പതഞ്ജലി സിം കാര്‍ഡും പുറത്തിറങ്ങി; ബിഎസ്എന്‍എല്‍ പങ്കാളികള്‍

ടെലികോം രംഗത്തും സാന്നിധ്യമുറപ്പിക്കാന്‍ യോഗാ ഗുരു ബാബാ രാംദേവ്

ദില്ലി : ടെലികോം രംഗത്തും സാന്നിധ്യമുറപ്പിക്കാന്‍ യോഗാ ഗുരു ബാബാ രാംദേവ്. പതഞ്ജലിയുമായി സഹകരിച്ച് കേന്ദ്ര സര്‍ക്കാര്‍ സ്ഥാപനമായ ബിഎസ്എന്‍എല്‍ ആണ് പതഞ്ജലി സിം കാര്‍ഡുകള്‍ പുറത്തിറക്കുന്നത്. ‘സ്വദേശി സമൃദ്ധി കാര്‍ഡ്’ എന്നാണ് സിമ്മിന്റെ പേര്. 

ആകര്‍ഷകമായ ഓഫറുകളാണ് സിം ഉപഭോക്താക്കള്‍ക്കായി ഈ കാര്‍ഡില്‍ ലഭിക്കുക. ഈ സിം കാര്‍ഡ് ഉപയോഗിക്കുന്നവര്‍ക്ക് പതഞ്ജലി ഉല്‍പ്പന്നങ്ങള്‍ വാങ്ങുമ്പോള്‍ 10 % ഇളവ് ലഭിക്കും. 144 രൂപയ്ക്ക് റിചാര്‍ജ്ജ് ചെയ്യുകയാണെങ്കില്‍ രാജ്യത്ത് എവിടെ വേണമെങ്കിലും അണ്‍ലിമിറ്റഡായി കോള്‍ ചെയ്യാം.

കൂടാതെ 2 ജിബി ഡാറ്റാ പായ്ക്കും 100 എസ്എംഎസ്സുകളും ഈ ഓഫറിനൊപ്പം ലഭിക്കും. ഇതു കൂടാതെ സിം ഉപഭോക്താക്കള്‍ക്ക് 2.5 ലക്ഷം രൂപയുടെ ആരോഗ്യ ഇന്‍ഷുറന്‍സും 5 ലക്ഷം രൂപയുടെ ലൈഫ് ഇന്‍ഷുറന്‍സ് പരിരക്ഷയും ലഭിക്കും. വാഹന അപകടങ്ങളില്‍ പരിക്ക് സംഭവിച്ചാല്‍ മാത്രമേ ഈ പണം ലഭിക്കുകയുള്ളു.

തുടക്കത്തില്‍ പതഞ്ജലി കമ്പനിയുടെ ജീവനക്കാര്‍ക്ക് മാത്രമാകും ഈ സിം കാര്‍ഡ് വാങ്ങുവാന്‍ സാധിക്കുക. അടുത്ത മാസത്തോട് കൂടി സിം പൊതുജനങ്ങള്‍ക്കും പ്രാപ്യമാകും. 

രാജ്യത്തെ ബിഎസ്എന്‍എല്ലിന്റെ 5 ലക്ഷം കൗണ്ടറുകളില്‍ സ്വദേശി സമൃദ്ധി കാര്‍ഡ് വില്‍പ്പനയ്‌ക്കെത്തിക്കുവാനാണ് കമ്പനികളുടെ തീരുമാനം.