ട്വിറ്ററിൽ കുത്തിക്കുറിക്കുന്നവർ അറിയുക; നിങ്ങൾ പങ്കുവെക്കുന്നതല്ല ജനവികാരം

ജനവികാരവും യഥാർഥ ജനജീവിതവും വിലയിരുത്തുന്നതിലും പ്രതിഫലിപ്പിക്കുന്നതിലും  ട്വിറ്റർ വിവരങ്ങൾ വിശ്വാസയോഗ്യമല്ലെന്ന്​ ശാസ്ത്രജ്​ഞർ. 300 ദശലക്ഷം സജീവ ഉപയോക്​താക്കളുള്ള ഇൗ സാമൂഹിക മാധ്യമത്തിലെ വിവരങ്ങൾ പലപ്പോഴും പ്രതിലോമകരം മാത്രമാണെന്നാണ്​ ഇംഗ്ലണ്ടിലെ വാർവിക്​ സർവകലാശാലയിലെ സോഷ്യാളജി വിദ്​ഗദൻ  എറിക്​ ജൻസൺ പറയുന്നത്​. 

ഉപയോഗിക്കുന്നവരുടെ യഥാർഥ വികാരമാണ്​ സാമൂഹിക മാധ്യമങ്ങളിൽ പ്രതിഫലിക്കുന്നതെന്നതിന്​ തെളിവുകൾ ഇല്ലെന്നും ഇദ്ദേഹം പറയുന്നു. ട്വിറ്റർ ഉപയോഗിക്കുന്നവർ അവരുടെതായമാത്രം സാംസ്​കാരിക രീതികളും സംസാരവും വ്യക്​തിത്വവും കാഴ്​ചപ്പാടുകളും മാത്രമാണ്​ പങ്കുവെക്കുന്നത്​. സാമൂഹികമായ ഒത്തുചേരൽ, ദൃഡമായ ബന്ധങ്ങൾ എന്നിവയുടെ കാര്യങ്ങളിലൊന്നും ഒാൺലൈൻ മാധ്യമങ്ങൾ ഒാഫ്​ലൈൻ മാധ്യമങ്ങൾക്ക്​ പകരമല്ലെന്നും ശാസ്​ത്രജ്​ഞർ വിലയിരുത്തുന്നു.

ട്വിറ്റർ ഉപയോഗിക്കുന്നവർക്കിടയിൽ നടത്തിയ സാമ്പിൾ സർവെയുടെ അടിസ്​ഥാനത്തിൽ കണ്ടെത്തിയ വിവരങ്ങൾ പി.എൽ.ഒ.എസ്​ ജേർണലിൽ പ്രസിദ്ധീകരിച്ചിട്ടുണ്ട്​. ഒട്ടേറെ പഠനങ്ങളില്‍ ട്വിറ്റർ പൊതുജനവികാരം പ്രതിഫലിപ്പിക്കുന്നതല്ലെന്ന്​ വ്യക്​തമാക്കിയിരുന്നു. സ്​ത്രീകളെ അപേക്ഷിച്ച്​ പുരുഷൻമാരാണ് കൂടുതലായി ട്വിറ്റർ ഉപയോഗിക്കുന്നത്. അതുകൊണ്ടുതന്നെ ഇതിലെ നിലപാടുകളെ പൊതുനിലാപടെന്നോ ഭൂരിപക്ഷ നിലപാടെന്നോ വ്യാഖ്യാനിക്കാന്‍ ബുദ്ധിമുട്ടാണ്.

ട്വിറ്റർ ഉപയോഗിക്കുന്നവർ തങ്ങളുടെ സമൂഹത്തിലെ സ്ഥാനം കൂടി കണക്കിലെടുത്ത്  വിഷയങ്ങളുടെ ഒരു വശം മാത്രമേ അവതരിപ്പിക്കുന്നുള്ളൂവെന്ന്​ ജെൻസൺ പറയുന്നു. അവരുടെ യഥാർഥ വികാരവും സാമൂഹിക മാധ്യമങ്ങളിലെ പോസ്​റ്റും തമ്മിൽ വലിയ അന്തരം നിലനിൽക്കുന്നു. ജനങ്ങൾ സാമൂഹിക മാധ്യമങ്ങളിലൂടെയും അല്ലാതെയും പുലർത്തുന്ന ബന്ധവും വ്യക്​തിത്വവും സംബന്ധിച്ച്​ കൃത്യമായ വിവരങ്ങൾ പുറത്തുവരേണ്ടതുണ്ടെന്നും അദ്ദേഹം പറയുന്നു.