ആന്ത്രോപിക്കിന്‍റെ ക്ലോഡ് ഉപയോഗം സ്വന്തം ജീവനക്കാർക്കിടയിൽ കുറയ്ക്കാൻ ഒരുങ്ങി മൈക്രോസോഫ്റ്റും മെറ്റയും

ആന്ത്രോപിക്കിന്‍റെ ക്ലോഡ് ഉപയോഗം സ്വന്തം ജീവനക്കാർക്കിടയിൽ കുറയ്ക്കാൻ ഒരുങ്ങി മൈക്രോസോഫ്റ്റും മെറ്റയും. ഡെവലപ്പർമാർക്കും ബിസിനസ് സ്ഥാപനങ്ങൾക്കും ഇടയിൽ ക്ലോഡ് വലിയ സ്വീകാര്യത നേടിയിട്ടുണ്ടെങ്കിലും, എഐ ഉപയോഗത്തിന്റെ ചെലവ് ഉയരുന്ന സാഹചര്യത്തിൽ സ്വന്തം എഐ സംവിധാനങ്ങൾക്ക് കൂടുതൽ പ്രാധാന്യം നൽകുകയാണ് ഇരു കമ്പനികളും.

എഐ രംഗത്ത് ഏറെ ജനപ്രീതി നേടിയ ആന്ത്രോപിക്കിന്റെ ക്ലോഡ് ഉപയോഗം സ്വന്തം ജീവനക്കാർക്കിടയിൽ കുറയ്ക്കാൻ ഒരുങ്ങി മൈക്രോസോഫ്റ്റും മെറ്റയും. ഡെവലപ്പർമാർക്കും ബിസിനസ് സ്ഥാപനങ്ങൾക്കും ഇടയിൽ ക്ലോഡ് വലിയ സ്വീകാര്യത നേടിയിട്ടുണ്ടെങ്കിലും, എഐ ഉപയോഗത്തിന്റെ ചെലവ് ഉയരുന്ന സാഹചര്യത്തിൽ സ്വന്തം എഐ സംവിധാനങ്ങൾക്ക് കൂടുതൽ പ്രാധാന്യം നൽകുകയാണ് ഇരു കമ്പനികളും.

ദ ഇൻഫർമേഷൻ പുറത്തുവിട്ട റിപ്പോർട്ട് പ്രകാരം, ജീവനക്കാരുടെ ആഭ്യന്തര ആവശ്യങ്ങൾക്കായി സ്വന്തം എഐ സംവിധാനങ്ങൾ കൂടുതൽ ഉപയോഗിക്കാനാണ് മൈക്രോസോഫ്റ്റും മെറ്റയും നിർദേശിക്കുന്നത്. എന്നാൽ ആന്ത്രോപിക്കുമായുള്ള ബന്ധം പൂർണമായി അവസാനിപ്പിക്കാൻ ഇരു കമ്പനികളും തയ്യാറായിട്ടില്ല. ഇരു കമ്പനികളുടെയും ഉപഭോക്താക്കൾക്ക് ക്ലോഡ് ഇപ്പോഴും ലഭ്യമാണ്. അതായത്, സ്വന്തം ജീവനക്കാരുടെ ക്ലോഡ് ഉപയോഗം നിയന്ത്രിക്കുമ്പോഴും ഉപഭോക്താക്കൾക്ക് ക്ലോഡ് സേവനം നൽകുന്നത് തുടരുകയാണ് കമ്പനികൾ.

