ഒക്‌ടോബറില്‍ വിരുന്നെത്തുന്നു സ്വാൻ വാൽനക്ഷത്രം; ആകാംക്ഷയോടെ വാനനിരീക്ഷകര്‍

ഒക്‌ടോബര്‍ മാസത്തില്‍ Comet C2025 R2 SWAN വാല്‍നക്ഷത്രം ഭൂമിക്ക് ഏറ്റവും അടുത്തെത്തും. ഭൂമിയില്‍ നിന്ന് ഈ കോമറ്റിനെ കാണാനുള്ള അവസരം ചിലപ്പോള്‍ ലഭിച്ചേക്കാം.

ഒക്‌ടോബര്‍ മാസത്തില്‍ കോമറ്റ് സി/2025 ആര്‍2 (സ്വാന്‍) വാല്‍നക്ഷത്രം ഭൂമിക്ക് ഏറ്റവും അടുത്തെത്തുമെന്ന് ഗവേഷകര്‍. സെപ്റ്റംബർ 10ന് യുക്രൈന്‍ വാനനിരീക്ഷകനായ വ്‌ളാഡിമിർ ബെസുഗ്ലിയാണ് നാസയുടെ SOHO ബഹിരാകാശ പേടകത്തിൽ നിന്നുള്ള ചിത്രങ്ങളിൽ നിന്നാദ്യമായി തിളക്കത്തോടെയുള്ള ഈ ബഹിരാകാശ വസ്‌തുവിനെ തിരിച്ചറിഞ്ഞത്. പിന്നീട് അതൊരു വാൽനക്ഷത്രമാണെന്ന് സ്ഥിരീകരിക്കുകയായിരുന്നു. സെപ്റ്റംബർ 15ന് ഇതിന് ഔദ്യോഗികമായി Comet C/2025 R2 (SWAN) എന്ന് പേരിട്ടു. സോഹോയുടെ സോളാർ വിൻഡ് അനിസോട്രോപിസ് (SWAN) ക്യാമറ ഉപയോഗിച്ച് കണ്ടെത്തിയ 20-ാമത്തെ വാൽനക്ഷത്രമായി ഇത് മാറി.

കോമറ്റ് സി/2025 ആര്‍2 (സ്വാന്‍)

ഇക്കഴിഞ്ഞ സെപ്റ്റംബർ 12ന് കോമറ്റ് സി/2025 ആര്‍2 (സ്വാന്‍) വാൽനക്ഷത്രം സൂര്യന് ഏറ്റവും അടുത്തെത്തിയെന്നാണ് സെൻട്രൽ ബ്യൂറോ ഫോർ ആസ്ട്രോണമിക്കൽ ടെലിഗ്രാമുകളുടെ വിലയിരുത്തല്‍. ഈ വാല്‍നക്ഷത്രം ഒക്‌ടോബര്‍ 21ന് ഭൂമിയോട് ഏറ്റവും അടുത്തെത്തുമെന്നും ജ്യോതിശാസ്‌ത്രജ്ഞര്‍ കരുതുന്നു. സമീപകാല കണക്കുകൾ സൂചിപ്പിക്കുന്നത് കോമറ്റ് സി/2025 ആര്‍2 (സ്വാന്‍) വാല്‍നക്ഷത്രത്തിന്‍റെ തെളിച്ചം ഏകദേശം +7 മാഗ്നിറ്റ്യൂഡ് ആണെന്നും നഗ്നനേത്രങ്ങൾ കൊണ്ട് കാണാവുന്നതിന്‍റെ പരിധിക്കപ്പുറമാണെന്നുമാണ്. എങ്കിലും സെയ്ച്ചി യോഷിഡ, ഗിഡിയൻ വാൻ ബ്യൂട്ടെനെൻ തുടങ്ങിയ വിദഗ്‌ധര്‍ വിശ്വസിക്കുന്നത് ഇരുണ്ട സാഹചര്യങ്ങളിൽ ദൃശ്യപരതയുടെ പോയിന്‍റായ +6-ലേക്ക് ഈ വാല്‍നക്ഷത്രം എത്തിയേക്കാമെന്നാണ്. എങ്കിലും, വാതക ഘടന അതിനെ മങ്ങിയതായി കാണുന്നതിന് കാരണമാകുമെന്ന് ജ്യോതിശാസ്ത്രജ്ഞർ സൂചിപ്പിക്കുന്നു.

പ്രതീക്ഷയോടെ വാനനിരീക്ഷകര്‍

ഒക്‌ടോബര്‍ രണ്ട് മുതൽ 20 വരെ കോമറ്റ് സി/2025 ആര്‍2 (സ്വാന്‍) വാൽനക്ഷത്രത്തിന്‍റെ മാഗ്നിറ്റ്യൂഡ് +6 ആയി തുടരുമെന്നാണ് ഗവേഷകര്‍ കരുതുന്നത്. ഭൂമിയില്‍ നിന്ന് നഗ്നനേത്രങ്ങള്‍ കൊണ്ട് കാണാനുള്ള സാധ്യത വളരെ വിരളമാണെങ്കിലും ഈ വാല്‍നക്ഷത്രം പ്രതീക്ഷ നല്‍കുന്നത് തുടരുന്നതായാണ് വാനനിരീക്ഷകര്‍ പറയുന്നത്. ഒക്ടോബർ 21ന് ഭൂമിയോട് ഏറ്റവും അടുത്തെത്തുമ്പോൾ ഈ വാല്‍നക്ഷത്രം അതിന്‍റെ പരമാവധി മാഗ്നിറ്റ്യൂഡ് ആയി +6 ആയി ഉയരുമെന്ന് കണക്കാക്കുന്നു. മങ്ങിയതും വാതകം നിറഞ്ഞതുമാണെങ്കിലും ലോകമെമ്പാടുമുള്ള ആകാശ നിരീക്ഷകര്‍ കോമറ്റ് സി/2025 ആര്‍2 (സ്വാന്‍) വാല്‍നക്ഷത്രത്തെ ഭൂമിയില്‍ നിന്ന് നേരിട്ട് കാണാനാകുമെന്ന ശുഭപ്രതീക്ഷയിലാണ്.