ഇന്ത്യയെക്കുറിച്ചുള്ള വംശീയ അധിക്ഷേപങ്ങൾ വേദനിപ്പിക്കുന്നെന്ന് ബ്രിട്ടീഷ് സഞ്ചാരി; 'നെഗറ്റീവ് പോസ്റ്റുകൾ കാണുമ്പോൾ സങ്കടം'

ഇന്ത്യയെക്കുറിച്ച് സോഷ്യൽ മീഡിയയിൽ നടക്കുന്ന വ്യാജ പ്രചാരണങ്ങൾക്കെതിരെ തുറന്നടിച്ച് ബ്രിട്ടീഷ് സഞ്ചാരി റിച്ചാർഡ് ലാ റൂയിന. വ്യൂസ് ലഭിക്കാൻ വേണ്ടി ഇന്ത്യയുടെ മോശം വശങ്ങൾ മാത്രം കാണിക്കുന്ന പ്രവണതയെ അദ്ദേഹം രൂക്ഷമായി വിമർശിച്ചു. ഇന്ത്യയുടെ യഥാർത്ഥ സൗന്ദര്യവും ലോകോത്തര ആതിഥ്യമര്യാദയും സുരക്ഷിതത്വവുമാണ് അദ്ദേഹം തന്‍റെ പോസ്റ്റിലൂടെ തുറന്നുകാട്ടിയത്.

ഇന്ത്യയെക്കുറിച്ച് സോഷ്യൽ മീഡിയയിൽ പ്രചരിക്കുന്ന വംശീയ മുൻവിധികളെയും തെറ്റായ പ്രചാരണങ്ങളെയും പരസ്യമായി ചോദ്യം ചെയ്ത് ബ്രിട്ടീഷ് സഞ്ചാരി രംഗത്ത്. മുൻ എഴുത്തുകാരൻ കൂടിയായ റിച്ചാർഡ് ലാ റൂയിന എന്ന ടൂറിസ്റ്റാണ് ഇന്ത്യയിലെ തന്‍റെ രണ്ടാമത്തെ സന്ദർശനത്തിന് ശേഷം സോഷ്യൽ മീഡിയയിലെ ദുഷ്പ്രചാരണങ്ങൾക്കെതിരെ തുറന്നടിച്ചത്. ചില ഉള്ളടക്ക സ്രഷ്ടാക്കൾ തങ്ങളുടെ വ്യക്തിപരമായ നേട്ടങ്ങൾക്കായി ഇന്ത്യയിലെ പിന്നാക്ക പ്രദേശങ്ങൾ മാത്രം ചിത്രീകരിച്ച്, രാജ്യം മുഴുവൻ വൃത്തിഹീനവും ദരിദ്രവുമാണെന്ന് വരുത്തിത്തീർക്കാൻ മനഃപൂർവ്വം ശ്രമിക്കുകയാണെന്ന് അദ്ദേഹം ഇൻസ്റ്റാഗ്രാമിൽ കുറിച്ചു.

ലോകോത്തര ആതിഥ്യമര്യാദ

ഇന്ത്യയുടെ യഥാർത്ഥ സൗന്ദര്യം, ലോകോത്തരമായ ആതിഥ്യമര്യാദ, ഇവിടുത്തെ മനുഷ്യരുടെ സ്നേഹവും ഊഷ്മളതയും എന്നിവയെല്ലാം ഇത്തരം ഓൺലൈൻ വീഡിയോകൾ പൂർണ്ണമായും അവഗണിക്കുകയാണെന്ന് ലാ റൂയിന വ്യക്തമാക്കി. ലോകത്തിലെ മറ്റ് രാജ്യങ്ങളിൽ നിന്ന് ഇന്ത്യയെ വേറിട്ടു നിർത്തുന്നത് ഇവിടുത്തെ ഈ സവിശേഷതകളാണെന്നും അദ്ദേഹം കൂട്ടിച്ചേർത്തു. "സോഷ്യൽ മീഡിയയിലെ മിക്ക പോസ്റ്റുകളും യൂട്യൂബ് വീഡിയോകളും ഇന്ത്യയെക്കുറിച്ച് മോശമായ കാര്യങ്ങൾ മാത്രം കാണിക്കുന്നതും, പലപ്പോഴും വംശീയധിക്ഷേപം നിറഞ്ഞതുമാണെന്ന് കാണുമ്പോൾ വിഷമമുണ്ട്. 150 കോടി ജനങ്ങളുള്ള ഒരു രാജ്യത്ത് ചെന്ന്, അവിടുത്തെ ഏറ്റവും മോശമായ കാര്യങ്ങൾ മാത്രം കണ്ടുപിടിച്ച് വീഡിയോയാക്കുക എന്നതാണ് പലരുടെയും രീതി. ഇതിന് ദശലക്ഷക്കണക്കിന് വ്യൂസ് ലഭിക്കാറുമുണ്ട്. ഇത് വളരെ തരംതാണ പ്രവൃത്തിയാണ്," ലാ റൂയിന പറയുന്നു.

മികച്ച ഭക്ഷണം, മനോഹരമായ സ്ഥലങ്ങൾ

ജാപ്പനീസ് നഗരമായ ഒസാക്ക സന്ദർശിക്കുന്ന വിനോദ സഞ്ചാരികളുടെ പകുതി പോലും ഇന്ത്യയിൽ എത്തുന്നില്ല. അതുകൊണ്ട് തന്നെ ഇത്തരം വ്യാജ പ്രചാരണങ്ങൾ ആളുകൾ എളുപ്പത്തിൽ വിശ്വസിക്കുകയാണെന്നും അദ്ദേഹം ചൂണ്ടിക്കാട്ടി. "വീഡിയോകൾക്ക് കൂടുതൽ കാഴ്ചക്കാരെ കിട്ടാൻ ചേരികളിലേക്കോ അല്ലെങ്കിൽ 'ഏറ്റവും വൃത്തിഹീനമായ തെരുവ് ഭക്ഷണം' കിട്ടുന്ന ഇടങ്ങളിലേക്കോ പോകാൻ ഞങ്ങൾക്ക് ആവശ്യപ്പെടാമായിരുന്നു. എന്നാൽ അതിന് പകരം മനോഹരമായ സ്ഥലങ്ങളാണ് ഞങ്ങൾ സന്ദർശിച്ചത്. ഇവിടെ എല്ലാവരും വളരെ സ്നേഹത്തോടെയാണ് പെരുമാറിയത്. ലോകത്ത് ഞങ്ങൾ അനുഭവിച്ചതിൽ വച്ച് ഏറ്റവും മികച്ച സേവനമാണ് ഇവിടെ ലഭിച്ചത്. വായുമലിനീകരണ പ്രശ്നങ്ങളൊന്നും ഉണ്ടായിരുന്നില്ല, അതോടൊപ്പം എല്ലാ സ്ഥലങ്ങളും തികച്ചും സുരക്ഷിതവുമായിരുന്നു," അദ്ദേഹം കുറിച്ചു. റിച്ചാർഡ് ലാ റൂയിനയുടെ ഇൻസ്റ്റാഗ്രാം പോസ്റ്റ് വൈറലായതോടെ, ഇന്ത്യയുടെ നല്ല വശങ്ങൾ ലോകത്തിന് മുന്നിൽ എത്തിച്ചതിന് നിരവധി സോഷ്യൽ മീഡിയ ഉപയോക്താക്കൾ അദ്ദേഹത്തിന് നന്ദി അറിയിച്ചു.