സൗദി അറേബ്യയ്ക്ക് നേരെ ആക്രമണം തുടർന്ന് ഹൂതികൾ; രണ്ട് ബാലിസ്റ്റിക് മിസൈലുകൾ വ്യോമസേന തകർത്തു

സൗദി അറേബ്യയിലെ ത്വായിഫ്, യാംബു നഗരങ്ങളെ ലക്ഷ്യമിട്ട് ഹൂതി വിമതർ തൊടുത്തുവിട്ട ബാലിസ്റ്റിക് മിസൈലുകൾ അറബ് സഖ്യസേന തകർത്തു. ജനവാസ മേഖലകളെ ലക്ഷ്യമിട്ടുള്ള ഇത്തരം ആക്രമണങ്ങളെ അത്യാധുനിക പ്രതിരോധ സംവിധാനങ്ങളിലൂടെ ശക്തമായി നേരിടുമെന്ന് സഖ്യസേന വ്യക്തമാക്കി.

റിയാദ്: സൗദി അറേബ്യയിലെ ത്വായിഫ്, യാംബു എന്നീ നഗരങ്ങളെ ലക്ഷ്യമിട്ട് ഹൂതി വിമതർ തൊടുത്തുവിട്ട രണ്ട് ബാലിസ്റ്റിക് മിസൈലുകൾ അറബ് സഖ്യസേന വിജയകരമായി തകർത്തു. സൗദി നയിക്കുന്ന അറബ് സഖ്യസേനയുടെ വക്താവ് മേജർ ജനറൽ തുർക്കി അൽ മാലികിയാണ് വാർത്താക്കുറിപ്പിലൂടെ ഇക്കാര്യം സ്ഥിരീകരിച്ചത്. മിസൈലുകൾ ലക്ഷ്യസ്ഥാനത്ത് എത്തുന്നതിന് മുൻപ് തന്നെ വ്യോമപ്രതിരോധ സേന ആകാശത്തുവെച്ച് തകർക്കുകയായിരുന്നു. ജനവാസ മേഖലകളെയും സാമ്പത്തിക പ്രാധാന്യമുള്ള കേന്ദ്രങ്ങളെയും ലക്ഷ്യമിട്ട് ഹൂതികൾ നടത്തുന്ന ആക്രമണ ശ്രമങ്ങളെ ശക്തമായി ചെറുക്കുമെന്ന് സഖ്യസേന വ്യക്തമാക്കി.

കഴിഞ്ഞ ദിവസവും ഹൂതി വിമതർ സൗദിയെ ലക്ഷ്യമിട്ട് ആക്രമണം നടത്തിയിരുന്നു. കിഴക്കൻ പ്രവിശ്യയെ ലക്ഷ്യമാക്കി എത്തിയ ഡ്രോണും തലസ്ഥാനമായ റിയാദിലേക്ക് തൊടുത്ത ബാലസ്റ്റിക് മിസൈലുമാണ് സൗദി വ്യോമസേന ആകാശത്തുവെച്ചുതന്നെ തകർത്തത്. ശനിയാഴ്ച പുറപ്പെടുവിച്ച വാർത്താക്കുറിപ്പിൽ സഖ്യസേനാ വക്താവ് ബ്രിഗേഡിയർ ജനറൽ തുർക്കി അൽ-മാലകി ഇക്കാര്യം സ്ഥിരീകരിച്ചിരുന്നു. രാജ്യത്തിന്റെ സുരക്ഷയും സ്ഥിരതയും തകർക്കാനുള്ള ഹൂതി മിലീഷ്യകളുടെ ശ്രമങ്ങളെ അത്യാധുനിക പ്രതിരോധ സംവിധാനങ്ങളിലൂടെ സൗദി അറേബ്യ ശക്തമായി നേരിടുകയാണെന്ന് അദ്ദേഹം വ്യക്തമാക്കി.