യുഎഇയിൽ ഈ ആഴ്ച അസ്ഥിരമായ കാലാവസ്ഥ, വരും ദിവസങ്ങളിൽ മഴയ്ക്ക് സാധ്യത, താപനിലയിലും മാറ്റം

ഈ ആഴ്ച യുഎഇയിൽ അസ്ഥിരമായ കാലാവസ്ഥ ആയിരിക്കുമെന്നും മഴയ്ക്ക് സാധ്യതയുണ്ടെന്നും ദേശീയ കാലാവസ്ഥ കേന്ദ്രത്തിന്‍റെ മുന്നറിയിപ്പ്. വ്യാഴാഴ്ചയോടെ താപനില വീണ്ടും നേരിയ തോതിൽ ഉയരും. പുലർച്ചെ ഈർപ്പമുള്ള കാലാവസ്ഥ തുടരും.

അബുദാബി: യുഎഇയിൽ നവംബർ 3 മുതൽ 7 വരെ അസ്ഥിരമായ കാലാവസ്ഥ തുടരുമെന്ന് ദേശീയ കാലാവസ്ഥാ കേന്ദ്രം മുന്നറിയിപ്പ് നൽകി. ചില സമയങ്ങളിൽ നേരിയതോ മിതമായതോ ആയ മഴ ലഭിക്കാൻ സാധ്യതയുണ്ട്. ശരത്കാലത്തിൽ നിന്ന് ശൈത്യകാലത്തിലേക്കുള്ള മാറ്റമാണ് ഈ കാലാവസ്ഥാ വ്യതിയാനത്തിന് കാരണം. ചൊവ്വ, ബുധൻ ദിവസങ്ങളിൽ താപനിലയിൽ നേരിയ കുറവ് രേഖപ്പെടുത്താൻ സാധ്യതയുണ്ട്.

ചില തീരദേശ, ഉൾപ്രദേശങ്ങളിൽ ഭാഗികമായി മേഘാവൃതമായ ആകാശവും പുലർച്ചെ ഈർപ്പമുള്ള അന്തരീക്ഷവും അനുഭവപ്പെടും. തീരദേശങ്ങളിലും ദ്വീപുകളിലും മേഘങ്ങൾ രൂപപ്പെടാൻ സാധ്യതയുണ്ട്. ഇത് ചിലയിടങ്ങളിൽ ചെറിയ മഴയ്ക്ക് കാരണമായേക്കാം.

വ്യാഴാഴ്ചയോടെ താപനില വീണ്ടും നേരിയ തോതിൽ ഉയരും. പുലർച്ചെ ഈർപ്പമുള്ള കാലാവസ്ഥ തുടരും. പടിഞ്ഞാറൻ പ്രദേശങ്ങളിൽ ഭാഗികമായോ ഇടയ്ക്കിടെയോ മേഘാവൃതമായ അന്തരീക്ഷമായിരിക്കും. ചില സമയങ്ങളിൽ ചെറിയതോ മിതമായതോ ആയ മഴയ്ക്ക് സാധ്യതയുണ്ട്. കാറ്റ് തെക്കുകിഴക്ക് ദിശയിൽ നിന്നും വടക്കുകിഴക്ക് ദിശയിലേക്ക് മാറി വീശും. ഇത് നേരിയതോ മിതമായതോ ആയിരിക്കും, എന്നാൽ ചില സമയങ്ങളിൽ ശക്തമായേക്കാം.

തീരദേശ, ഉൾപ്രദേശങ്ങളിൽ വെള്ളിയാഴ്ച പുലർച്ചെ ഈർപ്പം നിലനിൽക്കും. പ്രധാനമായും അൽ ദഫ്‌റ മേഖലയിൽ ഭാഗികമായോ കൂടുതലായോ മേഘാവൃതമായ അന്തരീക്ഷമായിരിക്കും. ഈ പ്രദേശങ്ങളിൽ ചെറിയതോ മിതമായതോ ആയ മഴയ്ക്ക് സാധ്യതയുണ്ട്. കാറ്റ് തെക്കുകിഴക്ക് ദിശയിൽ നിന്ന് വടക്കുകിഴക്ക് ദിശയിലേക്ക് നേരിയതോ മിതമായതോ ആയ ശക്തിയിൽ തുടരും, ചിലപ്പോൾ ഇത് ശക്തമായേക്കാം.

ശനിയാഴ്ചത്തെ താപനിലയിൽ വീണ്ടും നേരിയ കുറവുണ്ടാകാൻ സാധ്യതയുണ്ട്. പുലർച്ചെ ഈർപ്പമുള്ള കാലാവസ്ഥ തുടരും. പടിഞ്ഞാറൻ പ്രദേശങ്ങളിൽ ചില സമയങ്ങളിൽ ഭാഗികമായി മേഘാവൃതമായതോ അല്ലെങ്കിൽ പൂർണ്ണമായും മേഘാവൃതമായതോ ആയ അന്തരീക്ഷമായിരിക്കും. യുഎഇയിൽ ഈ ആഴ്ച വസന്തകാലത്തിന് സമാനമായ തണുപ്പും ഇടയ്ക്കിടെയുള്ള മഴയും അനുഭവപ്പെടാൻ സാധ്യതയുണ്ടെന്ന് കാലാവസ്ഥ കേന്ദ്രം വ്യക്തമാക്കി.