ജിയോ ഫോണ് ബുക്കിങ് ആരംഭിച്ചു; പ്രീ-ബുക്കിംഗിന് 500 രൂപ മതി
Synopsis
ഏവരും കാത്തിരുന്ന റിലയന്സ് ജിയോയുടെ സ്മാര്ട്ട് ഫോണ് ബുക്കിങ് തുടങ്ങി. ഇന്ന് വൈകിട്ട് അഞ്ചര മണിയോടെയാണ് ജിയോ സ്മാര്ട്ട് ഫോണിനുള്ള ബുക്കിങ് ആരംഭിച്ചത്. റീട്ടെയില് സ്റ്റോറുകള്, മൈജിയോ ആപ്പ്, ജിയോ വെബ്സൈറ്റ് (www.jio.com) എന്നിവ വഴിയാണ് ജിയോ ഫോണ് ബുക്ക് ചെയ്യേണ്ടത്. നേരത്തെ പ്രഖ്യാപിച്ചിരുന്ന 1500ന് പകരം 500 രൂപ മാത്രം നല്കി ഫോണ് ബുക്ക് ചെയ്യാനുള്ള അവസരവും ജിയോ ഒരുക്കിയിട്ടുണ്ട്. ഫോണിന്റെ വിലയായ 1500ല് ശേഷിച്ച ആയിരം രൂപ ഫോണ് കൈയില് കിട്ടുമ്പോള് നല്കിയാല് മതി. 4ജി കണക്ടിവിറ്റിയുള്ള ഫോണിന്റെ വില്പന അടുത്ത മാസം ആദ്യ ആഴ്ചയോടെ ആരംഭിക്കും.
ജിയോ ഫോണ് വാങ്ങാന് 1500 രൂപ നല്കണമെങ്കിലും മൂന്നു വര്ഷം പൂര്ത്തിയാകുമ്പോള് മണിബാക്ക് ഓഫര് എന്ന തരത്തില് ഈ പണം ജിയോ തിരികെ നല്കും. അതുകൊണ്ടുതന്നെ ജിയോ ഫോണ് വാങ്ങാന് ഉപഭോക്താവിന് പണമൊന്നും ചെലവാകുന്നില്ല. ഒരു സെക്യൂരിറ്റി ഡെപ്പോസിറ്റ് എന്ന തരത്തില് മാത്രമാണ് ഫോണ് വാങ്ങുന്നവരില്നിന്ന് 1500 രൂപ ഈടാകുന്നതെന്ന് സാരം.
ജിയോ ഫോണ് വാങ്ങുന്നവര് 153 രൂപയ്ക്ക് റീച്ചാര്ജ് ചെയ്താല് പ്രതിദിനം 500 എംബി ഡാറ്റ ഉപഭോക്താവിന് ലഭ്യമാകും. കൂടുതല് ഡാറ്റ ഉപയോഗിക്കേണ്ടവര് 309 രൂപ മുതല് മുകളിലേക്കുള്ള പ്ലാനുകളാണ് തെരഞ്ഞെടുക്കേണ്ടത്. ഇതുകൂടാതെ ജിയോ ഫോണ് ഉപഭോക്താക്കള്ക്കായി പ്രതിവാര റീച്ചാര്ജ് ഓപ്ഷനും ഉണ്ടാകും. 54 രൂപയ്ക്ക് റീചാര്ജ് ചെയ്താല് ഒരു ആഴ്ച വാലിഡിറ്റിയില് ഡാറ്റ ഉപയോഗിക്കാനാകും. അതുപോലെ രണ്ടു ദിവസത്തെ വാലിഡിറ്റി ലഭിക്കാന് 24 രൂപയ്ക്കാണ് റീച്ചാര്ജ് ചെയ്യേണ്ടത്.
ഏറ്റവും പുതിയ Technology News മലയാളത്തിൽ അറിയാൻ ഏഷ്യാനെറ്റ് ന്യൂസ് മലയാളം ഒപ്പമിരിക്കുക. Mobile Reviews in Malayalam, AI പോലുള്ള പുതുപുത്തൻ സാങ്കേതിക നവീകരണങ്ങൾ തുടങ്ങി ടെക് ലോകത്തിലെ എല്ലാ പ്രധാന അപ്ഡേറ്റുകളും അറിയാൻ Asianet News Malayalam