യഷിന്റെ 'ടോക്സിക്' ഇം​ഗ്ലീഷ് ട്രെയിലർ എത്തി; ചിത്രം ഓ​ഗസ്റ്റ് 26ന് തിയറ്ററുകളിൽ

കെ.ജി.എഫിന് ശേഷം യഷ് നായകനാകുന്ന 'ടോക്സിക്' എന്ന പാൻ-ഇന്ത്യൻ ചിത്രത്തിന്‍റെ ഇംഗ്ലീഷ് ട്രെയിലർ പുറത്തിറങ്ങി. ഗോവയുടെ പശ്ചാത്തലത്തിലുള്ള ക്രൈം ഡ്രാമയിൽ കിയാര, നയൻതാര എന്നിവരടങ്ങുന്ന വലിയ താരനിരയുണ്ട്. ചിത്രം ഓഗസ്റ്റ് 26-ന് തിയേറ്ററിലെത്തും.

'കെ.ജി.എഫ്: ചാപ്റ്റർ 2'-വിന് ശേഷം യഷ് നായകനായി എത്തുന്ന ഏറ്റവും പുതിയ പാൻ-ഇന്ത്യൻ ചിത്രം 'ടോക്സിക്: എ ഫെയറി ടെയിൽ ഫോർ ഗ്രോൺ-അപ്സി'ന്റെ ഇം​ഗ്ലീഷ് ട്രെയിലർ റിലീസ് ചെയ്തു. ഗീതു മോഹൻദാസ് സംവിധാനം ചെയ്യുന്ന ചിത്രം ഓ​ഗസ്റ്റ് 26ന് തിയറ്ററുകളിൽ എത്തും. ടോക്സിക് കേരളത്തിലെ തിയേറ്ററുകളിലെത്തിക്കുന്നത് പനോരമ സ്റ്റുഡിയോസ് ആണ്. പ്രമുഖ നിർമാണ കമ്പനിയായ സെഞ്ച്വറി ഫിലിംസുമായി സഹകരിച്ചാണ് പനോരമ സ്റ്റുഡിയോസ് ചിത്രത്തിന്‍റെ കേരളത്തിലെ വിതരണാവകാശം സ്വന്തമാക്കിയിരിക്കുന്നത്.

തെന്നിന്ത്യൻ സിനിമയിൽ ഈ വർഷം പുറത്തിറങ്ങുന്ന ഏറ്റവും വലിയ തിയേറ്റർ റിലീസുകളിൽ ഒന്നാണ് 'ടോക്സിക്'. യഷിന് പുറമെ കിയാര അദ്വാനി, നയൻതാര, ഹുമ ഖുറേഷി, താര സുതാരിയ, രുക്മിണി വസന്ത് എന്നിവരടങ്ങുന്ന വൻ താരനിരയാണ് ചിത്രത്തിൽ അണിനിരക്കുന്നത്. കഴിഞ്ഞ കാലത്തെ ഗോവയുടെ പശ്ചാത്തലത്തിൽ ഒരുങ്ങുന്ന ചിത്രം കുറ്റകൃത്യങ്ങൾ, അധികാരം, ആഗ്രഹം, വഞ്ചന എന്നിവയുടെ കഥയാണ് പറയുന്നത്. 'രായാ' എന്ന കഥാപാത്രമായാണ് യഷ് ചിത്രത്തിൽ എത്തുന്നത്.

തങ്ങളുടെ സാന്നിധ്യം ദക്ഷിണേന്ത്യയിൽ ശക്തമാക്കുന്നതിന്‍റെ ഭാഗമായാണ് പനോരമ സ്റ്റുഡിയോസിന്‍റെ ഈ നീക്കം. മലയാളത്തിൽ പനോരമ സ്റ്റുഡിയോസിന്‍റേതായെത്തിയ 'അനോമി', 'ഉന്മദം' എന്നീ ചിത്രങ്ങള്‍ ഇതിനകം ശ്രദ്ധ നേടി കഴിഞ്ഞിട്ടുണ്ട്. 'ടിക്കി ടാക്ക', ടൊവിനോ തോമസ് നായകനാകുന്ന 'പ്രൊഡക്ഷൻ നമ്പർ 4', 'മുൻപേ' എന്നീ ചിത്രങ്ങളും പനോരമ സ്റ്റുഡിയോസിന്‍റെ നിർമാണത്തിൽ ഒരുങ്ങുന്നുണ്ട്. കൂടാതെ നിവിൻ പോളി, ഫഹദ് ഫാസിൽ തുടങ്ങിയ പ്രമുഖ താരങ്ങളുമായും പനോരമ സ്റ്റുഡിയോസ് ഒരുമിക്കുന്നുണ്ട്. .കേരളത്തിൽ യഷിനുള്ള വൻ ജനപ്രീതിയും ഗീതു മോഹൻദാസിന്‍റെ വേറിട്ട മേക്കിംഗും കണക്കിലെടുക്കുമ്പോൾ 'ടോക്സിക്' കേരളത്തിലെ തിയേറ്ററുകളിൽ വലിയ തരംഗം സൃഷ്ടിക്കുമെന്നാണ് പ്രതീക്ഷിക്കുന്നത്. സെഞ്ച്വറി ഫിലിംസുമായി ചേർന്ന് ചിത്രം അതർഹിക്കുന്ന രീതിയിൽ വൻതോതിൽ തിയേറ്ററുകളിൽ എത്തിക്കാനുള്ള തയ്യാറെടുപ്പിലാണ് പനോരമ സ്റ്റുഡിയോസ്.