ഓണാഘോഷമായിരുന്നു ഈ വാരം എല്ലാ സീരിയൽ സെറ്റുകളിലെയും വിശേഷം
പ്രദീപ് പണിക്കരുടെ രചനയില്‍ മനു സുധാകരന്‍ സംവിധാനം ചെയ്യുന്ന പരമ്പരയാണ് 'മൗനരാഗം'. 'ഭാര്യ' എന്ന പരമ്പരയ്ക്കു ശേഷമാണ് പുതിയ പരമ്പരയുമായി മനു സുധാകരന്‍ എത്തിയത്. പ്രദീപ് പണിക്കരാണ് മൗനരാഗത്തിലെ നായികയായ ഐശ്വര്യ റംസായിയെ ആദ്യമായി മലയാളത്തില്‍ അവതരിപ്പിച്ചത്. അന്യഭാഷ നടിയായ ഐശ്വര്യയെ ഇരുകൈയും നീട്ടിയാണ് പ്രേക്ഷകർ സ്വീകരിച്ചത്. ഓണാഘോഷമായിരുന്നു ഈ വാരത്തിലെ എല്ലാ സീരിയൽ സെറ്റുകളിലെയും വിശേഷം. അത്തരത്തിൽ ഓണ വിശേഷം പങ്കിട്ടിരിക്കുകയാണ് ഐശ്വര്യയും.
ഷൂട്ടിംഗ് ലൊക്കേഷനിൽ സാരിയുടുത്ത് ഊഞ്ഞാൽ ആടുന്ന വീഡിയോയാണ് ഐശ്വര്യ പങ്കുവെച്ചിരിക്കുന്നത്. ഊഞ്ഞാൽ ആട്ടുന്നത് സീരിയലിലെ ഐശ്വര്യയുടെ നായകൻ നലീഫ് ജിയയാണ്. ഏറെ ആഹ്ലാദത്തോടെയാണ് താരങ്ങൾ ഓണത്തിനെ വരവേറ്റത് എന്ന് തെളിയിക്കുന്നതാണ് വീഡിയോ. ഓണം വന്നല്ലോ ഊഞ്ഞാലിട്ടല്ലോ എന്ന ഗാനമാണ് വീഡിയോയുടെ പശ്ചാത്തലത്തിൽ നൽകിയിരിക്കുന്നത്. സീരിയലിലെ മറ്റ് താരങ്ങളെയും ഊഞ്ഞാലിന് ചുറ്റും കാണാം.
ഊമയായ കല്ല്യാണിയുടെയും കിരണിന്റെയും പ്രണയവും വിവാഹവുമെല്ലാമാണ് മൗനരാഗം പരമ്പര പറയുന്നത്. കിരണായി പരമ്പരയിലെത്തുന്നത് നലീഫാണ്. തമിഴ്‌നാട് കന്യാകുമാരി സ്വദേശിയായ നലീഫിന്റെ ആദ്യ പരമ്പരയാണ് മൗനരാഗം. നായികയായ കല്ല്യാണിയായി പരമ്പരയിലെത്തുന്നത് തമിഴ് പരമ്പരകളിലൂടെ അഭിനയത്തിലേക്കെത്തിയ ഐശ്വര്യ റാംസായിയാണ്.
കാലങ്ങളായി ആരാധകർ കാത്തിരുന്ന പരമ്പരയിലെ കല്യാണി കിരൺ വിവാഹം പോയ എപ്പിസോഡുകളിലെ പ്രധാന ആകര്‍ഷണമായിരുന്നു. ഏഷ്യാനെറ്റിലെ മറ്റ് സീരിയലിലെ താരങ്ങളും പങ്കെടുത്ത കളർഫുൾ കല്യാണമായിരുന്നു അത്. സിനിമാ താരം ശ്വേതാ മേനോന്‍, കുടുംബവിളക്ക് കഥാപാത്രങ്ങളായ പ്രതീഷ്, സഞ്ജന, പാടാത്ത പൈങ്കിളിയിലെ കണ്മണി, തൂവല്‍സ്പര്‍ശത്തിലെ മാളു, ശ്രേയ നന്ദിനി തുടങ്ങിയവരെല്ലാം മൌനരാഗം വിവാഹ റിസപ്ഷനായി എത്തിയിരുന്നു. ആ വീട്ടിൽ ഓരോ ദിവസവും എന്ത് നടക്കുന്നു എന്ന് കാണാനുള്ള ആകാംഷയിലാണ് ആരാധകർ.