ഇടപാടുകള്‍ കൂടുതല്‍ ലളിതവും സുതാര്യവുമാകും; പേടിഎം വ്യക്തിഗത യുപിഐ ഐഡികൾ പുറത്തിറക്കി, എങ്ങനെ സെറ്റ് ചെയ്യാം?

മൊബൈൽ നമ്പറുകൾ മറച്ച് പണമിടപാടുകള്‍ നടത്താന്‍ അനുവദിക്കുന്ന പേര്‍സണലൈസ്‌ഡ് യുപിഐ ഐഡികളാണ് പേടിഎം അവതരിപ്പിച്ചത്

മുംബൈ: സ്വകാര്യത വർധിപ്പിക്കുന്നതിനും പേയ്‌മെന്‍റുകൾ ലളിതമാക്കുന്നതിനുമായി പേടിഎം വ്യക്തിഗതമാക്കിയ (Personalised UPI IDs) യുപിഐ ഐഡികൾ പുറത്തിറക്കി. ഇടപാടുകൾ നടത്തുമ്പോൾ ഉപയോക്താക്കൾക്ക് അവരുടെ മൊബൈൽ നമ്പറുകൾ മറയ്ക്കാൻ അനുവദിക്കുന്ന പേര്‍സണലൈസ്‌ഡ് യുപിഐ ഐഡികളാണ് പേടിഎം അവതരിപ്പിച്ചതെന്ന് ടൈംസ് ഓഫ് ഇന്ത്യ റിപ്പോര്‍ട്ട് ചെയ്യുന്നു. പണം അയയ്‌ക്കാനും സ്വീകരിക്കാനും ഉപയോക്താക്കൾക്ക് ഇപ്പോൾ name@ptyes അല്ലെങ്കിൽ name@ptaxis പോലുള്ള സവിശേഷ ഐഡന്‍റിഫയറുകൾ സൃഷ്ടിക്കാൻ കഴിയും. ഈ അപ്‌ഡേറ്റ് പണമിടപാടുകളില്‍ മൊബൈൽ നമ്പറുകൾ പങ്കിടേണ്ടതിന്‍റെ ആവശ്യകത ഇല്ലാതാക്കി. പേയ്‌മെന്‍റ് പ്ലാറ്റ്‌ഫോമുകളിൽ ഉടനീളം ഉപയോക്തൃ സ്വകാര്യത മെച്ചപ്പെടുത്താൻ ഈ ഫീച്ചർ സഹായിക്കും.

യെസ് ബാങ്ക്, ആക്സിസ് ബാങ്ക് ഉൾപ്പെടെ തിരഞ്ഞെടുത്ത ബാങ്ക് ഹാൻഡിലുകൾ വഴി നൽകുന്ന യുപിഐ ഹാൻഡിലുകളിൽ ഈ ഫീച്ചർ ലഭ്യമാണ്. മറ്റ് ബാങ്കിംഗ് പങ്കാളികളിലേക്കും ഈ ഫീച്ചര്‍ ഉടൻ വ്യാപിപ്പിക്കാൻ പേടിഎമ്മിന് പദ്ധതിയുണ്ട്. നിങ്ങൾ ഒരു റീട്ടെയിൽ സ്റ്റോറിൽ പണമടയ്ക്കുകയാണെങ്കിലും, അല്ലെങ്കിൽ സുഹൃത്തുക്കളുമായി ബില്ലുകൾ അടയ്ക്കുകയാണെങ്കിലും വ്യക്തിഗതമാക്കിയ യുപിഐ ഐഡി ഉപയോഗിക്കുമ്പോൾ ഇടപാട് വിശദാംശങ്ങളിൽ നിങ്ങളുടെ ഫോൺ നമ്പർ ഇനി ദൃശ്യമാകില്ല.

പേടിഎമ്മിൽ നിങ്ങളുടെ യുപിഐ ഐഡി പേഴ്സണലൈസ് ചെയ്യുന്നതിന് താഴെ പറയുന്ന ഘട്ടങ്ങൾ പാലിക്കുക:

പേടിഎം ആപ്പ് തുറന്ന് പ്രൊഫൈൽ ഐക്കണിൽ ടാപ്പ് ചെയ്യുക.

യുപിഐ സെറ്റിംഗ്സിലേക്ക് പോയി 'യുപിഐ ഐഡി മാനേജ് ചെയ്യുക' എന്നതിൽ ക്ലിക്ക് ചെയ്യുക.

ഒരു പേര്‍സണലൈസ്‌ഡ് ഐഡി തെരഞ്ഞെടുത്ത്, അത് നിങ്ങളുടെ പ്രൈമറി യുപിഐ ഐഡിയായി കണ്‍ഫോം ചെയ്യുക.

പേടിഎം സമീപ മാസങ്ങളിൽ കൊണ്ടുവന്ന വിപുലമായ അപ്‌ഡേറ്റുകളുടെ തുടര്‍ച്ചയായാണ് ഈ പുതിയ സ്വകാര്യതാ കേന്ദ്രീകൃത ഫീച്ചറും അവതരിപ്പിച്ചിരിക്കുന്നത്. ഇടപാടുകൾ സ്വകാര്യമാക്കാനുള്ള ഫീച്ചർ, ഹോം സ്‌ക്രീൻ വിഡ്‌ജറ്റുകൾ വഴി മണി അലേർട്ടുകൾ സ്വീകരിക്കൽ, പേടിഎം യുപിഐ ലൈറ്റ് ഉപയോഗിച്ച് തടസമില്ലാത്ത കുറഞ്ഞ മൂല്യമുള്ള പേയ്‌മെന്‍റുകൾക്കായി ഓട്ടോ ടോപ്പ്-അപ്പ്, പിഡിഎഫ്- എക്സൽ ഫോർമാറ്റുകളിൽ ഡൗൺലോഡ് ചെയ്യാവുന്ന യുപിഐ സ്റ്റേറ്റ്‌മെന്‍റുകൾ എന്നിവ ഇതിൽ ഉൾപ്പെടുന്നു. ഒരൊറ്റ ഡാഷ്‌ബോർഡിനുള്ളിൽ എല്ലാ ലിങ്ക് ചെയ്‌ത അക്കൗണ്ടുകളിലുമുള്ള ഫണ്ടുകൾ നിരീക്ഷിക്കാൻ ഉപയോക്താക്കളെ അനുവദിക്കുന്ന ഒരു ഏകീകൃത ബാങ്ക് ബാലൻസ് വ്യൂവും കമ്പനി അവതരിപ്പിച്ചിട്ടുണ്ട്.