ഹൃദയം ഇനി നിങ്ങളുടെ ജീവ​ന്‍റെ മാത്രമല്ല, കമ്പ്യൂട്ടറി​ന്‍റെ താക്കോലും സൂക്ഷിക്കും

സ്വകാര്യ വിവരങ്ങൾ അടങ്ങിയ ഇലക്​ട്രോണിക്​ ഉപകരണങ്ങൾക്ക് ഇപ്പോള്‍ പരമാവധി​ ​ഫിംഗർ പ്രിന്‍റ്​ സെക്യൂരിറ്റിയാണ്​ നൽകിവരുന്നത്​. ഉടമയുടെ കൈവിരൽ പതിയാതെ ഉപകരണം തുറന്നുപ്രവർത്തിക്കാനാവാത്ത സംവിധാനമാണിത്​. സെക്യൂരിറ്റി രംഗത്തെ ഗവേഷകർക്ക്​ അവിടെയും ഇവസാനിപ്പിക്കുന്നില്ലെന്നാണ്​ പുതിയ വാർത്തകൾ. ഹൃദയം തന്നെ ഇനി രഹസ്യങ്ങളുടെയും താക്കോൽ സൂക്ഷിക്കുമെന്നാണ്​ ഗവേഷകർ ഇപ്പോൾ പറയുന്നത്​. ഇതിനായുള്ള അത്യാധുനിക സംവിധാനവും വികസിപ്പിച്ചു കഴിഞ്ഞു. ഹൃദയം സ്​കാൻ ചെയ്യുന്നതോടെ പ്രവർത്തന സജ്ജമാകുന്ന കമ്പ്യൂട്ടർ സെക്യൂരിറ്റി സംവിധാനമാണ്​ ഇനി വരാനിരിക്കുന്നത്

കൈവിരൽ പോലെ തന്നെ എല്ലാവരുടെയും ഹൃദയത്തി​ന്‍റെ വലിപ്പവും മറ്റും വ്യത്യസ്ഥമായിരിക്കും. തീവ്രത കുറഞ്ഞ തരംഗങ്ങള്‍ ഉപയോഗിച്ച് പ്രവർത്തിക്കുന്ന ഡോപ്ലർ റഡാർ ഉപയോഗിച്ച്​ ഹൃദയത്തി​ന്‍റെ വലിപ്പം അളക്കുന്നതാണ് പുതിയ​ സംവിധാനം. ഇത്​ കമ്പ്യൂട്ടറിന്​ ഒരു തവണ ലഭിച്ചുകഴിഞ്ഞാൽ പിന്നീട്​ നിങ്ങളെ നിരീക്ഷിച്ചുകൊണ്ടേയിരിക്കും. ആള്‍ മാറി മറ്റൊരാള്‍ കംപ്യൂട്ടറിന് മുന്നില്‍ വന്നിരുന്നാല്‍ ഉടന്‍ തിരിച്ചറിയുകയും ചെയ്യും.  അമേരിക്കയിലെ ബഫ​ലോ സർവകലാശാലയിലെ ഗവേഷകരാണ്​ ഇത്തരമൊരു സംവിധാനം വികസിപ്പിച്ചത്​.

പാസ്​വേഡ്​ സെക്യൂരിറ്റിയെക്കാളും മറ്റ്​ ബയോമെ​ട്രിക്​ സംവിധാനങ്ങ​ളെക്കാളും കൂടുതൽ സുരക്ഷിതമാണ്​ ഹൃദയം കൊണ്ടുള്ള സെക്യൂരിറ്റി സംവിധാനം എന്നാണ്​ ഗവേഷകർ പറയുന്നത്​. ഇൗ സംവിധാനം ഭാവിയിൽ സ്​മാർട്​ഫോണുകളിലും എയർപോർട്ടുകളിലെ സ്​ക്രീനിങ്​ സംവിധാനങ്ങളിലും ഉപയോഗിക്കാനാകുമെന്നും ഇവർ പറയുന്നു. എല്ലാവരും സ്വകാര്യത ആഗ്രഹിക്കുന്നതിനാൽ എല്ലാതരം കമ്പ്യൂട്ടറുകളിലും ഇൗ സെക്യൂരിറ്റി സംവിധാനം കൊണ്ടുവരണം എന്ന്​ തങ്ങൾ ആഗ്രഹിക്കുന്നതായി ബഫലോ സർവകലാശാലയിലെ അസി. പ്രൊഫസർ വിനായോ സു പറയുന്നു.

ഡോപ്ലർ റഡാർ സംവിധാനത്തിൽ നിന്നുള്ള സിഗ്​നലി​ന്‍റെ ശക്​തി വൈഫൈ സിഗ്​നലിനെക്കാൾ കുറവായതിനാൽ ഇത് കാരണം മറ്റ് ആരോഗ്യ പ്രശ്​നങ്ങളും ഉണ്ടാകില്ലെന്ന്​ ഗവേഷകര്‍  പറഞ്ഞു.  വൈഫൈ സംവിധാനത്തെ പോലെ ഇതും സുരക്ഷിതമാണ്​. ഹൃദയം തിരിച്ചറിയാന്‍ ഉപയോഗിക്കുന്ന റീഡർ അഞ്ച്​ മില്ലിവാട്ടിൽ പ്രവര്‍ത്തിക്കുന്നതാണ് ആണുള്ളത്​. ഇതാക​ട്ടെ നമ്മുടെ സ്​മാർട്​ ഫോൺ പുറത്തുവിടുന്ന റേഡിയേഷ​ന്‍റെ ഒരു ശതമാനം പോലും വരില്ല

ആദ്യ തവണ  ഹൃദയം സ്​കാൻ ചെയ്യാന്‍ എട്ട് സെക്കന്റോളം സമയമെടുക്കും. പിന്നീട്​ നിരന്തരമായി പരിശോധിച്ച് ആള്‍ മാറിയിട്ടില്ലെന്ന്​ ഉറപ്പുവരുത്തുകയും ചെയ്യും. ഹൃദയത്തി​ന്‍റെ വലിപ്പം, രൂപം, ഘടന തുടങ്ങിയവ പരിശോധിച്ച്​ മൂന്ന്​ വർഷം എടുത്താണ്​ സംവിധാനം വികസിപ്പിച്ചത്​. ഗുരുതരമായ ഹൃദ്രോഗം വന്നാലല്ലാതെ ഒരാളുടെ ഹൃദയത്തിന്‍റെ രൂപഘടന മാറില്ലെന്നും പ്രൊഫസർ സു പറഞ്ഞു.