വീഡിയോ കോൺഫറൻസിനിടെ ഞെട്ടിക്കുന്ന അറിയിപ്പ്; ജീവനക്കാരുടെ ബോണസ് വെട്ടിക്കുറച്ചതായി ഇൻഫോസിസ്, കാരണമിതോ?

ഇത് ഒരു താൽക്കാലിക മാന്ദ്യമാണെന്നും മികച്ച പ്രകടനം കാഴ്ചവച്ചവർക്ക് അടുത്ത വളർച്ചാ കാലയളവില്‍ മികച്ച ബോണസ് നൽകുമെന്നും ഇന്‍ഫോസിസ് കമ്പനിയുടെ ഉറപ്പ്

ബെംഗളൂരു: ബിസിനസ് സമ്മർദ്ദങ്ങളും കുറഞ്ഞ സാമ്പത്തിക ഫലങ്ങളും ചൂണ്ടിക്കാട്ടി, 2025 മാർച്ച് പാദത്തിലെ പെര്‍ഫോമന്‍സ് ബോണസുകൾ കുറയ്ക്കുന്നതിനെക്കുറിച്ച് ജീവനക്കാർക്ക് ഇൻഫോസിസ് മുന്നറിയിപ്പ് നൽകി. സോഫ്റ്റ്‌വെയർ സേവന മേഖലയിലെ തുടർച്ചയായ അനിശ്ചിതത്വങ്ങളെ പ്രതിഫലിപ്പിക്കുന്നതാണ് ഈ നീക്കം എന്ന് ഇക്കണോമിക് ടൈംസിനെ ഉദ്ദരിച്ച് ടൈംസ് ഓഫ് ഇന്ത്യ റിപ്പോർട്ട് ചെയ്യുന്നു. എച്ച്ആർ ടീമും ഡെലിവറി മാനേജർമാരും തമ്മിൽ അടുത്തിടെ നടന്ന ഒരു വീഡിയോ കോൺഫറൻസിന് ഇടയിലാണ് ഇൻഫോസിസ് 'ബോണസ് കട്ട്' പ്രഖ്യാപനം നടത്തിയത്.

ഇത് ഒരു താൽക്കാലിക മാന്ദ്യമാണെന്നും മികച്ച പ്രകടനം കാഴ്ചവച്ചവർക്ക് അടുത്ത വളർച്ചാ കാലയളവിൽ മികച്ച ബോണസ് ശുപാർശകൾ നൽകുമെന്നും ഇന്‍ഫോസിസ് കമ്പനി ജീവനക്കാർക്ക് ഉറപ്പ് നൽകിയതായും റിപ്പോർട്ട് വ്യക്തമാക്കുന്നു. അറ്റാദായത്തിൽ കഴിഞ്ഞ വർഷത്തെ അപേക്ഷിച്ച് 11.7% ഇടിവ് രേഖപ്പെടുത്തിയതിനെ തുടർന്നാണ് ഇന്‍ഫോസിസിലെ പേഔട്ട് ക്രമീകരണം എന്നാണ് റിപ്പോര്‍ട്ട്. ഇൻഫോസിസ് 2024-25 സാമ്പത്തിക വർഷത്തെ നാലാം പാദത്തിൽ അറ്റാദായത്തിൽ 11.7% വാർഷിക ഇടിവ് രേഖപ്പെടുത്തിയിരുന്നു. 

ഡെലിവറി സമയക്രമം പാലിക്കുന്നതിന് അധിക മണിക്കൂറുകളും വാരാന്ത്യ ജോലിയും കാഴ്ചവെച്ച ജീവനക്കാർക്ക്, കമ്പനി അവരുടെ തുടർച്ചയായ ശ്രമങ്ങളെ വിലമതിക്കുമെന്ന് കോൺഫറൻസിൽ ഇന്‍ഫോസിസ് അധികൃതര്‍ ഉറപ്പുനൽകി. ബിസിനസ് വീണ്ടെടുക്കലിനെ ആശ്രയിച്ച്, അടുത്ത മൂല്യനിർണ്ണയ സൈക്കിളിൽ ഉയർന്ന പ്രകടനം കാഴ്ചവയ്ക്കുന്നവരെ ഉയർന്ന അംഗീകാരത്തിനായി ശുപാർശ ചെയ്തേക്കാമെന്ന് കമ്പനി അറിയിച്ചതായും റിപ്പോർട്ടുകൾ ഉണ്ട്.

ഫെബ്രുവരിയിൽ ഇൻഫോസിസ് അവരുടെ ജീവനക്കാർക്ക് ശമ്പള പരിഷ്കരണ ഉത്തരവുകള്‍ നൽകിയിരുന്നു. ഭൂരിപക്ഷത്തിനും അഞ്ച് ശതമാനം മുതൽ എട്ട് ശതമാനം വരെ വർധനവുണ്ടായിരുന്നത്. ഡിസംബറിൽ അവസാനിച്ച പാദത്തിൽ, ഇൻഫോസിസ് ഡെലിവറി, സെയിൽസ് യൂണിറ്റുകളിലെ യോഗ്യരായ ജീവനക്കാർക്ക് ശരാശരി 80% പ്രകടന ബോണസ് വിതരണം ചെയ്തു, ഇതിൽ 323,000-ത്തിലധികം വരുന്ന ജീവനക്കാരിൽ ഭൂരിഭാഗവും ഉൾപ്പെടുന്നു.

നിരവധി ജീവനക്കാർ ജോലിക്കായി അധിക മണിക്കൂറുകളും വാരാന്ത്യത്തിൽ അധിക ജോലിയും ചെയ്‍തതായി കോൺഫറൻസ് കോളിൽ ടീം ലീഡർമാർ അംഗീകരിച്ചു. മികച്ച ബിസിനസ് പ്രകടനത്തിന്റെ കാലഘട്ടത്തിൽ കമ്പനി അനുകൂലമായ വർദ്ധനവ്, ബോണസുകൾ, പ്രമോഷനുകൾ, അന്താരാഷ്ട്ര ഓൺ-സൈറ്റ് അവസരങ്ങൾ എന്നിവ നൽകിയിട്ടുണ്ടെന്ന് കമ്പനി എക്സിക്യൂട്ടീവുകൾ ചില പരിചയസമ്പന്നരായ ജീവനക്കാരെ അറിയിച്ചു.

മാർച്ച് 10 മുതൽ പുതിയ വർക്ക് ഫ്രം ഹോം നയം കമ്പനി നടപ്പിലാക്കിയതായും റിപ്പോർട്ടുകൾ പറയുന്നു. ജീവനക്കാർ പ്രതിമാസം 10 ദിവസം ഓഫീസിൽ നിന്ന് ജോലി ചെയ്യണമെന്ന് നിഷ്കർഷിക്കുന്ന ഒരു നയമാണ് ഇൻഫോസിസ് അടുത്തിടെ നടപ്പിലാക്കിയത്. നിശ്ചിത ദിവസങ്ങൾക്കപ്പുറം വീട്ടിൽ നിന്ന് ജോലി ചെയ്യാൻ ആഗ്രഹിക്കുന്ന ജീവനക്കാർക്ക് കമ്പനി രണ്ട് തലങ്ങളിലുള്ള അംഗീകാര പ്രക്രിയയും നടപ്പിലാക്കിയിട്ടുണ്ടെന്ന് റിപ്പോർട്ടുകൾ പറയുന്നു.

ഏഷ്യാനെറ്റ് ന്യൂസ് ലൈവ് യൂട്യൂബിൽ കാണാം