വിവോയുടെ പുതിയ ഫോൾഡബിൾ ഫോൺ വരുന്നു; വില 2,19,999 രൂപയോ? സവിശേഷതകൾ ഇങ്ങനെ

ഇന്ത്യൻ വിപണിയിലേക്ക് വിവോയുടെ പുതിയ ഫോൾഡബിൾ സ്മാർട്ട്ഫോണായ വിവോ എക്സ് ഫോൾഡ് 6 ഉടൻ എത്തും. 200 മെഗാപിക്സൽ ക്യാമറയും 7,000 എംഎഎച്ച് ബാറ്ററിയും ഉൾപ്പെടെ മികച്ച ഫീച്ചറുകളോടെയാണ് ഫോൺ പുറത്തിറങ്ങുക. ഒക്ടോബർ 6-ന് ഫോൺ ഔദ്യോഗികമായി ലോഞ്ച് ചെയ്തേക്കുമെന്നാണ് പുറത്തുവരുന്ന റിപ്പോർട്ടുകൾ.

ഇന്ത്യയിലെ മടക്കാവുന്ന സ്‍മാർട്ട്ഫോൺ വിപണിയിലേക്ക് പുതിയ മോഡലുമായി വിവോ. വിവോ എക്സ് ഫോൾഡ് 6 ഉടൻ ഇന്ത്യൻ വിപണിയിലെത്തുമെന്നാണ് റിപ്പോർട്ടുകൾ. ഔദ്യോഗിക ലോഞ്ച് വിവരങ്ങൾ കമ്പനി പുറത്തുവിട്ടിട്ടില്ലെങ്കിലും ഫോണിന്റെ വിലയും സവിശേഷതകളും സംബന്ധിച്ച സൂചനകൾ പുറത്തുവന്നു. 12 ജിബി റാമും 512 ജിബി സ്റ്റോറേജുമുള്ള മോഡലിന് 2,19,999 രൂപ വിലയുണ്ടാകുമെന്നാണ് ടിപ്സ്റ്ററുടെ അവകാശവാദം.

അടിസ്ഥാന മോഡലിന് 1,59,999 രൂപ?

ടിപ്സ്റ്റർ അഭിഷേക് യാദവിന്റെ റിപ്പോർട്ട് പ്രകാരം 12 ജിബി റാം, 512 ജിബി സ്റ്റോറേജ് പതിപ്പിന് 2,19,999 രൂപയായേക്കും. നേരത്തെയുള്ള റിപ്പോർട്ടുകൾ പ്രകാരം ഫോണിന്റെ അടിസ്ഥാന പതിപ്പിന് ഏകദേശം 1,59,999 രൂപ വില പ്രതീക്ഷിക്കാം. എന്നാൽ ഇവ ഔദ്യോഗിക വിലകളല്ല. ലോഞ്ച് സമയത്താകും വിവോ അന്തിമ വില പ്രഖ്യാപിക്കുക.

ഒക്ടോബർ 6ന് ലോഞ്ച്?

വിവോ ഇതുവരെ ലോഞ്ച് തീയതി സ്ഥിരീകരിച്ചിട്ടില്ല. എന്നാൽ ഒക്ടോബർ 6ന് എക്സ് ഫോൾഡ് 6 അവതരിപ്പിച്ചേക്കുമെന്നാണ് സൂചന. വിവോ എസ്2 എഫ്ഇ, വിവോ വി80 എന്നീ മോഡലുകൾക്കൊപ്പമായിരിക്കും ലോഞ്ച് എന്നും റിപ്പോർട്ടുകളുണ്ട്.

5,000 നിറ്റ് തെളിച്ചമുള്ള ഡിസ്പ്ലേ

ഫോണിന് 6.51 ഇഞ്ച് അമോലെഡ് കവർ ഡിസ്പ്ലേയും 8.02 ഇഞ്ച് അമോലെഡ് പ്രധാന ഡിസ്പ്ലേയും ലഭിച്ചേക്കും. രണ്ട് സ്ക്രീനുകൾക്കും 120 ഹെർട്സ് പുതുക്കൽ നിരക്കും പരമാവധി 5,000 നിറ്റ് തെളിച്ചവും ലഭിക്കുമെന്നാണ് റിപ്പോർട്ടുകൾ.

7,000 എംഎഎച്ച് ബാറ്ററി

മീഡിയടെക്കിന്റെ ഡൈമെൻസിറ്റി 9500 സൂപ്പർ ചിപ്സെറ്റായിരിക്കും ഫോണിന്റെ കരുത്തെന്നാണ് സൂചന. 12 ജിബി റാമും 512 ജിബി വരെ സ്റ്റോറേജും ലഭിച്ചേക്കും. ആൻഡ്രോയിഡ് 17 അടിസ്ഥാനമാക്കിയ ഒറിജിൻഒഎസ് 7 ആയിരിക്കും പ്രവർത്തന സംവിധാനം. 7,000 എംഎഎച്ച് ബാറ്ററിയും 80 വാട്ട് വയർഡ്, 40 വാട്ട് വയർലെസ് ചാർജിങ് സംവിധാനവും പ്രതീക്ഷിക്കുന്നു. പ്രിസം ബ്ലാക്ക്, നെബുല ടീൽ എന്നീ നിറങ്ങളിൽ ഫോൺ എത്തിയേക്കും. വെള്ളവും പൊടിയും പ്രതിരോധിക്കുന്ന ഐപി58, ഐപി59 സർട്ടിഫിക്കേഷനുകളും ലഭിച്ചേക്കും.

200 മെഗാപിക്സൽ ക്യാമറ

ക്യാമറയിലും ശ്രദ്ധേയമായ സവിശേഷതകളാണ് പ്രതീക്ഷിക്കുന്നത്. ഒപ്റ്റിക്കൽ ഇമേജ് സ്റ്റബിലൈസേഷനുള്ള 200 മെഗാപിക്സൽ പ്രധാന ക്യാമറ, 50 മെഗാപിക്സൽ അൾട്രാവൈഡ് ക്യാമറ, 50 മെഗാപിക്സൽ പെരിസ്കോപ്പ് ടെലിഫോട്ടോ ക്യാമറ എന്നിവ ലഭിച്ചേക്കും. സെൽഫിക്കും വീഡിയോ കോളുകൾക്കുമായി 20 മെഗാപിക്സൽ മുൻ ക്യാമറയും ഉണ്ടാകുമെന്നാണ് റിപ്പോർട്ടുകൾ.