റിയാദ് വിമാനത്താവളത്തിലെ സുരക്ഷാ നിയന്ത്രണം നീളും: യുഎഇ വിമാനക്കമ്പനികളുടെ റിയാദ് സർവീസുകൾ റദ്ദാക്കുന്നത് തുടരും

റിയാദ് കിങ് ഖാലിദ് അന്താരാഷ്ട്ര വിമാനത്താവളത്തിന് നേരെ വീണ്ടും ഹൂത്തി ആക്രമണം ഉണ്ടായി. ഇന്നലത്തെ ആക്രമണത്തിൽ 12 പേർ കൊല്ലപ്പെടുകയും 11 ഇന്ത്യക്കാർ ഉൾപ്പെടെ നിരവധി പേർക്ക് പരിക്കേൽക്കുകയും ചെയ്തു. സുരക്ഷാ കാരണങ്ങളാൽ യു.എ.ഇ വിമാനക്കമ്പനികൾ റിയാദിലേക്കുള്ള സർവീസുകൾ നിർത്തിവെച്ചു.

റിയാദ്: സൗദി അറേബ്യയിലെ റിയാദ് കിങ് ഖാലിദ് അന്താരാഷ്ട്ര വിമാനത്താവളത്തിൽ പ്രഖ്യാപിച്ച സുരക്ഷാ നിയന്ത്രണങ്ങളെ തുടർന്ന് യു.എ.ഇ വിമാനക്കമ്പനികളുടെ റിയാദ് സർവീസുകൾ റദ്ദാക്കുന്നത് തുടരും. ദുബായിയുടെ ഫ്ലൈദുബായ് ഈ മാസം 14 വരെ റിയാദിലേക്കുള്ള സർവീസുകൾ നിർത്തിവെച്ചിട്ടുണ്ട്. എത്തിഹാദ് എയർവേയ്‌സ് നാളെ വരെയുള്ള സർവീസുകൾ റദ്ദാക്കി. എത്തിഹാദിന്റെ എട്ട് സർവീസുകളാണ് ഇതോടെ റദ്ദാവുക. വിമാനത്താവളത്തിലുണ്ടായ ആക്രമണത്തെ തുടർന്ന് യാത്ര തടസ്സപ്പെട്ടവർക്ക് ആവശ്യമായ എല്ലാ പിന്തുണയും നൽകുമെന്ന് സൗദി അധികൃതർ അറിയിച്ചിട്ടുണ്ട്. മറ്റു വിമാനത്താവളങ്ങളിൽ നിന്ന് യാത്രകൾ തുടരാനുള്ള സൗകര്യങ്ങൾ ഉൾപ്പെടെ ഇതിനായി സജ്ജമാക്കിയിട്ടുണ്ട്.

റിയാദ് വിമാനത്താവളത്തിന് നേരെ വീണ്ടും ഹൂത്തി ആക്രമണം

സൗദി അറേബ്യയിലെ റിയാദ് കിങ് ഖാലിദ് അന്താരാഷ്ട്ര വിമാനത്താവളത്തിൽ വീണ്ടും ആക്രമണമുണ്ടായി. 12 പേർ കൊല്ലപ്പെട്ട ഇന്നലത്തെ ഹൂത്തി ആക്രമണത്തിന് ശേഷമാണ് ഇന്ന് വൈകീട്ടോടെ വിമാനത്താവളത്തിന് നേരെ വീണ്ടും ആക്രമണം റിപ്പോർട്ട് ചെയ്തത്. പാസഞ്ചർ ടെർമിനൽ നാലിന് നേരെയാണ് ആക്രമണം ഉണ്ടായതെന്ന് സൗദി അറേബ്യൻ സേന സ്ഥിരീകരിച്ചു. ആക്രമണത്തിനെത്തിയ ഒരു മിസൈൽ തകർത്തതായും ഇതിനെ തുടർന്നുണ്ടായ തീപിടിത്തം അണച്ചതായും സൗദി സേന അറിയിച്ചു. ഇന്നലത്തെ ആക്രമണത്തിന് പിന്നാലെ സൗദിയിലെ വിമാനത്താവളങ്ങളും തുറമുഖങ്ങളും ലക്ഷ്യമിട്ട് വീണ്ടും ആക്രമണം നടത്തുമെന്ന് ഹൂത്തികൾ ഭീഷണി മുഴക്കിയിരുന്നു. യാത്രക്കാർക്കും ജീവനക്കാർക്കും മുന്നറിയിപ്പ് നൽകിയ ശേഷമായിരുന്നു രൂക്ഷമായ ആക്രമണങ്ങൾ തുടരുമെന്ന് ഹൂത്തികൾ വ്യക്തമാക്കിയത്. വീണ്ടും ആക്രമണമുണ്ടായതോടെ ഹൂത്തികൾക്കെതിരെ ശക്തമായ തിരിച്ചടി നൽകാൻ സൗദി സേന തയ്യാറെടുക്കുകയാണെന്നാണ് റിപ്പോർട്ടുകൾ.