ക്ലോഡ് ഉപയോഗത്തിന്റെ ചെലവ് സംബന്ധിച്ച് മൈക്രോസോഫ്റ്റാണ് കൂടുതൽ ജാഗ്രത പുലർത്തുന്നത്. ഈ വർഷം ആന്ത്രോപിക്കിന്റെ എഐ സാങ്കേതികവിദ്യയ്ക്കായി കുറഞ്ഞത് 1 ബില്യൺ ഡോളറെങ്കിലും ചെലവാകുമെന്നാണ് മൈക്രോസോഫ്റ്റ് നേരത്തെ കണക്കാക്കിയിരുന്നത്. എന്നാൽ ഈ കണക്ക് മൂന്നിലൊന്നിലധികം കുറച്ചതായാണ് റിപ്പോർട്ട്. സാധിക്കുന്നിടത്തോളം സ്വന്തം എഐ ഉൽപ്പന്നങ്ങൾ ഉപയോഗിക്കാൻ ജീവനക്കാരോട് കമ്പനി നിർദേശിച്ചിട്ടുണ്ട്.

ക്ലോഡ് കോഡിൽ നിന്ന് ഗിറ്റ്ഹബ് കോപൈലറ്റിലേക്ക്

മൈക്രോസോഫ്റ്റ് നേരത്തെ സ്വന്തം ഡെവലപ്പർമാരെ ക്ലോഡ് കോഡ് ഉപയോഗിക്കാൻ പ്രോത്സാഹിപ്പിച്ചിരുന്നു. ഡിസംബർ മുതൽ ആയിരക്കണക്കിന് ജീവനക്കാർക്ക് ആന്ത്രോപിക്കിന്റെ കോഡിങ് അസിസ്റ്റന്റ് ഉപയോഗിക്കാൻ അവസരം നൽകിയിരുന്നു. മൈക്രോസോഫ്റ്റിന്റെ എൻജിനീയറിങ് ടീമുകൾക്കിടയിൽ ക്ലോഡ് കോഡ് വേഗത്തിൽ ജനപ്രിയമാകുകയും ചെയ്തു.

എന്നാൽ പിന്നീട് ഡെവലപ്പർമാരെ ഗിറ്റ്ഹബ് കോപൈലറ്റ് സിഎൽഐയിലേക്ക് മാറ്റാൻ കമ്പനി തീരുമാനിച്ചു. വിൻഡോസ്, മൈക്രോസോഫ്റ്റ് 365, സർഫേസ് തുടങ്ങിയ ഉൽപ്പന്നങ്ങളിൽ പ്രവർത്തിക്കുന്ന എക്സ്പീരിയൻസസ് ആൻഡ് ഡിവൈസസ് വിഭാഗം ജൂൺ അവസാനത്തോടെ ക്ലോഡ് കോഡിന്റെ ഭൂരിഭാഗം ലൈസൻസുകളും അവസാനിപ്പിക്കാൻ തയ്യാറെടുക്കുകയായിരുന്നു.

ലക്ഷ്യം ചെലവ് കുറയ്ക്കൽ മാത്രമല്ല

ക്ലോഡ് കോഡ് ഉപയോഗം കുറയ്ക്കാനുള്ള തീരുമാനം ചെലവ് നിയന്ത്രിക്കാൻ മാത്രമല്ലെന്നാണ് റിപ്പോർട്ട്. സ്വന്തം കോഡിങ് ഉൽപ്പന്നം കൂടുതൽ ഉപയോഗിക്കാനും അതിലൂടെ ലഭിക്കുന്ന പ്രതികരണങ്ങൾ ഉപയോഗിച്ച് ഗിറ്റ്ഹബ് കോപൈലറ്റ് മെച്ചപ്പെടുത്താനുമാണ് മൈക്രോസോഫ്റ്റ് ലക്ഷ്യമിടുന്നത്. അതേസമയം, ആന്ത്രോപിക്കിന്റെ എഐ മോഡലുകൾ മൈക്രോസോഫ്റ്റിന്റെ വിശാലമായ എഐ ബിസിനസിൽ നിന്ന് നീക്കം ചെയ്തിട്ടില്ല. മൈക്രോസോഫ്റ്റ് ഫൗണ്ടറിയിലൂടെ ക്ലോഡ് ഇപ്പോഴും ലഭ്യമാണ്. മൈക്രോസോഫ്റ്റ് 365, കോപൈലറ്റ് തുടങ്ങിയ സേവനങ്ങളിലെ ചില പ്രവർത്തനങ്ങൾക്കും ക്ലോഡ് ഉപയോഗിക്കുന്നുണ്ട്.

