ഷാർജയിൽ ഗതാഗത നിയന്ത്രണം; ഓഗസ്റ്റ് 16 മുതൽ താത്കാലിക മാറ്റങ്ങൾ, വാഹനമോടിക്കുന്നവർ ശ്രദ്ധിക്കുക

ഷാർജയിലെ ശൈഖ് ഖലീഫ ബിൻ സായിദ് സ്ട്രീറ്റിന്റെയും മലീഹ സ്ട്രീറ്റിന്റെയും കവലയിൽ നവീകരണ പ്രവൃത്തികൾക്കായി ഓഗസ്റ്റ് 16 മുതൽ താത്കാലികമായി റോഡ് വഴിതിരിച്ചുവിടുമെന്ന് ഷാർജ റോഡ്സ് ആൻഡ് ട്രാൻസ്പോർട്ട് അതോറിറ്റി അറിയിച്ചു. ഡ്രൈവർമാർ ബദൽ മാർഗ്ഗങ്ങൾ ഉപയോഗിക്കണമെന്നും ട്രാഫിക് സൈനുകൾ പാലിക്കണമെന്നും അധികൃതർ നിർദ്ദേശിച്ചു.

ഷാർജ: നഗരത്തിലെ ഗതാഗത സൗകര്യങ്ങൾ കൂടുതൽ മെച്ചപ്പെടുത്തുന്നതിന്റെ ഭാഗമായി ശൈഖ് ഖലീഫ ബിൻ സായിദ് സ്ട്രീറ്റിന്റെയും മലീഹ സ്ട്രീറ്റിന്റെയും കവലയിൽ താത്കാലികമായി റോഡ് വഴിതിരിച്ചുവിടുമെന്ന് ഷാർജ റോഡ്സ് ആൻഡ് ട്രാൻസ്പോർട്ട് അതോറിറ്റി അറിയിച്ചു.

കവലകളുടെ നവീകരണ പ്രവൃത്തികൾ ഘട്ടംഘട്ടമായി പൂർത്തിയാക്കുന്നതിന്റെ ഭാഗമായാണ് ഈ നടപടി. ഓഗസ്റ്റ് 16 ഞായറാഴ്ച മുതലാണ് താത്കാലിക അടച്ചിടലും വഴിതിരിച്ചുവിടലും പ്രാബല്യത്തിൽ വരുന്നത്. മേഖലയിലൂടെ യാത്ര ചെയ്യുന്ന ഡ്രൈവർമാർ ട്രാഫിക് ഡൈവേർഷൻ മാപ്പിൽ നൽകിയിട്ടുള്ള ബദൽ മാർഗ്ഗങ്ങൾ ഉപയോഗിക്കണമെന്ന് അതോറിറ്റി നിർദ്ദേശിച്ചു. വാഹനമോടിക്കുന്നവർ യാത്ര തുടങ്ങുന്നതിന് മുമ്പ് തന്നെ സമയവും ബദൽ റോഡുകളും പ്ലാൻ ചെയ്യുക. താത്കാലിക ട്രാഫിക് സൈനുകളും സുരക്ഷാ നിർദ്ദേശങ്ങളും കർശനമായി പിന്തുടരുക. ഗതാഗത കുരുക്ക് കാരണം യാത്രയ്ക്ക് കൂടുതൽ സമയം എടുത്തേക്കാം എന്നതിനാൽ നേരത്തെ ഇറങ്ങുക.

നവീകരണ പ്രവൃത്തികൾ നടക്കുന്ന പ്രധാന കവലയിലൂടെയുള്ള യാത്ര പരമാവധി ഒഴിവാക്കുക. ശരിയായ രീതിയിലുള്ള ഗതാഗത പ്രവാഹം ഉറപ്പാക്കുന്നതിനും റോഡ് ശൃംഖലയുടെ കാര്യക്ഷമത വർധിപ്പിക്കുന്നതിനുമായി ഏർപ്പെടുത്തിയിരിക്കുന്ന ഈ നിയന്ത്രണങ്ങളോട് പൊതുജനങ്ങൾ സഹകരിക്കണമെന്ന് അതോറിറ്റി അഭ്യർത്ഥിച്ചു. പ്രവൃത്തികൾ പൂർത്തിയായി റോഡ് സാധാരണ നിലയിലാകുന്നതുവരെ നിലവിലെ ക്രമീകരണങ്ങൾ തുടരും.