൾ

തുമ്രൈത്ത് : 6.1 ഡിഗ്രി സെൽഷ്യസ്

ഹൈമ: 6.2 ഡിഗ്രി സെൽഷ്യസ്

അൽ മസ്യൂണ: 6.2 ഡിഗ്രി സെൽഷ്യസ്

യങ്കുൽ: 7.7 ഡിഗ്രി സെൽഷ്യസ്

ഉൾപ്രദേശങ്ങളിൽ പലയിടത്തും താപനില 9 ഡിഗ്രി സെൽഷ്യസിന് താഴെയാണ്.

ജാഗ്രതാ നിർദ്ദേശം

മലയോര മേഖലകളിൽ അർദ്ധരാത്രിയിലും പുലർച്ചെയും മഞ്ഞ് വീഴ്ചയ്ക്ക് സാധ്യതയുണ്ടെന്ന് കാലാവസ്ഥാ നിരീക്ഷണ കേന്ദ്രം മുന്നറിയിപ്പ് നൽകി. കാഴ്ചപരിധി കുറയാൻ സാധ്യതയുള്ളതിനാൽ വാഹനങ്ങൾ ഓടിക്കുന്നവർ അതീവ ജാഗ്രത പാലിക്കണമെന്ന് അധികൃതർ നിർദ്ദേശിച്ചു.