മെറ്റയിലും ക്ലോഡ് ഉപയോഗം കുറഞ്ഞു

മെറ്റയും സമാനമായ രീതിയിൽ സ്വന്തം എഐ സംവിധാനങ്ങളിലേക്ക് ജീവനക്കാരെ മാറ്റുകയാണ്. ഈ വർഷം ആദ്യം ഏകദേശം 60,000 ജീവനക്കാർ ക്ലോഡ് കോഡ് ഉപയോഗിച്ചിരുന്നെങ്കിൽ ഇപ്പോൾ അത് ഏകദേശം 30,000 ആയി കുറഞ്ഞതായാണ് റിപ്പോർട്ട്. മെറ്റയിലെ ജീവനക്കാരുടെ എണ്ണം കുറച്ചതും ഈ ഇടിവിന് ഒരു കാരണമാണ്. കമ്പനിയുടെ ഏകദേശം 10 ശതമാനം ജീവനക്കാരെ ബാധിച്ച പിരിച്ചുവിടലുകൾ നടന്നിരുന്നു. എന്നാൽ ജീവനക്കാരുടെ എണ്ണം കുറഞ്ഞത് മാത്രമല്ല കാരണം. സ്വന്തം എഐ മോഡലുകളെ അടിസ്ഥാനമാക്കിയുള്ള കോഡിങ് സംവിധാനങ്ങളെയാണ് മെറ്റ ഇപ്പോൾ കൂടുതൽ ആശ്രയിക്കുന്നത്.

സ്വന്തം എഐ ഉപകരണങ്ങളിലേക്ക് തിരിഞ്ഞ് മെറ്റ

മെറ്റയുടെ ആഭ്യന്തര കോഡിങ് ഉപകരണമായ മെറ്റാകോഡ് ഇതിനകം 30,000ത്തിലധികം ഉപയോക്താക്കളെ സ്വന്തമാക്കിയിട്ടുണ്ട്. ക്ലോഡ് കോഡിന് ബദലായി പരീക്ഷിക്കുന്ന മ്യൂസ് കോഡിനും 6,000ത്തിലധികം ആഭ്യന്തര ഉപയോക്താക്കളുണ്ടെന്നാണ് വിവരം.

എഐ ഉപയോഗത്തിന് കോടികളുടെ ബിൽ

എഐ സേവനങ്ങളുടെ വ്യാപകമായ ഉപയോഗം എത്രമാത്രം ചെലവേറിയതാകാമെന്നതിന്റെ സൂചന കൂടിയാണ് കമ്പനികളുടെ ഈ നീക്കം. ജീവനക്കാർക്കുള്ള എഐ ലൈസൻസുകളിൽ കൃത്യമായ ഉപയോഗ പരിധി ഏർപ്പെടുത്താത്തതിനെ തുടർന്ന് ഒരു സ്ഥാപനത്തിന് ഒരു മാസത്തിൽ ഏകദേശം 500 മില്യൺ ഡോളറിന്റെ ക്ലോഡ് ബിൽ ലഭിച്ചതായി മെയ് മാസത്തിലെ ആക്സിയോസ് റിപ്പോർട്ടിൽ പറഞ്ഞിരുന്നു. ഇതോടെ, എഐ സാങ്കേതികവിദ്യയുടെ ഉപയോഗം വർധിപ്പിക്കുന്നതിനൊപ്പം അതിന്റെ ചെലവ് നിയന്ത്രിക്കേണ്ടതും വലിയ സാങ്കേതിക കമ്പനികൾക്ക് പ്രധാന വെല്ലുവിളിയായി മാറുകയാണ്.