ശ്രീലങ്കക്കെതിരായ മൂന്നാം ട്വന്‍റി 20 ഇന്ന്; ബേസില്‍ തമ്പി കളിച്ചേക്കും

മുംബൈ: ഇന്ത്യ-ശ്രീലങ്ക ട്വന്‍റി 20 പരമ്പരയിലെ അവസാന മത്സരം ഇന്ന് മുംബൈയില്‍. വാംഖഡെ സ്റ്റേഡിയത്തില്‍ വൈകിട്ട് ഏഴ് മണിക്കാണ് കളി തുടങ്ങുക. ഇന്‍ഡോറിലെ തകര്‍പ്പന്‍ ജയത്തോടെ ഇന്ത്യ പരമ്പര നേടിക്കഴിഞ്ഞു. ഇതുകൊണ്ടുതന്നെ ഇന്ത്യ ടീമില്‍ മാറ്റം വരുത്തിയേക്കും. ജയ്ദേവ് ഉനാദ്കത്തിന് പകരം ബേസില്‍ തമ്പി ടീമിലെത്താനാണ് സാധ്യത.

ഈ വര്‍ഷത്തെ അവസാന മത്സരത്തിലും ജയിച്ച് പരമ്പര തൂത്തുവാരുകയാണ് രോഹിത് ശര്‍മയുടെയും സംഘത്തിന്‍റെയും ലക്ഷ്യം. ടെസ്റ്റ്, ഏകദിന പരമ്പര നഷ്ടമായ ലങ്ക ആശ്വാസ ജയം തേടിയാണ് മുംബൈയില്‍ ഇറങ്ങുക. ആദ്യ മത്സരത്തില്‍ 93 റണ്‍സിനും രണ്ടാം മത്സരത്തില്‍ 88 റണ്‍സിനുമാണ് ഇന്ത്യ ശ്രീലങ്കയെ തകര്‍ത്തത്.