ഇന്നലത്തെ ആക്രമണത്തിൽ 12 മരണം; 11 ഇന്ത്യക്കാർക്ക് പരിക്ക്

റിയാദ് കിങ് ഖാലിദ് അന്താരാഷ്ട്ര വിമാനത്താവളത്തിൽ ഇന്നലെ ഹൂത്തികൾ നടത്തിയ രൂക്ഷമായ ആക്രമണത്തിൽ 12 പേർ കൊല്ലപ്പെടുകയും 309 പേർക്ക് പരിക്കേൽക്കുകയും ചെയ്തിരുന്നു. മേഖലയിൽ നിലവിലെ യുദ്ധസാഹചര്യം ഉടലെടുത്ത ശേഷം ഒരു അറബ് - ഗൾഫ് രാജ്യത്തുണ്ടാകുന്ന ഏറ്റവും വലിയ ആൾനാശവും ഭീകരമായ നാശനഷ്ടവുമാണ് റിയാദിൽ റിപ്പോർട്ട് ചെയ്തത്. കൊല്ലപ്പെട്ടവരിൽ നാല് സൗദി പൗരന്മാരും എട്ട് വിദേശികളുമാണുള്ളത്. അമേരിക്ക, ജോർദാൻ, ഈജിപ്ത്, സിറിയ, പലസ്തീൻ, സുഡാൻ, ബംഗ്ലാദേശ് എന്നീ രാജ്യങ്ങളുടെ പൗരന്മാരാണ് മരിച്ചത്.

പരിക്കേറ്റ പലരുടെയും നില ഗുരുതരമായി തുടരുകയാണ്. പരിക്കേറ്റവരിൽ 11 ഇന്ത്യക്കാരുണ്ടെന്നാണ് ഏറ്റവും പുതിയ വിവരം. അതേസമയം ദമാം കിങ് ഫഹദ് അന്താരാഷ്ട്ര വിമാനത്താവളത്തിന് നേരെയും ആക്രമണശ്രമമുണ്ടായി. തകർത്ത മിസൈലിന്റെ അവശിഷ്ടങ്ങൾ വിമാനത്താവള പരിസരത്ത് പതിച്ചു. അൽഖർജിലും കിഴക്കൻ മേഖലയിലും ആക്രമണ ശ്രമങ്ങളുണ്ടായി. ആക്രമണങ്ങളെ ഐക്യരാഷ്ട്ര സഭാ സെക്രട്ടറി ജനറലും മറ്റ് ലോകരാഷ്ട്ര നേതാക്കളും ശക്തമായി അപലപിച്ചു. ഹൂത്തികളുടേത് സമ്പൂർണ്ണ യുദ്ധക്കുറ്റമാണെന്ന് ചൂണ്ടിക്കാട്ടി സൗദി തിരിച്ചടി ശക്തമാക്കിയിട്ടുണ്ട്.

അപലപിച്ച് ഇസ്രായേൽ

അതിനിടെ റിയാദിലുണ്ടായ ഭീകരാക്രമണത്തെ രൂക്ഷമായി അപലപിച്ച് ഇസ്രായേൽ പ്രധാനമന്ത്രി ബെഞ്ചമിൻ നെതന്യാഹു രംഗത്തെത്തി. തീവ്രവാദത്തിനെതിരെ ഒറ്റക്കെട്ടായി ശക്തമായി പോരാടണമെന്ന് അദ്ദേഹം ആഹ്വാനം ചെയ്തു. ശക്തവും സുരക്ഷിതവുമായ ഒരു മിഡിൽ ഈസ്റ്റാണ് ഇസ്രായേൽ ആഗ്രഹിക്കുന്നതെന്നും നെതന്യാഹു കൂട്ടിച്ചേർത്തു.