Chup Teaser : സണ്ണി ഡിയോളിനൊപ്പം ബോളിവുഡില് ദുല്ഖര്; ഛുപ് ടീസര്
Synopsis
പ്രമുഖ ബോളിവുഡ് സംവിധായകനും നടനുമൊക്കെയായിരുന്ന ഗുരു ദത്തിനുള്ള ആദരം എന്ന നിലയ്ക്കാണ് ചിത്രം ഒരുക്കുന്നതെന്ന് സംവിധായകന് നേരത്തെ പറഞ്ഞിരുന്നു
ദുല്ഖര് സല്മാന്റെ (Dulquer Salmaan) കരിയറിലെ മൂന്നാമത്തെ ഹിന്ദി ചിത്രത്തിന്റെ ടീസര് പുറത്തെത്തി. ഛുപ്: റിവെഞ്ച് ഓഫ് ദ് ആര്ട്ടിസ്റ്റ് (Chup) എന്നു പേരിട്ടിരിക്കുന്ന ചിത്രത്തിന്റെ രചനയും സംവിധാനവും ആര് ബല്കിയാണ്. സണ്ണി ഡിയോള് (Sunny Deol) ആണ് മറ്റൊരു കേന്ദ്ര കഥാപാത്രത്തെ അവതരിപ്പിച്ചിരിക്കുന്നത്. ചീനി കം, പാ, ഷമിതാഭ്, കി ആന്ഡ് ക, പാഡ് മാന് എന്നീ സിനിമകളിലൂടെ ശ്രദ്ധ നേടിയ സംവിധായകനാണ് ആര് ബല്കി. സൈക്കോളജിക്കല് ത്രില്ലര് വിഭാഗത്തില് വരുന്ന ചിത്രമാണിത്. ഒരു ത്രില്ലര് ചിത്രം ബല്കി ആദ്യമായാണ് സംവിധാനം ചെയ്യുന്നത്.
പ്രമുഖ ബോളിവുഡ് സംവിധായകനും നടനുമൊക്കെയായിരുന്ന ഗുരു ദത്തിനുള്ള ആദരം എന്ന നിലയ്ക്കാണ് ചിത്രം ഒരുക്കുന്നതെന്ന് സംവിധായകന് നേരത്തെ പറഞ്ഞിരുന്നു. ഗുരു ദത്തിന്റെ ചരമ വാര്ഷികത്തിലായിരുന്നു ചിത്രത്തിന്റെ ടൈറ്റില് പ്രഖ്യാപിച്ചത്. ഇപ്പോഴിതാ അദ്ദേഹത്തിന്റെ ജന്മ വാര്ഷിക ദിനത്തിലാണ് ചിത്രത്തിന്റെ ടീസര് പുറത്തുവിട്ടിരിക്കുന്നത്. വിശാല് സിന്ഹ ഛായാഗ്രഹണം നിര്വ്വഹിച്ചിരിക്കുന്ന ചിത്രത്തിന് സംഗീതം പകരുന്നത് അമിത് ത്രിവേദിയാണ്. എഡിറ്റിംഗ് നയന് എച്ച് കെ ഭദ്ര. സംവിധായകനൊപ്പം രാജ സെന്, റിഷി വിര്മാനി എന്നിവര് ചേര്ന്നാണ് തിരക്കഥ, സംഭാഷണം ഒരുക്കിയിരിക്കുന്നത്. പ്രൊഡക്ഷന് ഡിസൈനര് സന്ദീപ് ഷറദ് റവാഡെ, സൌണ്ട് ഡിസൈനിംഗ് ദേബഷിഷ് മിശ്ര, വരികള് സ്വാനന്ദ് കിര്കിറെ, വസ്ത്രാലങ്കാരം അയ്ഷ മര്ച്ചന്റ്, സംഘട്ടനം വിക്രം ദഹിയ. ഗൌരി ഷിന്ഡെ, ആര് ബല്കി, രാകേഷ് ജുന്ജുന്വാല എന്നിവര് ചേര്ന്നാണ് നിര്മ്മാണം.
അതേസമയം ദുല്ഖര് സല്മാന്റെ മൂന്നാമത് ബോളിവുഡ് ചിത്രമാണിത്. ഇര്ഫാന് ഖാനൊപ്പം എത്തിയ റോഡ് കോമഡി ഡ്രാമ ചിത്രം 'കര്വാന്' (2018) ആയിരുന്നു ദുല്ഖറിന്റെ ബോളിവുഡ് അരങ്ങേറ്റ ചിത്രം. തൊട്ടടുത്ത വര്ഷം അഭിഷേക് ശര്മ്മയുടെ സംവിധാനത്തില് ദുല്ഖര് ഇന്ത്യന് ക്രിക്കറ്റ് ടീം ക്യാപ്റ്റന് 'നിഖില് ഖോഡ' എന്ന കഥാപാത്രത്തെ അവതരിപ്പിച്ച 'ദി സോയ ഫാക്ടറും' എത്തി.