ആഹാ, ആളാകെ മാറിയല്ലോ? മകളുടെ ഇൻഡിഗോ യൂണിഫോമിൽ തിളങ്ങി അമ്മ; മനം നിറയ്ക്കും വീഡിയോ

ഇൻഡിഗോ ഫ്ലൈറ്റ് അറ്റൻഡന്റായ പായൽ എന്ന യുവതി തന്റെ അമ്മയെ സ്വന്തം യൂണിഫോം അണിയിച്ച് മനോഹരിയായി ഒരുക്കിയിരിക്കുന്ന ഹൃദയസ്പർശിയായ വീഡിയോയാണ് ഇപ്പോള്‍ ഇൻസ്റ്റാഗ്രാമിൽ വൈറലാകുന്നത്. 

സ്വന്തം എയർലൈൻ യൂണിഫോമിൽ അമ്മയെ ഒരുക്കിയെടുത്തതിന്റെ ഹൃദയസ്പർശിയായ വീഡിയോ പങ്കുവെച്ച് ഇൻഡിഗോ ഫ്ലൈറ്റ് അറ്റൻഡന്റ് സോഷ്യൽ മീഡിയയുടെ മനസ്സ് കവരുന്നു. പായൽ എന്ന ക്യാബിൻ ക്രൂ അംഗം തന്റെ ഇൻസ്റ്റാഗ്രാം അക്കൗണ്ടിലൂടെയാണ് ഈ അപൂർവ നിമിഷം പങ്കുവെച്ചത്. മേക്കപ്പും ഫ്ലൈറ്റ് അറ്റൻഡന്റിന്റെ ഔദ്യോഗിക വസ്ത്രവുമെല്ലാം അണിഞ്ഞ്, ഒരസ്സൽ ക്യാബിൻ ക്രൂ ലുക്കിലാണ് വീഡിയോയിൽ അമ്മ ഉള്ളത്. അമ്മയും മകളും തമ്മിലുള്ള ആത്മബന്ധത്തിന്റെ ആഴം വ്യക്തമാക്കുന്നതാണ് ഈ ദൃശ്യങ്ങൾ. അമ്മയെ യൂണിഫോം ധരിക്കാനും ഒരുങ്ങാനും പായൽ സഹായിക്കുന്നത് വീഡിയോയിൽ കാണാം. 'എന്റെ യൂണിഫോമിൽ ഞാൻ അമ്മയെ ഒരുക്കിയെടുത്തു' എന്ന വരികളും വീഡിയോയ്‌ക്കൊപ്പം ചേർത്തിട്ടുണ്ട്.

വെറുമൊരു വസ്ത്രധാരണത്തിനപ്പുറം, മകളുടെ നേട്ടത്തിൽ ഒരു അമ്മയ്ക്കുള്ള അഭിമാനത്തിന്റെയും സ്നേഹത്തിന്റെയും പ്രതീകമായാണ് സോഷ്യൽ മീഡിയ ഈ വീഡിയോയെ ഏറ്റെടുത്തിരിക്കുന്നത്. ഇൻഡിഗോ ഫ്ലൈറ്റ് അറ്റൻഡന്റിന്റെ നീല യൂണിഫോമിൽ അതീവ സന്തോഷവതിയായും സുന്ദരിയായും ക്യാമറയ്ക്ക് മുന്നിൽ നിൽക്കുന്ന അമ്മയുടെ ഭാവങ്ങൾ കാണികളുടെ കണ്ണുനിറയ്ക്കുന്നതാണ്. മക്കൾ തങ്ങളുടെ സ്വപ്നങ്ങൾ കൈവരിക്കുന്നത് കാണുമ്പോൾ മാതാപിതാക്കൾക്ക് ഉണ്ടാകുന്ന ആനന്ദം എത്രത്തോളമാണെന്ന് ഈ ദൃശ്യങ്ങൾ വ്യക്തമാക്കുന്നു. ഇവിടെ പായൽ, തന്റെ ഔദ്യോഗിക ജീവിതത്തിന്റെ ഒരു ചെറിയ ഭാഗം അമ്മയ്ക്ക് കൂടി അനുഭവിക്കാൻ നൽകിക്കൊണ്ട് ആ സന്തോഷം സവിശേഷമാക്കുകയായിരുന്നു.

കുടുംബബന്ധങ്ങളുടെ ആഴവും സ്വപ്നങ്ങളുടെ സാക്ഷാത്കാരവും ഒത്തുചേരുന്ന ഇത്തരം വീഡിയോകൾ എപ്പോഴും ആളുകളുടെ ശ്രദ്ധ നേടാറുണ്ട്. മകളുടെ യൂണിഫോമിൽ നിൽക്കുന്ന അമ്മയുടെ ചിത്രം പലരെയും വൈകാരികമായി സ്പർശിച്ചു. മാതാപിതാക്കളെ ഇതുപോലെ അഭിമാനം കൊള്ളിക്കാൻ സാധിക്കുന്നത് ഏതൊരു മകളുടെയും സ്വപ്നമാണെന്ന് ഭൂരിഭാഗം പേരും അഭിപ്രായപ്പെട്ടു.

ഇൻസ്റ്റാഗ്രാമിൽ പങ്കുവെച്ച വീഡിയോയ്ക്ക് താഴെ ലക്ഷക്കണക്കിന് ആളുകളാണ് അഭിനന്ദനങ്ങളുമായി എത്തുന്നത്. ഇന്ന് സോഷ്യൽ മീഡിയയിൽ കണ്ടതിൽ വെച്ച് ഏറ്റവും മനോഹരമായ കാഴ്ചയാണിത്, എന്ന് ഒരു ഇൻസ്റ്റാഗ്രാം ഉപഭോക്താവ് കുറിച്ചു. 'നിങ്ങളുടെ അമ്മ ഈ യൂണിഫോമിൽ അതീവ സുന്ദരിയായിരിക്കുന്നു, ഒപ്പം അവരുടെ മുഖത്ത് വലിയൊരു അഭിമാനവും കാണാം' എന്ന് മറ്റൊരാൾ എഴുതി. 'അമ്മമാരുടെ മുഖത്തെ ആ പുഞ്ചിരിയിൽ എല്ലാമുണ്ട്. നമ്മുടെ വിജയങ്ങൾക്ക് പിന്നിലെ യഥാർത്ഥ ശക്തി അവരാണ്' എന്നും പലരും കമന്റ് ചെയ്തു. ചുരുങ്ങിയ സമയം കൊണ്ട് ലക്ഷക്കണക്കിന് വ്യൂസാണ് വീഡിയോയ്ക്ക് ലഭിച്ചിരിക്കുന്നത്.