ദാദയ്ക്ക് മറുപടിയുമായി വീരു; അധികം പതപ്പിക്കേണ്ട ?

ദില്ലി: ഇന്ത്യന്‍ കോച്ച് സ്ഥാനത്തേക്ക് തന്നെ പരിഗണിക്കാതിരിക്കാന്‍ ചില കളികള്‍ നടന്നു എന്ന സെവാഗിന്റെ വെളിപ്പെടുത്തല്‍ ഏറെ ചര്‍ച്ചയായിരുന്നു. ബിസിസിഐ ആവശ്യപ്പെട്ടിട്ട് അപേക്ഷ നല്‍കിയ തന്നെ ഇന്ത്യന്‍ ക്രിക്കറ്റിലെ ഗ്രൂപ്പുകളികളാണ് പിന്നിലാക്കിയത് എന്ന് പരോക്ഷമായി സൂചിപ്പിക്കുകയായിരുന്നു സെവാഗ്. എന്നാല്‍ ഇതിന് മറുപടിയുമായി കോച്ചിനെ തെരഞ്ഞെടുക്കാനുള്ള ഉപദേശക സമിതി അംഗം കൂടിയായിരുന്ന സൗരവ് ഗാംഗുലി കഴിഞ്ഞ ദിവസം രംഗത്തെത്തിയിരുന്നു.

സെവാഗിന്റേത് മണ്ടത്തരമാണെന്നായിരുന്നു ദാദയുടെ മറുപടി.ഗാംഗുലിയുടെ പ്രസ്താവന വന്നിട്ടും ട്വിറ്ററില്‍ എല്ലാത്തിനും കുറിക്ക് കൊള്ളുന്ന മറുപടി പറയാറുള്ള സേവാഗ് ഒരക്ഷരം മിണ്ടിയില്ല. എന്നാല്‍ വീരുവിനെക്കുറിച്ച് പറഞ്ഞതല്‍പ്പം കൂടിപ്പോയില്ലേ എന്ന് വീണ്ടുവിചാരമുണ്ടായ ഗാംഗുലി ഇന്ന് നിലപാട് മയപ്പെടുത്തി. സെവാഗിന്റെ പ്രസ്താവന തെറ്റാണെന്നാണ് താന്‍ ഉദ്ദേശിച്ചത് എന്നും വാര്‍ത്തയില്‍ തന്‍റെ വാക്കുകള്‍ വളച്ചൊടിച്ചതാണെന്നും സേവാഗുമായി ഉടന്‍ കാണുമെന്നും ഗാംഗുലി പറഞ്ഞിരുന്നു.

എന്നാലിപ്പോള്‍ നേരിട്ട് ഗാംഗുലിക്ക് മറുപടി നല്‍കാതെ ദാദയ്ക്ക് പരോക്ഷ മറുപടിയുമായി എത്തിയിരിക്കുകയാണ് വീരു. താങ്കള്‍ ചെയ്യുന്ന എല്ലാ കാര്യങ്ങളെയും ന്യായീകരിക്കേണ്ട കാര്യമല്ലെന്ന് പറഞ്ഞ വീരു അധികം പതപ്പിക്കേണ്ടന്നും ഇന്‍സ്റ്റഗ്രാമില്‍ വ്യക്തമാക്കി. ഗാംഗുലിയ്ക്കുള്ള മറുപടിയാണിതെന്ന് വ്യക്തമാണെങ്കിലും പോസ്റ്റില്‍ എവിടെയും ഗാംഗുലിയുടെ പേര് പരാമര്‍ശിക്കുന്നുമില്ല.പതിവില്‍ നിന്ന് വ്യത്യസ്തമായി ദാദയ്ക്ക് മറുപടി നല്‍കാന്‍ അധികം ഉപയോഗിക്കാത്ത ഇന്‍സ്റ്റഗ്രാം ആണ് വീരു തെരഞ്ഞെടുത്തതെന്നും ശ്രദ്ധേയമായി.

ഇന്ത്യ ടിവിക്ക് നല്‍കിയ അഭിമുഖത്തിലാണ് കഴിഞ്ഞ ദിവസം സേവാഗ് ബിസിസിഐയെ പ്രതിക്കൂട്ടിലാക്കുന്ന തരത്തില്‍ തുറന്നടിച്ചത്. സച്ചിനും ഗാംഗുലിയും ലക്ഷ്മണനും അടങ്ങുന്ന ക്രിക്കറ്റ് ഉപദേശക സമിതിക്കെതിരെയും പരോക്ഷമായ വിമര്‍ശനമായിരുന്നു സേവാഗിന്റെ പ്രസ്താവന.