താമസ - തൊഴിൽ നിയമങ്ങൾ ലംഘിച്ച 9 പേർ, വാറണ്ടുള്ള 6 പേർ, നിരവധി വാഹനങ്ങൾ പിടിച്ചെടുത്തു; കുവൈത്തിൽ വൻ സുരക്ഷാ പരിശോധന

ആഭ്യന്തര മന്ത്രിയുടെ നിർദ്ദേശപ്രകാരം കുവൈത്തിൽ സുരക്ഷാ പരിശോധന ശക്തമാക്കി. നിരവധി നിയമലംഘകരെ അറസ്റ്റ് ചെയ്തു.

കുവൈത്ത് സിറ്റി: ആഭ്യന്തര മന്ത്രി ഷെയ്ഖ് ഫഹദ് യൂസഫ് സൗദ് അൽ സബാഹിന്റെ നിർദ്ദേശപ്രകാരം രാജ്യത്ത് സുരക്ഷാ പരിശോധന ശക്തമാക്കി. ട്രാഫിക്, ഓപ്പറേഷൻസ് അഫയേഴ്സ് സെക്ടർ - ജനറൽ ട്രാഫിക് ഡിപ്പാർട്ട്‌മെന്റും ജനറൽ ഡിപ്പാർട്ട്‌മെന്റ് ഓഫ് റെസ്‌ക്യൂ പോലീസും ചേർന്ന് 2025 ജൂലൈ 17 വ്യാഴാഴ്ച പുലർച്ചെ മഹബൂല മേഖലയിൽ വ്യാപകമായ സുരക്ഷാ, ട്രാഫിക് പരിശോധന നടത്തി. പൊതു സുരക്ഷ വർദ്ധിപ്പിക്കുന്നതിനും ക്രമസമാധാനം ഉറപ്പാക്കുന്നതിനാണ് ഈ നടപടിയെന്ന് ആഭ്യന്തര മന്ത്രാലയം വ്യക്തമാക്കി.

പരിശോധനയിൽ 437 വിവിധ ട്രാഫിക് നിയമലംഘനങ്ങൾ കണ്ടെത്തി. താമസ, തൊഴിൽ നിയമങ്ങൾ ലംഘിച്ച 9 പേരെ അറസ്റ്റ് ചെയ്തു. വാറണ്ടുള്ള 6 പേരെ പിടികൂടി. തിരിച്ചറിയൽ രേഖകളില്ലാത്ത 4 പേരെ തടഞ്ഞുവെച്ചു. ജുഡീഷ്യൽ അധികാരികൾക്ക് ആവശ്യപ്പെട്ട 3 വാഹനങ്ങളും മോട്ടോർ സൈക്കിളുകളും പിടിച്ചെടുത്തു. ലൈസൻസില്ലാതെ വാഹനമോടിച്ച 3 കുട്ടികളെ പിടികൂടി. സംശയാസ്പദമായ മയക്കുമരുന്നുകളും ലഹരിവസ്തുക്കളും കൈവശം വെച്ച 3 പേരെ കണ്ടെത്തി. ഒളിവിൽ പോയ 2 പേരെ അറസ്റ്റ് ചെയ്തു. അസ്വാഭാവികമായ അവസ്ഥയിലോ ലഹരിയിലോ ആയിരുന്ന രണ്ട് പേരെയും അറസ്റ്റ് ചെയ്തു.